1 Bakyabazinga 9 - Baibuli Ekibono kya Katonda 2014

Katonda airamu okubonekera Solomoni kabiri

¹ Solomoni bwe yamala okuzimba eisinzizo n'ekisaagaati kye eky'obwakyabazinga, era n'okumaliriza byonabyona bye yayenda okuzimba,

² Musengwa Katonda yaamubonekera omukuzi ogwokubiri, nga bwe yamubonekera e Gibeoni.

³ Yaamukoba ati: “Mpuliire by'onsabye ng'oneeghemba agho mu maiso gange. Ntukwiza eisinzizo lino ly'onzimbiire, libe ery'okunsinzizangamu enaku dhoonadhoona. Ndidha kulikuumanga obutatemya enaku dhoonadhoona.

⁴ Weena bw'onaajiiranga ku bye nkoba, n'oba omwesigwa era omwesimbu nga lata wo Daudi bwe yakolanga, n'ogonderanga biragiro byange era n'ogemanga amateeka gange,

⁵ ndireetera obwakyabazinga bwo okusigalagho nga bugumu ebyanda n'ebyanda, nga bwe nasuubiza lata wo Daudi nti, ‘Mu b'eizaire lyo toobulengamu muntu atyama ku kityamo kya bwakyabazinga bwa Isiraeli.’

⁶ Aye iwe oba baidhukulu bo, bwe mulinvaaku ni mudheemera amateeka n'ebiragiro byange bye mbaghaire, ate ni mwira ku kugheereza n'okusinza bakatonda abandi,

⁷ olwo nditoola Abaisiraeli mu nsi ye mbaghaire, era naalekulira agho eisinzizo lino lye ntukwiza okunsinzizangamu. Isiraeli erifuuka eky'okwogeraku era yaafuuka enseko dh'abalamu mu maghanga goonagoona.

⁸ Eisinzizo lino lirifuuka mmungo ya bimunku, era kiisi baliribitangaku balitengeesanga bwa mitwe beewuunhia. Era balibuuzanga bati, ‘Lwaki Musengwa Katonda yakola atyo ensi eno n'eisinzizo lino?’

⁹ Olwo abantu baliirangamu bati, ‘Lwa kuba baava ku Musengwa Katonda waibwe, eyatoola badhaadha baibwe mu nsi Misiri, ate baira ku kugheereza n'okusinza bakatonda abandi. Musengwa Katonda kyaviire n'abatuusa ku kabi akaaga agho.’ ”

Endagaano ya Solomoni ni Hiramu

¹⁰ Agho emyaka amakumi abiri Solomoni gye yazimbiramu ebizimbe byombi, eisinzizo n'ekisaagaati kye eky'obwakyabazinga, bwe gyawaaku,

¹¹ kyabazinga Solomoni oyo yaagha kyabazinga Hiramu ebibuga amakumi abiri mu kiketezo ky'e Galilaaya. Hiramu oyo, kyabazinga w'e Tiro, n'eyaleeteranga Solomoni ebintu byonabyona bye yeetaaganga okuzimbisa: emivule, emiti emisipuressi, ni zaabu.

¹² Aye Hiramu oyo bwe yaja okulambuula ebibuga Solomoni bye yamugha, yaaloba kubisiima.

¹³ Kyeyava n'akoba Solomoni ati: “Bibuga ki bino by'ompaire, muganda wange?” Okuva n'olwo, ebibuga ebyo byayetebwa Kabuli ni ye buli eno.

¹⁴ Hiramu oyo, zaabu ye yagheereza kyabazinga Solomoni, yagheramu kilo ng'oti enkumi ina (4,000).

Ebirungi ebindi Solomoni bye yakola

¹⁵ Bino n'ebintu kyabazinga Solomoni bye yakola ng'akozesa abantu be yakakanga obukake: Yazimba eisinzizo n'ekisaagaati kye eky'obwakyabazinga; yaazimba ekifo kye baidhuzaamu eitaka ekyetebwa Millo; yaazimba ekimante ku kibuga Yerusalemu okukyezunguluza; yaazimba n'ebibuga, Hazori, Megiddo ni Gezeri.

¹⁶ Kyabazinga w'e Misiri yali yalumba Gezeri ekyo yaakigema, yaakyokya omuliro, yaita Abakanaani abaakirimu, yaakigha mughala we ng'ekirabo, bwe yabayira Solomoni.

¹⁷ Kale Solomoni yaakizimba buyaaka. Era yaakozesa abaakakibwanga okukola emirimo, yaazimba ni Bethi Horoni eky'Eifo,

¹⁸ ni Baalathi, ni Tamari mu irungu ery'e Buyudaaya,

¹⁹ n'ebibuga bye ebyalimu amaterekero, n'ebibuga mwe yakuumiranga ebigaali bye eby'omu lutalo, n'ebibuga by'abasaadha be abavuzi b'embalaasi, n'ebindi byonabyona Solomoni bye yayenda okuzimba mu Yerusalemu ni mu Lebanoni, n'aghandi woonawoona mu biketezo bye yali afuga.

²⁰ Ghaaligho abantu abaawonagho abataali Baisiraeli, nga n'omuli Abamori, Abahitti, Abaperizzi, Abahivi, n'Abayebusi abaali mu nsi Kanaani.

²¹ Abaidhukulu b'abantu abo, Abaisiraeli be bataaghanga kuzikiriza, Solomoni be yakozesanga emirimo egy'olukako egy'obwiru. Era abo n'abakaagikola ni ye buli eno.

²² Aye ghazira muntu waire omulala ati ku Baisiraeli, Solomoni ye yafuulaku mwiru. Baabanga baisirukale be, na bakungu be, na baduumizi be ba magye, na bakulu be mu magye, na bavuzi be ba bigaali bya mu lutalo, na bavuzi be ba mbalaasi.

²³ Ghaaligho abakulembeze abakologho ebikumi bitaanu n'ataanu (550), abaakuliranga abantu abaakolanga emirimo gya Solomoni.

²⁴ Mughala wa kyabazinga w'e Misiri bwe yamala okuva mu kyetebwa Ekibuga kya Daudi n'aira mu kisaagaati ekikye ku bubwe Solomoni kye yamuzimbira, agho Solomoni yaazimba ekifo kye baidhuzaamu eitaka ekyetebwa Millo.

²⁵ Emikuzi esatu buli mwaka, Solomoni yaaghangayo ku alutaari ye yazimbira Musengwa Katonda, ebigheebwayo ebyokebwa n'ebigheebwayo olw'okutabagana. Era yaaniokezanga obubbaani mu maiso ga Musengwa Katonda. Kale yaamaliriza eisinzizo.

²⁶ Kyabazinga Solomoni yaazimba olugololiro olw'amaato mu Ezionigeberi ekiriiraine Elothi, ku mbali kw'Enhandha Emyufu, mu nsi Edomu.

²⁷ Kyabazinga Hiramu yaasindika ku bagheereza be n'amaato, abaali n'obumanhi ku by'oku nhandha, baajiira mu maato ago ghalala n'abagheereza ba Solomoni.

²⁸ Baaja mu nsi Ofiri, baatoolayo zaabu agheza kilo ng'oti enkumi ina (4,000), baamuleetera kyabazinga Solomoni.