1 Ebyomubyanda 11 - Baibuli Ekibono kya Katonda 2014

Daudi afuuka Kyabazinga wa Isiraeli ni Buyudaaya

¹ Agho Abaisiraeli boonaboona beesoloza, baidha ye Daudi e Heburoni, baamukoba bati: “Bona eno, ife tuli baluganda era ba musaayi mulala n'iwe.

² Mu biseera ebyabita nga Saulo n'akaali kyabazinga waife, niiwe owakulemberangamu eigye lya Isiraeli okuja mu ntalo. Agho Musengwa Katonda wo yaakukoba ati, ‘Oidha kukulemberanga abantu bange Abaisiraeli, obenga mufuzi waibwe.’ ”

³ Kale abakulembeze mu Isiraeli baidha ye kyabazinga Daudi e Heburoni. Daudi oyo yaakola nabo endagaano mu maiso ga Musengwa Katonda, baamusiiga omuzigo okumufuula kyabazinga wa Isiraeli, nga Musengwa Katonda bwe yakoba ng'abita mu Samueli.

⁴ Agho Daudi n'Abaisiraeli boonaboona baaja, baalumba Yerusalemu. Mu biseera ebyo baali bakyeta Yebusi, ng'Abayebusi abatyamye b'omu nsi eyo n'abakibaamu.

⁵ Abayebusi abo baakoba Daudi bati: “Toidha kungira ghano.” Aye ate Daudi yaagema ekifo kyaibwe eky'okwewogomamu eky'e Sioni, ekyo kyatuuka okwetebwa “Ekibuga kya Daudi”.

⁶ Daudi yaakoba abasaadha be ati: “Omuntu yeenayeena anaasooka okwitayo Omuyebusi, n'aidha okuba omukulu era omuduumizi w'eigye.” Agho Yoabu, nga inhina ni Zeruia, yaakulembera okulumba okwasooka, era yaafuuka omukulu w'eigye.

⁷ Agho Daudi yaaja yaaba mu kifo ekyo eky'okwewogomamu, kyebaava ni bakituuma eriina “Ekibuga kya Daudi”.

⁸ Yaazimba ku kifo ekyo ekibuga okukyezunguluza, ng'aviira mu kifo kye baidhuzaamu eitaka olw'okwekuuma abazigu, ekyayetebwanga Millo, yaaja ng'aira munda. Ate Yoabu yaazimba buyaaka ebitundu ebindi eby'ekibuga ekyo.

⁹ Daudi oyo yaajanga nga yeeyongera okuba omukologho, kuba Musengwa Katonda Afuga Amagye yali ali naye.

Abalwani ba Daudi ab'amaani

¹⁰ Bano n'abaali abalwani ab'amaani abakologho Daudi be yali nabo. Abo nga bali ghalala n'Abaisiraeli boonaboona baamuleetera okufuuka kyabazinga nga Musengwa Katonda bweyasuubiza eighanga Isiraeli, era baaleetera obwakyabazinga bwe okukakata.

¹¹ Amaina ag'abalwani ab'amaani abo Daudi be yali nabo ni gano: Asooka nga ni Yashobeamu Omuhakimoni eyali nga n'akulira abasatu abo ab'amaani. Ono ghaligho omukuzi gwe yalwanisa eifumo lye n'abalwani ebikumi ebisatu, yaabaita boonaboona.

¹² Owokubiri ku basatu abo ab'amaani nga ni Eleazari mutabane wa Dodo Omuahohi.

¹³ Oyo n'eyali ni Daudi e Pasi Dammimu, Abafilisiti ye baali beesololeiza okubalwanisa mu lutalo, mu musiri ogwalimu sayiri, Abaisiraeli abandi ni bamala balumuka.

¹⁴ Aye mwene ng'ali ghalala n'abalwani be, baayemerera ghagati mu musiri baalwanisa Abafilisiti era baabaita. Musengwa Katonda yaabagha obughanguzi obw'amaani.

¹⁵ Lwali lulala, abasatu ku balwani amakumi asatu abaakuliranga banaibwe mu igye, baaja ku lubaale Daudi ye yali kumpi n'empuku ey'e Adullamu. Ekikunsu eky'Abafilisiti kyali kisimbye weema dhaakyo mu kiiko eky'e Refa.

¹⁶ Mu kiseera ekyo Daudi yali mu kifo eky'okwewogomamu, ate ekikunsu eky'Abafilisiti nga kisimbye enkambi yaakyo e Bethelehemu.

¹⁷ Omwoyo gwadhuuba Daudi oyo, yaakoba ati: “Kale nguli ghaligho omuntu andeeteraku amaadhi ag'okunhwa agava mu nsulo eri ku mulyango ogw'ekibuga e Bethelehemu!”

¹⁸ Agho abalwani bale abasatu ab'amaani baaja baaghaguza mu kifo Abafilisiti ghe baasimba weema dhaibwe, baasena amaadhi mu nsulo eyo, baagaleetera Daudi. Aye yaaloba kuganhwaku naire, yaagafukira Musengwa Katonda

¹⁹ ng'akoba ati: “Wo Musengwa Katonda, tikiribaagho nze okukola ekintu ng'oti n'ekyo. Olwo mba ng'ali kunhwa omusaayi ogw'abasaadha bano abaghaireyo obulamu bwaibwe ni baja okuganona!” Kale yaaloba kuganhwa. Ebyo n'ebikolwa abalwani abo abasatu ab'amaani bye baakola nga baziramu ntete naire.

²⁰ Abishai muganda wa Yoabu, n'eyali akulira abalwani amakumi asatu ab'amaani. Abishai oyo yaalwanisa abantu ebikumi bisatu n'eifumo lye, yaabaita, yeekolera eriina mu balwani amakumi asatu abo.

²¹ Oyo n'eyasinga okumanhikana einho mu abo amakumi asatu, era yaafuuka muduumizi waibwe. Aye ti yatuuka ku idaala lya bale abasatu.

²² Benaia ow'e Kabuzeeli era mutabane wa Yehoiada, yali mulwani wa ntalo aziramu ntete. Yakola eby'amaani kamaala, nga n'omuli n'okwita abalwani ab'amaani ababiri Abamoabu. Olundi yaita empologoma ng'eri mu kiina, mu biseera eby'omugozi nga gugwire.

²³ Era yaita Omumisiri nga wa kighaga eyali abisa mu mita eibiri mu buleeyi, ate ng'agemye eifumo mu ngalo eririku olunhago olwaga n'ekiti kye balukisa engoye. Benaia oyo yaamulumba nga mwene ali na mwigo bwigo, yaamuswankulaku eifumo mu ngalo, yaamwitisa lyene eryo.

²⁴ Ebyo n'eby'amaani Benaia mutabane wa Yehoiada bye yakola, ni yeekolera eriina mu abo amakumi asatu ab'amaani.

²⁵ Benaia oyo yamanhikana inho mu abo amakumi asatu, aye tiyatuuka ku idaala lya bale abasatu. Daudi yaamutaagho okukuliranga abaisirukale be abaamukuumanga.

²⁶ Amaina ag'abalwani abandi ab'amaani ni gano: Asaheli muganda wa Yoabu, Elihanani mutabane wa Dodo ow'e Bethelehemu,

²⁷ Shammothi ow'e Harodi, Helezi ow'e Peloni,

²⁸ Ira mutabane wa Ikkeshi ow'e Tekoa, Abiezeri ow'e Anathothi,

²⁹ Sibbekai ow'e Husha, Ilai Omuahohi,

³⁰ Maharai ow'e Netofa, Heledi mutabane wa Baana ow'e Netofa,

³¹ Ithai mutabane wa Ribai ow'e Gibea eky'Ababenjamini, Benaia ow'e Pirathoni,

³² Hurai ow'oku bwiga obw'e Gaashi, Abieli ow'e Araba,

³³ Azimavethi ow'e Baharumu, Eliahaba ow'e Shaaluboni,

³⁴ Batabane ba Hashemu ow'e Gizomu, Yonathani mutabane wa Shagee ow'e Harari,

³⁵ Ahiamu mutabane wa Sakari Omuharari, Elifali mutabane wa Uri,

³⁶ Heferi ow'e Mekera, Ahiya ow'e Peloni,

³⁷ Heziro ow'e Karumeli, Naarai mutabane wa Ezibai,

³⁸ Yoeli muganda wa Nathani, Mibuhari mutabane wa Hagari,

³⁹ Zeleka Omuammoni, Naharai ow'e Beerothi eyagemeranga Yoabu mutabane wa Zeruia eby'okulwanisa bye.

⁴⁰ Ira Omuithiri, Garebu Omuithiri,

⁴¹ Uria Omuhitti, Zabadi mutabane wa Ahalai,

⁴² Adina mutabane wa Shiza Omureubeni era omukulembeze mu kika kya Reubeni, n'ekikunsu kye eky'abalwani amakumi asatu.

⁴³ Hanani mutabane wa Maaka, Yoshafati ow'e Mithani,

⁴⁴ Uzzia ow'e Ashitera, Shama ni Yeiyeli batabane ba Hothamu ow'e Aroeri,

⁴⁵ Yediaeli ni Yoha batabane ba Shimuri ow'e Tizi,

⁴⁶ Elieli ow'e Mahava, Yeribai ni Yoshavia batabane ba Elinaamu, Ithima ow'e Moabu,

⁴⁷ Elieli, ni Obedi, ni Yaasieli ow'e Zoba.