1 Bakyabazinga 5 - Baibuli Ekibono kya Katonda 2014

Solomoni ategeka okuzimba eisinzizo

¹ Agho kyabazinga Hiramu ow'e Tiro yaawulira nga Solomoni asiigiibwa omuzigo, okusikira lata we ku bwakyabazinga. Kale yaasindika abagheereza be ye Solomoni, kuba Hiramu oyo yali mukagwa wa Daudi okuva eira.

² Solomoni yaasindika obukwenda ye Hiramu ng'akoba ati:

³ “Oidhi nga lata wange, olw'entalo dhe yali n'okulwana n'ensi dh'abazigu edhaali dhimwezungulwire ku ndhuyi dhoonadhoona, tiyaghanga kuzimbira Musengwa Katonda we isinzizo, okutuusa Musengwa Katonda oyo bwe yamusobozesa okughangula abazigu be boonaboona.

⁴ Aye mpegaano Musengwa Katonda wange ampaire emiraala. Ku ndhuyi dhoonadhoona, ezira muzigu waire akabi koonakoona.

⁵ Kale kye nviire ni nsalagho okuzimbira Musengwa Katonda wange eisinzizo, nga Musengwa Katonda oyo bwe yakoba lata wange Daudi ati, ‘Mutabane wo, ye ndita ku kityamo eky'obwakyabazinga okukusikira, n'alinzimbira eisinzizo.’

⁶ Kale, mpegaano lagira bantemere emivule e Lebanoni. Abagheereza bange baidha kukolera ghalala n'ababo. Era ndidha kukusasula empeera y'onaayenda olw'abagheereza bo abo. Nga bw'oidhi obukalamu, eno ewaife ezira baidhi kutema miti ng'oti n'Abasidoni bwe batema.”

⁷ Hiramu bwe yafuna obukwenda bwa Solomoni, yaasagamba inho, era yaakoba ati: “Musengwa Katonda olwaleero asaakibwe, eyagha Daudi omwana ow'amagezi okufuga eighanga lino eikologho.”

⁸ Agho Hiramu yaagheereza Solomoni obukwenda ati: “Nfunie obukwenda bwo. Era ebigema ku miti emivule n'emisipuressi, ndi mwetegefu okubikola byonabyona nga bw'oyenda.

⁹ Abagheereza bange baidha kugitoola e Lebanoni, bagiserengese ku nhandha. Ndidha kubalagira bagisibe ghalala mu binhwa, bagibise ku nhandha gituuke mu kifo ky'onaalondagho. Era ndidha kubalagira bagisimululire eyo, memale ogitooleyo. Iwe kye nhenda okole, n'okufunira ab'endhu yange emere.”

¹⁰ Kale Hiramu yaagha Solomoni emiti gyonagyona, emivule n'emisipuressi gye yayenda.

¹¹ Era buli mwaka Solomoni yeena yaaghanga Hiramu kilo dh'engaano edhigheza obukaire bubiri n'emitwalo amakumi ana (2,400,000), n'omuzigo ogw'ebibala eby'emiti emyoliva omukenenule, ogugheza lita enkumi eina (4,000). Ebyo byonabyona nga byakuliisa ab'endhu ya Hiramu.

¹² Musengwa Katonda yaagha Solomoni amagezi nga bwe yasuubiza. Ghaabaagho emiraala ghagati gha Hiramu ni Solomoni, era baakola endagaano ghagati waibwe bombi.

¹³ Agho kyabazinga Solomoni yaalagira baasoloza mu Isiraeli yoonayoona abasaadha emitwalo esatu (30,000) ab'okukolanga emirimo egy'olukako.

¹⁴ Yaasindikanga e Lebanoni abasaadha omutwalo mulala mulala (10,000) buli mwezi, mu ngobo. Baamalanga omwezi mulala e Lebanoni, ate bairanga baamalanga emyezi ebiri ewaibwe eka. Adoniramu n'eyateebwagho okukuliranga abo abaasolozebwa.

¹⁵ Solomoni era yali n'abasaadha emitwalo musanvu (70,000) abeetwisi, n'abandi emitwalo munaana (80,000) abaabaadhanga amabaale mu kiketezo eky'oku nsozi,

¹⁶ nga tobaliireeku abasaadha enkumi eisatu n'ebisatu (3,300) abaakozesanga abantu emirimo.

¹⁷ Kyabazinga yaalagira, baasima amabaale amakologho ag'omughendo, ag'okuzimbisa omusingi gw'eisinzizo.

¹⁸ Kale abazimbi aba Solomoni, n'aba Hiramu, n'abasaadha abaava e Gebali, baabaadha amabaale era baatema emiti, baabitegeka okuzimbisa eisinzizo.