1 Ebyomubyanda 13 - Baibuli Ekibono kya Katonda 2014

Esanduuku ey'Endagaano bagitoola e Kiriathi Yearimu

¹ Agho kyabazinga Daudi yeebuuza ku bakulu boonaboona abaduumira ebikunsu by'abalwani olukumi olukumi, n'abaduumira ebikunsu by'abalwani ekikumi ekikumi, n'abakulembeze abandi boonaboona.

² Yaakoba Abaisiraeli boonaboona abaali beesoloiza ati: “Bwe muba nga mukisiima era ni kiba nti ni Musengwa Katonda waife ekyo ky'ayenda, ka tutume abakwenda baje beete baganda baife abandi boonaboona mu biketezo bya Isiraeli byonabyona beete ni bakabona ghalala n'Abalevi be bali nabo mu bibuga byaibwe ebiriku ebyayiro, babakobe baidhe batweyimbeku.

³ Olwo tuje twize Esanduuku y'Endagaano eya Katonda waife, ye twali tusuuliriire nga titukaagifaaku mu biseera Saulo bye yafugiramu.”

⁴ Boonaboona abaali beesoloiza baakisiima, kuba baakibona nga kituufu.

⁵ Agho Daudi yaasoloza Abaisiraeli boonaboona, okuva e Shihori ku nsalosalo ni Misiri okutuuka aghaingirirwa e Hamathi, baje batooleyo Esanduuku y'Endagaano eya Katonda e Kiriathi Yearimu.

⁶ Kale Daudi yaasituka n'Abaisiraeli boonaboona, baaja e Baala, ekyo nga ni Kiriathi Yearimu eky'omu kiketezo kya Yuda, baaja okutoolayo Esanduuku ey'Endagaano ya Katonda eyetebwa eriina lya Musengwa Katonda, oyo atyama ku kityamo kye eky'obwakyabazinga ekiri ku bitonde ebiri n'amaghagha ebyetebwa bikerubi.

⁷ Baata Esanduuku eyo ku kigaali ekiyaaka, Uzza ni Ahio batabane ba Abinadabu baakivuga nga bakitoola mu ndhu ya Abinadabu oyo.

⁸ Daudi n'Abaisiraeli boonaboona baajanga nga bakina n'amaani gaibwe goonagoona mu maiso ga Katonda. Baayemba nga bwe bakuba endingidi, n'entongooli, n'obugoma, n'ensaasi, n'ebide, nga bwe bafuuwa n'amagwala.

⁹ Bwe baatuuka mu kifo aghakubirwa engaano ekya Kidoni, ente dhaaba oti dhenda kugwa. Kale, Uzza yaagolola omukono, yaagema n'engalo dhe ku Sanduuku ey'endagaano erobe kugwa.

¹⁰ Agho Musengwa Katonda yaamutumbukizaaku obusungu bwe ng'oti muliro, yaamwitiragho olw'okwetulinkiriza n'agema ku Sanduuku eyo. Uzza oyo yaafiira agho mu maiso ga Katonda.

¹¹ Daudi yaasungughala olwa Musengwa Katonda okubonereza Uzza atyo. Ekifo ekyo baakituuma eriina Perezi Uzza okutuusa ni ye buli eno.

¹² Ku lunaku olwo Daudi yaatya inho Musengwa Katonda, yaakoba ati: “Nnaasobola ntya okutwala Sanduuku ya Musengwa Katonda eno ey'Endagaano ewange?”

¹³ Kale Daudi yaaloba kuganha kutwala Sanduuku ya Musengwa Katonda mu kibuga kye ekyetebwa ekya Daudi. Aye baagonhoka, baagitwala mu ndhu ya Obedi Edomu ow'e Gathi.

¹⁴ Esanduuku ya Katonda eyo yaamala emyezi esatu n'ab'omu ndhu ya Obedi Edomu, era Musengwa Katonda yaagha enkabi Obedi Edomu oyo, n'ab'omu ndhu ye, n'ebintu bye yali nabyo byonabyona.