1 Ebyomubyanda 12 - Baibuli Ekibono kya Katonda 2014

Ab'omu kika kya Benjamini abaasookera irala okutambulanga ni Daudi

¹ Daudi bweyali e Zikulaga ye yalumukira okuwona kyabazinga Saulo mutabane wa Kishi, bano n'abandi ku balwani ab'amaani abaaja y'ali okumweyimbaku okulwana entalo.

² Baali ba mu kika kya Benjamini nga Saulo bweyali, era nga baghanga okukozesa omukono gwonagwona, ka gube omusaadha oba omugooda, okulasa obusaale n'okuwoloba amabaale mu nsuumulo.

³ Ahiezeri n'eyali akulira abalwani abo ate Yoashi yaamwiraku, abo bombi nga batabane ba Shema ow'e Gibea. Amaina ag'abalwani abo ni gano: Yezieli ni Peleti, batabane ba Azimafethi, Beraka, ni Yehu ow'e Anathothi,

⁴ Ishimaia ow'e Gibeoni, omulwani ow'amaani mu bale amakumi asatu era omulala ku bakulembeze baibwe. Yeremia, ni Yahazieli, ni Yohanani, ni Yozabadi ow'e Gedera,

⁵ Eluzai, ni Yerimothi, ni Shemaria, ni Shefatia ow'e Harufu.

⁶ Elukana, ni Issihia, ni Azareli, ni Yoezeri, ni Yashobeamu ow'oku nda ya Kora.

⁷ Yoela ni Zebadia, batabane ba Yerohamu ow'e Gedori.

Ab'omu kika kya Gadi abaatambulanga ni Daudi

⁸ Mu kika kya Gadi mwavaamu abalwani ab'amaani, abaaja okweyimba ku Daudi mu kifo ye yeewogoma mu irungu. Baali n'obumanhirivu mu kulwana entalo, nga bakozesa engabo n'amafumo, nga bamoga bukambwe ng'oti mpologoma era nga basobola okuligita embiro ng'oti n'empuuli edh'oku nsozi.

⁹ Amaina ag'abalwani abo ni gano nga bwe bairaganwangaku mu mase gaibwe: Ezeri nga n'abakulira, kwairaku Obadia, kwairaku Eliabu,

¹⁰ kwairaku Mishimannu, kwairaku Yeremia,

¹¹ kwairaku Attai, kwairaku Elieli,

¹² kwairaku Yohanani, kwairaku Elizabadi,

¹³ kwairaku Yeremia, kwairaku Makubannai.

¹⁴ Abandi ku b'omu kika kya Gadi abo baali bakulu mu igye, ab'eidaala erya ghansi nga bakulira ebikunsu bya bantu kikumi kikumi, ate ab'eidaala erya ghaigulu baakulira ebikunsu bya bantu lukumi lukumi.

¹⁵ Abo n'abaasomoka omwiga Yorudani mu mwezi ogusooka mu mwaka, ekiseera omwiga ogwo kye gwidhuliramu ni gubanda, amaadhi gaagwo ni gataalaalira ku mbali kwagwo kwonakwona. Bwe baasomoka, baabinga abatyamye boonaboona ab'omu biiko, baabasansaaniza e buvandhuba n'ebugwandhuba w'omwiga.

Ab'omu kika kya Benjamini n'ekya Yuda abaatambulanga ni Daudi

¹⁶ Mu kika kya Benjamini n'ekya Yuda mwavaamu abantu baaja okweyimba ku Daudi mu kifo ye yeewogoma.

¹⁷ Daudi yaavaayo okubabona, yaabakoba ati: “Oba nga mwidhie okumbeera nga bakagwa bange, mbasangaaliire. Aye oba nga mwidhie kundyamu lukwe mumpeeyo y'abazigu bange, waire nga ghazira kabi ke mbakoze, Katonda wa badhaadha baife agwananga yaakibona yaababonereza.”

¹⁸ Agho omwoyo gwa Musengwa Katonda gwaidha ku Amasai omukulu wa bale amakumi asatu, yaakoba ati: “Wo Daudi, ife tuli babo wo iwe omwana wa Yesse, ife tuli ku luuyi lwo! Emiraala gibenga n'iwe, era gibenga n'abo abakubeera, kuba Katonda wo n'akubeera.” Agho Daudi yaabasangaaza, yaabafuula bakulu mu igye lye.

Ab'omu kika kya Manasse abaatambulanga ni Daudi

¹⁹ Abandi ku balwani ab'omu kika kya Manasse baira ku luuyi lwa Daudi, bweyali ng'ali kujiira ghalala n'Abafilisiti mu lutalo okulwanisa Saulo. Aye ate Daudi tiyamala n'abeera Bafilisiti abo, kuba abakungu baibwe baamala beeteesaamu, baasalagho okumulobera baamukoba aireyo, nga bakoba: “Tomanha bw'atughaayo eri musengwa we Saulo, ni batutemaku mitwe.”

²⁰ Daudi bweyali ng'airayo e Zikulaga, bano n'ab'omu kika kya Manasse abaira ku luuyi lwe: Adana, Yozabadi, Yediaeli, Mikaeli, Yozabadi, Elihu, ni Zillethai. Abo baalinga baduumizi ba bikunsu bya baisirukale lukumi lukumi mu igye ly'Abamanasse.

²¹ Kale baabeeranga Daudi okulwanisa ebikunsu eby'abanhazi ebyamulumbanga, kuba boonaboona baali balwani ba maani abaziramu ntete.

²² Kumpi nga buli lunaku abantu abayaaka baidha okwingira eigye lya Daudi, lyafuuka eikologho einho ng'oti n'eigye lya Musengwa Katonda mwene.

Ebikunsu by'abaisirukale ba Daudi

²³ Gino n'emighendo gy'abalwani abaidha nga bagemye eby'okulwanisa eri Daudi mu Heburoni okumuyambaku okufuuka kyabazinga mu kifo kya Saulo, nga Musengwa Katonda bweyasuubiza:

²⁴ Ab'omu kika kya Yuda baali kakaaga na lunaana (6,800), nga bagemye engabo n'amafumo, nga beetegeike okulwana olutalo.

²⁵ Ab'omu kika kya Simeoni baali kasanvu na kikumi (7,100), nga balwani ba maani abaziramu ntete.

²⁶ Ab'omu kika kya Levi baali enkumi ina na lukaaga (4,600).

²⁷ Abaidha nga bakulembeirwa Yehoiada mwidhukulu wa Aaroni, baali enkumi isatu na lusanvu (3,700).

²⁸ Abaidha ni Zadoki omwisuka omulwani ow'amaani aziramu ntete, nga bava mu b'endhu ya lata we, baali abakungu amakumi abiri na babiri (22).

²⁹ Ab'omu kika kya Benjamini, baganda ba Saulo, baali enkumi isatu (3,000) mu kiseera ekyo abasinga bungi ku b'omu kika ekyo baali nga bakaagumiire ku b'endhu ya Saulo.

³⁰ Ab'omu kika kya Efuraimu baali emitwalo ebiri na lunaana (20,800), nga balwani ba maani abaziramu ntete, era abamanhifu einho ku nda dha baiseibwe.

³¹ Ab'omu kitundu ku kika kya Manasse baali omutwalo mulala na kanaana (18,000), nga n'abaalondebwa mu butongole okuja okufuula Daudi kyabazinga.

³² Ab'omu kika kya Issakari baali abakulembeze ebikumi bibiri (200) nga bali ghalala ni baganda baibwe abagondera ebiragiro byaibwe boonaboona. Abakulembeze abo baali bantu abaategeera ng'ebiseera ebyo bwe byali, ni bamanha Isiraeli ky'egwaniire okukola.

³³ Ab'omu kika kya Zebuluni baali emitwalo etaanu (50,000), nga beesigwa era nga bamalirivu, abaatendekebwa okukozesa buli kya kulwanisa kyonakyona.

³⁴ Ab'omu kika kya Nafutali baali abaduumizi lukumi (1,000), nga bali ghalala n'abalwani baibwe emitwalo esatu na kasanvu (37,000) nga bagemye engabo n'amafumo.

³⁵ Ab'omu kika kya Dani baali abalwani emitwalo ebiri na kanaana na lukaaga (28,600), nga batendekeibwa bukalamu okulwana olutalo.

³⁶ Ab'omu kika kya Asheri baali emitwalo ena (40,000), nga beetegefu mu kulwana entalo.

³⁷ Ab'omu bika eby'e buvandhuba wa Yorudani: ekya Reubeni, n'ekya Gadi, n'ekitundu ku kika kya Manasse, baali emitwalo ikumi n'ebiri (120,000), nga bali n'eby'okulwanisa ebya buli nsambo.

³⁸ Abaisirukale abo boonaboona abaali batendekeibwa mu kulwana, baaja e Heburoni nga bamalirivu okufuula Daudi kyabazinga wa Isiraeli yoonayoona. Abaisiraeli abandi boona baali bamalirivu mu nsambo n'endala eyo, okufuula Daudi kyabazinga.

³⁹ Baamalayo enaku isatu nga bali eyo ni Daudi, nga bali kulya era nga bali kunhwa ebyo ab'eighanga lyaibwe bye baabategekera.

⁴⁰ Abantu baaviira irala ghala mu bika: ekya Issakari, n'ekya Zebuluni, n'ekya Nafutali, baaleetera emere ku ndogoyi, ni ku ngamiya, ni ku nhumbu ni ku nte, nga n'omuli: obuwunga obuseereibwa obukalamu, ebitole eby'ebibala ebikalu eby'emitiini, obufaaganda obw'emizabbibu emikalu, omwenge ogw'emizabbibu, n'omuzigo ogw'ebibala eby'emiti emyoliva. Baaleeta n'ente, n'entaama kamaala edh'okwita okulya, kuba mu Isiraeli mwonamwona mwalimu eisanhu.