1 Bakyabazinga 6 - Baibuli Ekibono kya Katonda 2014

Solomoni azimba eisinzizo

¹ Mu mwaka ogwebikumi ebina n'ekinaana (480) ng'Abaisiraeli bamaze okuva mu nsi Misiri, mu mwaka ogwokuna okuva Solomoni lwe yatoolera okufuga Isiraeli, mu mwezi ogwetebwa Zivu, ogwo nga n'omwezi ogwokubiri mu mwaka, Solomoni oyo yainhama okuzimba eisinzizo lya Musengwa Katonda.

² Eisinzizo kyabazinga Solomoni oyo lye yazimbira Musengwa Katonda lyali mita amakumi abiri na musanvu mu buleeyi, mita mwenda mu bugazi, era lyaba mita ikumi na isatu na kitundu mu bugungumavu.

³ Baalizimbaku ekisasi emberi waalyo nga kya bugazi bwa mita ina n'ekitundu, ate nga mu buleeyi kya mita mwenda, okwagayaga n'obuleeyi bw'eisinzizo eryo.

⁴ Eisinzizo eryo yalitaaku amadinisa ag'emyango egyaja nga gifundaghala okwira kuliya.

⁵ Yaalizimbaku ekizimbe kya kalina isatu ekyakookerwaku okwezungulula ebimante eby'okuliya kwalyo, mu mbali n'einhuma.

⁶ Buli kisenge mu kalina eya ghansi, kyali mita ibiri n'obutundu bubiri mu bugazi. Mu kalina eyokubiri, buli kisenge kyali mita ibiri n'obutundu musanvu mu bugazi. Ate mu kalina eyokusatu, buli kisenge kyali mita isatu n'akatundu kalala mu bugazi. Ekimante ky'eisinzizo ku buli kalina gh'etandiikira kyajanga nga kitonigha mu bunene bwakyo, okusinga ku kalina eri ghansi, olwo ebisenge ebyo byasobola okwesigama ku kimante ekyo, aye nga emiti gyabyo tibagizimbiire ku kyo.

⁷ Eisinzizo bwe baali balizimba, amabaale ge baazimbisa baagabaadhiranga mu kifo ghe bagasima. Olwo kyaba nti tighaali nhundo, waire empasa, oba ekintu ekindi kyonakyona eky'ekyuma ekigumu einho ekyawulirwa mu isinzizo nga balizimba.

⁸ Omulyango ogwingira mu kisenge ekya kalina ekya ghansi, gwali ku luuyi olw'omukono omusaadha olw'e buvandhuba w'eisinzizo. Era nga ghaligho amadaala ge baniiniraku okuja mu kisenge eky'omu kalina eyokubiri n'eky'omu yokusatu.

⁹ Mu nsambo eyo, kyabazinga Solomoni yaazimba eisinzizo era yaalimaliriza. Yaalitaamu olubani olw'emyango n'embaawo, nga bya muvule.

¹⁰ Yaazimba ekizimbe kya kalina ekyo okwezungulula eisinzizo eryo, nga buli kalina egheza mita ibiri n'obutundu bubiri mu buleeyi okuja ghaigulu. Era nga kalina edho dhiyungiibwa ku isinzizo n'embaawo edh'omuvule.

¹¹ Agho Musengwa Katonda yaakoba Solomoni ati:

¹² “Kino kigema ku isinzizo lino ly'oli kuzimba: bw'onaajiiranga ku mateeka gange, n'ogonderanga ebiragiro byange, era n'ogemanga ebyo bye nkoba, ndituukiriza kye nasuubiza lata wo Daudi okumukolera.

¹³ Ndidha kubanga ghalala n'abantu bange Abaisiraeli era tiibalekulirenga agho.”

¹⁴ Kale Solomoni yaazimba eisinzizo, yaalimaliriza.

Ebyali munda mu isinzizo

¹⁵ Munda mu isinzizo ku bimante kwonakwona, okuva ghansi okutuuka ku lubani, yaghembaku embaawo edh'emivule. Ate ghansi woonawoona yaayaliiragho embaawo edh'emiti emisipuressi.

¹⁶ Einhuma munda mu isinzizo, yaazimbayo ekisenge eky'embaawo edh'emivule nga dhiva ghansi dhaatuuka ku lubani. Mu nsambo eyo yaayawula ku isinzizo ekifo kya mita mwenda, ekyo nga n'Ekifo Ekitukuvu Einho.

¹⁷ Ekitundu eky'eisinzizo eryo ekyali emberi y'Ekifo Ekitukuvu Einho, kyali kigheza mita ikumi na munaana obuleeyi.

¹⁸ Embaawo dhe baaghemba ku bimante by'eisinzizo, dhaali nga dhitoneibwaku ebifaananie by'amabuga, n'ebimuli ebyandhulwiza. Munda mwonamwona, ebimante baabighembaku embaawo edh'emivule, ng'amabaale ge baazimbisa tigaboneka.

¹⁹ Munda mu isinzizo omwo, yaategekamu aghantu agheetebwa Ekifo Ekitukuvu, okutangamu Esanduuku ey'Endagaano ya Musengwa Katonda.

²⁰ Ekifo ekyo Ekitukuvu kyali mita mwenda mu buleeyi, mita mwenda mu bugazi, n'emita mwenda mu bugungumavu, era yaalimbya zaabu omukenenule munda mwakyo mwonamwona. Era yaakola alutaari mu mbaawo edh'emivule.

²¹ Yaalimbya zaabu omukenenule munda mw'eisinzizo mwonamwona. Yaata endhegere edha zaabu aghaingirirwa mu Kifo Ekitukuvu Einho, nga dhoona adhirimbiizaaku zaabu.

²² Eisinzizo lyonalyona yaalirimbyaku zaabu okulibunia. Ni alutaari ey'omu Kifo Ekitukuvu yoona yaagirimbyaku zaabu.

²³ Mu Kifo Ekitukuvu Einho yaakolerayo ebifaananie eby'ebitonde bibiri ebiri n'amaghagha ebyetebwa kerubi. Yaabikola mu miti emyoliva, nga buli kifaananie kigheza mita ina n'obutundu buna mu bugungumavu.

²⁴ Eighagha eirala erya kerubi lyali ligheza mita ibiri n'obutundu bubiri mu buleeyi. Okuva ku ghasembayo ku ighagha eirala, okutuuka ku ghasembayo ku lindi, nga ghaligho obuleeyi bwa mita ina n'obutundu buna.

²⁵ Ni kikerubi kire ekindi kyali kigheza mita ina n'obutundu buna mu bugungumavu. Bikerubi ebyo byombi byali byagayaga era nga bifaanana.

²⁶ Kikerubi ekindi kyali kigheza mita ina n'obutundu buna mu bugungumavu, era nga ni kiinaakyo kityo bwe kyaga.

²⁷ Bikerubi ebyo yaabita ghagati mu Kifo Ekitukuvu Einho. Amaghagha gaabyo gaakolebwa nga mandhuluze, ng'eighagha ery'ekindi lituuka ku kimante eky'oluuyi olundi, n'ery'ekindi lyatuuka ku kimante eky'oluuyi olundi. Ate amaghagha gaabyo agandi nga gagemaganira ghagati gh'Ekifo Ekitukuvu Einho.

²⁸ Era bikerubi ebyo byombi yaabirimbyaku zaabu yaabibunia.

²⁹ Yaadholiga ku bimante eby'omu Kifo Ekitukuvu Einho n'eby'omu isinzizo lyonalyona, ng'atonaku ebifaananie ebya bikerubi, n'eby'emiti eminaazi, n'eby'ebimuli ebyandhulwiza.

³⁰ Ghansi mu Kifo Ekitukuvu Einho ni mu isinzizo lyonalyona, yaalimbyagho zaabu woonawoona.

³¹ Mu mulyango ogwingira mu Kifo Ekitukuvu Einho, yaaghangamu olwigi olw'omuti omwoliva nga lulimu ebitundu bibiri ebiigulwa ku luuyi ni ku luuyi. Emyango gyalwo, egy'omu mbali gyombi, ogwa ghansi n'ogwa ghaigulu ogwalimu ensonda esonse ghaigulu, nga woonawoona gikola ensonda itaanu.

³² Ebitundu by'olwigi olwo byombi yaabidholiga, ng'atonaku ebifaananie ebya bikerubi, n'eby'emiti eminaazi, n'eby'ebimuli ebyandhulwiza. Ebitundu eby'olwigi ebyo byombi, n'ebifaananie bya bikerubi, n'eby'emiti eminaazi, n'eby'ebimuli ebyandhulwiza, yaabirimbyaku zaabu.

³³ Era yaakola emyango egy'omulyango ogwingira mu isinzizo, nga gyonagyona gyagayaga mu buleeyi.

³⁴ Mu mulyango ogwo yaakoleramu endhigi ibiri edh'omuti omusipuressi, nga buli lulala lulimu pata ghagati, nga lughanga okwigukaku ekitundu.

³⁵ Yaadhitonaku ebifaananie ebya bikerubi, n'eby'emiti eminaazi, n'eby'ebimuli ebyandhulwiza. Era yaadhirimbyaku zaabu bukalamu ghalala n'ebifaananie ebyo bye yadhitonaku.

³⁶ Yaazimba oluya olw'omunda nga lwa myaliiro esatu egy'amabaale, n'omwaliiro mulala ogw'emiti emivule.

³⁷ Omusingi gw'eisinzizo eryo gwazimbibwa mu mwezi ogwokubiri ogwetebwa Zivu, mu mwaka ogwokuna ogw'obufuzi bwa Solomoni.

³⁸ Mu mwezi ogwomunaana ogwetebwa Buli, mu mwaka ogweikumi n'omulala ogw'obufuzi bwa Solomoni, eisinzizo eryo lyonalyona lyawa okuzimbibwa, ng'entegeka yaalyo bweyali. Solomoni lyamutwalira emyaka musanvu okulizimba.