1 Ebyomubyanda 10 - Baibuli Ekibono kya Katonda 2014

Kyabazinga Saulo afa

¹ Agho Abafilisiti baalwanisa Abaisiraeli. Abaisiraeli abo baalumuka, era kamaala baitirwa ku lusozi Giliboa.

² Abafilisiti baabingirira Saulo ni batabane be baabatuukaku, baita Yonathani, ni Abinadabu, ni Malakishua, batabane ba Saulo.

³ Olutalo lwanhigiriza inho Saulo, ab'obulaso baamwagaana baamulasa, baamutaaku ebibwa ebinene einho.

⁴ Agho Saulo yaakoba eyamugemeranga eby'okulwanisa ati: “Sowolayo empiima yo onfumite, abo abatali bakekete balobe kwidha kunfumita na kuneesanhukizaaku.” Aye eyamugemeranga eby'okulwanisa yaaloba kumufumita olw'okutya einho. Kale Saulo mwene yaasowolayo empiima eyiye, yaagyetungaku.

⁵ Ole eyagemeranga Saulo eby'okulwanisa bwe yabona nga Saulo afiire, yeena yeetunga ku mpiima eyiye, yaafiira ghalala naye.

⁶ Kale atyo Saulo yaafa, ni batabane bonsatule, n'ole eyamugemeranga eby'okulwanisa, era n'ab'endhu ya Saulo oyo boonaboona. Abo boonaboona baafiira ghalala.

⁷ Abaisiraeli abaali mu kiiko bwe baabona ng'eigye lya Isiraeli lirumwike era nga Saulo ni batabane be bafiire, baalekulira agho ebibuga byaibwe, baalumuka. Abafilisiti baidha baabibaamu.

⁸ Enkyo ku lunaku olwairirira ng'olutalo luwoire, Abafilisiti bwe baidha ku mirambo okugitoolamu ebivaalo, baayagaana nga Saulo ni batabane be abasatu nga baagwire ku lusozi Giliboa.

⁹ Saulo baamuvaalulula eby'okulwanisa bye era baamutemaku omutwe baagutwala. Agho baatuma abakwenda woonawoona mu nsi y'Abafilisiti okutuusaayo amawulire ago, mu masabo ag'ebisinzibwa byaibwe ebitali Katonda era ni mu bantu boonaboona.

¹⁰ Baata eby'okulwanisa bya Saulo mu isabo ly'emisambwa gyaibwe, era baakomerera omutwe mu isabo ly'omusambwa Dagoni.

¹¹ Abatyamye boonaboona ab'omu kibuga Yabeshi e Gileadi bwe baawulira ekyo Abafilisiti kye baakola Saulo,

¹² abasaadha abaziramu ntete boonaboona baasituka, baaja baatoolayo omulambo gwa Saulo n'emirambo gya batabane be, baagireeta e Yabeshi. Baaziika amagumba gaibwe eyo e Yabeshi ghansi gh'omuti omukologho, era baasiiba okumala enaku musanvu.

¹³ Kale Saulo yaafa atyo, olw'obutaba mwesigwa eri Musengwa Katonda. Yaloba okukola ebyo Musengwa Katonda bye yamulagira, yaira mu kweraguza ku basamize,

¹⁴ mu kifo eky'okwebuuza ku Musengwa Katonda. Musengwa Katonda oyo kyeyava n'amwita, obwakyabazinga yaabugha Daudi mutabane wa Yesse.