1 Ebyomubyanda 15 - Baibuli Ekibono kya Katonda 2014

Daudi yeetegeka okuleeta Esanduuku ey'Endagaano

¹ Daudi yazimba amayumba ge mu kyetebwa Ekibuga kya Daudi. Yaategeka n'ekifo eky'okutaamu Esanduuku ya Katonda, yaakisimbaku weema.

² Agho Daudi yaakoba ati: “Ghazira bantu bandi banaabbeeda Sanduuku ya Katonda okutoolaku Abalevi, kuba Musengwa Katonda abo be yalonda okugibbeedanga n'okugirabiriranga enaku dhoonadhoona.”

³ Kale Daudi yaayeta Abaisiraeli boonaboona, baaja beesololeza e Yerusalemu okutwala Sanduuku ya Musengwa Katonda mu kifo kye yali agitegekeire.

⁴ Yaayeta baidhukulu ba Aaroni, n'Abalevi abandi bano:

⁵ Ku b'oku nda ya Kohathi kwaidhaku Urieli ng'akulembeire baganda be kikumi n'abiri (120)

⁶ ku b'oku nda ya Merari kwaidhaku Asaia ng'akulembeire baganda be ebikumi bibiri n'abiri (220)

⁷ ku b'oku nda ya Gereshoni kwaidhaku Yoeli ng'akulembeire baganda be kikumi n'asatu (130)

⁸ ku b'oku nda ya Elizafani kwaidhaku Shemaia ng'akulembeire baganda be ebikumi bibiri (200)

⁹ ku b'oku nda ya Heburoni kwaidhaku Elieli ng'akulembeire baganda be kinaana (80)

¹⁰ ku b'oku nda ya Uzzieli kwaidhaku Amminadabu ng'akulembeire baganda be kikumi na ikumi na babiri (112).

¹¹ Agho Daudi yaayeta bakabona Zadoki, ni Abiathari, ghalala n'Abalevi bale omukaaga: Urieli, Asaia, Yoeli, Shemaia, Elieli, ni Amminadabu.

¹² Yaabakoba ati niimwe abakulu b'enda dha baiseimwe mu kika kya Levi. Mwetukuze imwe beene ni baganda baimwe, mughange okuleeta Sanduuku ya Musengwa wa Isiraeli mu kifo kye ngitegekeire.

¹³ Olw'okuba ti niimwe omwagibbeeda ku mukuzi ogwasooka, Musengwa Katonda waife kyeyava n'atubonereza olw'obutakola nga bwe yalagira.

¹⁴ Kale bakabona n'Abalevi abandi beetukuza, baghange okutwala Esanduuku ya Musengwa Katonda wa Isiraeli.

¹⁵ Baagibbeedera ku mabega gaibwe n'emiti egy'okugibbeedesa, nga Musengwa Katonda bwe yalagira ng'abita mu Musa.

¹⁶ Daudi yaalagira abakulu b'Abalevi bateegho Balevi banaibwe, bembe n'amaani enhembo edh'eisanhu nga bakubiraku entongooli, n'endingidi, n'ebide.

¹⁷ Kale abalevi baataagho Hemani mutabane wa Yoeli, n'owundi ku baganda be Asafu mutabane wa Berekia ni Ethani mutabane wa Kushaia ow'oku nda ya Merari.

¹⁸ Era baataagho Balevi banaibwe okwiririra abo, nga n'ab'okubabeeraku: Zekaria, Yaazieli, Shemiramothi, Yehieli, Unni, Eliabu, Benaia, Maaseia, Mattithia, Elifelehu, ni Mikaneia ghalala ni Obededomu, ni Yeiyeli, abakuumi b'emiryango.

¹⁹ Baataagho abembi bano: Hemani, Asafu, ni Ethani, okukuba ebide eby'ekyuma eky'ekikomo.

²⁰ Ate baataagho ab'okukuba entongooli edhivuga mu maloboozi aga ghaigulu, nga ni bano: Zekaria, Azieli, Shemiramothi, Yehieli, Unni, Eliabu, Maaseia, ni Benaia.

²¹ Baataagho n'ab'okukuba endingidi edhivuga mu maloboozi aga ghansi, nga ni bano: Mattithia, Elifelehu, Mikaneia, Obededomu, Yeiyeli, ni Azazia.

²² Kenania omukulu w'Abalevi, nga bweyali omukugu mu by'okwemba, n'eyali ow'okukulira abembi.

²³ Berekia ni Elukana, n'abaali ab'okukuuma Esanduuku ey'Endagaano.

²⁴ Bakabona bano nga n'ab'okufuuwa amagwala mu maiso g'Esanduuku ya Katonda: Shebania, Yoshafati, Nethaneli, Amasai, Zekaria, Benaia, ni Eliezeri.

Esanduuku ey'Endagaano bagireeta e Yerusalemu

²⁵ Kale Daudi, n'abakulembeze mu Isiraeli, n'abaduumizi b'abaisirukale olukumi olukumi, baaja baatoolayo Esanduuku y'Endagaano ya Musengwa Katonda mu ndhu ya Obedi Edomu, n'okusagamba okw'amaani.

²⁶ Baaghaayo omusengo ogw'ente enume musanvu n'entaama enume musanvu eri Katonda, kuba yasobozesa Abalevi okubbeeda Sanduuku y'Endagaano.

²⁷ Daudi yaavaala ekanzu ey'olugoye olughegheevu, era n'abembi, ni Kenania omukulembeze waibwe, n'Abalevi boonaboona abaabbeeda Esanduuku ey'Endagaano, nga boona bavaire batyo. Daudi yali avaire n'ekivaalo eky'obwakabona eky'olugoye olughegheevu.

²⁸ Kale batyo Abaisiraeli boonaboona baaleeta Esanduuku y'Endagaano ya Musengwa Katonda nga bali kukuba emizira, eno nga bwe bafuuwa endeka n'amagwala, era nga bwe bakuba n'ebide, n'entongooli, n'endingidi, nga biri kuvuga inho.

²⁹ Esanduuku ey'Endagaano ya Musengwa Katonda bwe baali bali kugireeta mu kibuga ekyetebwa ekya Daudi, Mikali mughala wa Saulo yaabisa amaiso mu dinisa yaalinga kuliya, yaabona kyabazinga Daudi ng'ali kukina bw'asagamba. Yaamunhooma mule.