1 Ebyomubyanda 14 - Baibuli Ekibono kya Katonda 2014

Daudi bye yakola mu Yerusalemu

¹ Agho kyabazinga Hiramu ow'e Tiro yaagheereza Daudi abakwenda, n'emiti emivule, n'ababaadhi, n'abazimbisa amabaale, bazimbire Daudi ekisaagaati eky'obwakyabazinga.

² Agho Daudi yaakitegeera nga bwenebwene Musengwa Katonda amukakaisa ku bwa kyabazinga bwa Isiraeli, era ng'aleeteire obwakyabazinga obwo okugheebwa ekitiisa ku lw'abantu be Abaisiraeli.

³ Daudi ng'ali eyo mu Yerusalemu, yeeyongera okubayiza abakazi, yaazaala abaana abandi abalenzi n'abaghala.

⁴ Gano n'amaina ag'abaana be yazaala ng'ali mu Yerusalemu: Shammua, Shobabu, Nathani, Solomoni,

⁵ Ibuhari, Elishua, Elupeleti,

⁶ Noga, Nefegi, Yafia,

⁷ Elishama, Beeliada, ni Elifeleti.

Daudi aghangula Abafilisiti

⁸ Abafilisiti bwe baawulira nga Daudi asiigiibwa omuzigo okumufuula kyabazinga wa Isiraeli yoonayoona, beesoloza boonaboona baaja okumuyiiga. Daudi bwe yakiwulira, yaidha okubalwanisa.

⁹ Agho Abafilisiti baatuuka mu kiiko ky'e Refa, baakinhagulula.

¹⁰ Daudi yeebuuza ku Katonda ati: “Nje nwane n'Abafilisiti? Onaabampa naabaghangula?” Musengwa Katonda yairamu ati: “Ja. Bwenebwene ndidha kubakugha obaghangule.”

¹¹ Agho Daudi yaidha e Baali Perazimu, yaaghangulirayo Abafilisiti. Yaakoba ati: “Musengwa Katonda andeeteire okughaguza mu bazigu ng'oti n'omwidhuzo ogw'amaadhi bwe gughaguza ghe gubita.” Kale kyova ekifo ekyo bakyeta Baali Perazimu.

¹² Abafilisiti baalumuka, baaleka n'agho ebifaananie byaibwe bye baasinzanga. Daudi yaalagira abasaadha be baabyokya.

¹³ Kabiri Abafilisiti baidha mu kiiko eky'e Refaimu, baakinhagulula.

¹⁴ Era Daudi yeebuuza ku Katonda. Katonda yaamwiramu ati: “Otabalumba ng'ova ghano, aye weetooloole, obalumbire emberi w'emiti emibalisamu.

¹⁵ Bw'onaawulira empindo edh'abali kukumba, nga dhiviira ghaigulu ku miti emibalisamu egyo, ng'olwo obalumba. Olwo nze Katonda naaba nkwesooseeyo emberi okughangula eigye ery'Abafilisiti eryo.”

¹⁶ Daudi yaakola nga Musengwa Katonda bwe yamulagira, yaaja ng'aita Abafilisiti okuva e Geba okutuuka e Gezeri.

¹⁷ Daudi oyo yaamanhika mu nsi dhoonadhoona, era Musengwa Katonda yaaleetera amaghanga goonagoona okumutya.