1 Bakyabazinga 4 - Baibuli Ekibono kya Katonda 2014

Abakungu ba Solomoni

¹ Kyabazinga Solomoni yali kyabazinga wa Isiraeli yoonayoona,

² era bano n'abakungu ab'oku ntwiko: Azaria mutabane wa Zadoki, n'eyali kabona.

³ Elihorefu ni Ahiya nga bombi batabane ba Shisha, n'abaali abaghandiisi. Yehoshafati mutabane wa Ahiludi, n'eyali omukuumi w'ebighandiiko.

⁴ Benaia mutabane wa Yehoiada, n'eyali omuduumizi w'eigye. Zadoki ni Abiathari baali bakabona.

⁵ Azaria mutabane wa Nathani n'eyali akulira abakungu. Zabudi mutabane wa Nathani, yali kabona era nga mukagwa wa kyabazinga.

⁶ Ahishari n'eyali alabirira ekisaagaati kya kyabazinga. Adoniramu mutabane wa Abuda, n'eyali akozesa abo abaakolanga emirimo egy'olukako.

⁷ Solomoni yali n'abakungu ikumi na babiri mu Isiraeli mwonamwona, abaaleeteranga kyabazinga n'ab'omu ndhu ye eby'okulya. Buli muntu ku abo ng'ali n'okuleeta eby'okulya bya mwezi mulala buli mwaka.

⁸ Gano n'amaina gaibwe: Benihuri nga n'alabirira ekiketezo eky'oku nsozi ekya Efuraimu;

⁹ Benidekeri yaalabirira ebibuga Makazi, Shaalabimu, Bethishemeshi, Eloni ni Bethi Hanani;

¹⁰ Benihesedi yaalabirira ebibuga Arubbothi, era ng'oyo ni mwene kibuga Soko ghalala n'ekiketezo kyonakyona eky'e Heferi;

¹¹ Benabinadabu yaalabirira ekiketezo kyonakyona eky'e Nafathidori, era ng'oyo n'eyabayiza Tafathi mughala wa Solomoni;

¹² Baana mutabane wa Ahiludi yaalabirira ebibuga Taanaki ni Megiddo, ghalala n'ekiketezo kyonakyona eky'e Bethi Sheani ekiriiraine ekibuga Zarethani, eifo gh'ekibuga Yezireeli. Baana oyo era yaalabirira n'ekiketezo ekiva e Bethi Sheani okutuuka ku kibuga Abeli Mehola, n'okutuukira irala ku luuyi lule olw'ekibuga Yokimeamu.

¹³ Benigeberi yaalabirira ekibuga Ramothi eky'omu Gileadi, n'ebyalo bya Yairi mutabane wa Manasse ebiri mu Gileadi, n'ekiketezo ky'e Arugobu mu Bashani; woonawoona ng'ebyo n'ebibuga ebikologho enkaaga ebyezungulwirwa ebimante ebigumu era ebiri n'eminhololo egisiba endhigi dhaabyo egyakolebwa mu kyuma eky'ekikomo.

¹⁴ Ahinadabu mutabane wa Iddo, yaalabirira ebiketezo by'e Mahanaimu;

¹⁵ Ahimaazi yaalabirira ekiketezo kya Nafutali, era ng'oyo n'eyabayiza Basemathi owundi ku baghala ba Solomoni;

¹⁶ Baana mutabane wa Hushai yaalabirira ekiketezo kya Asheri n'ekibuga Bealothi;

¹⁷ Yehoshafati mutabane wa Parua yaalabirira ekiketezo kya Issakari;

¹⁸ Shimei mutabane wa Ela yaalabirira ekiketezo kya Benjamini;

¹⁹ Geberi mutabane wa Uri yaalabirira Gileadi ekyali ekiketezo kya kyabazinga Sihoni ow'Abamori ni kyabazinga Ogi ow'e Bashani. Era ghaabaagho omukulembeze mulala, eyalabiriranga Buyudaaya yoonayoona.

Ebirungi ebyaligho nga Solomoni n'afuga

²⁰ Abantu mu Buyudaaya ni mu Isiraeli baali kamaala inho ng'oti musenho oguba ku mbali kw'enhandha, era baalyanga n'okunhwa baanhwanga, nga basangaavu.

²¹ Solomoni yafuga obwakyabazinga obwali mu kiketezo ekiva ku mwiga Eufurate okutuuka ku nsi y'Abafilisiti, n'okutuuka ku nsalosalo ni Misiri. Abantu b'omu biketezo ebyo baamughanga empooza era baamugheerezanga ekiseera kyonakyona kye yamala nga mulamu.

²² Eby'okulya Solomoni bye yeetaaganga buli lunaku, byabanga kilo enkumi itaanu (5,000) edh'obuwunga obw'engaano obuseereibwa obukalamu, ni kilo omutwalo mulala (10,000) edh'obuwunga obundi,

²³ n'ente ikumi ensavu, n'ente amakumi abiri dhe baaya obwaye, n'entaama kikumi, nga tobaliireeku mpongo, na mpuuli, na nkoko mpiite ensavu.

²⁴ Solomoni yafuganga ekiketezo kyonakyona eky'e bugwandhuba bw'omwiga Eufurate, okuva ku Tifusha okutuuka e Gaza, ng'afuga bakyabazinga baamu boonaboona. Era yali mu miraala n'ebiketezo byonabyona ebyali bimwezungulwire.

²⁵ Ekiseera kyonakyona kye yamala nga mulamu, abantu boonaboona mu Buyudaaya ni mu Isiraeli, baali mu miraala okuva e Dani okutuuka e Beerisheba. Buli maka gaabanga n'eisamba lyago ery'emizabbibu n'ery'emiti emitiini.

²⁶ Solomoni yali n'embalaasi emitwalo ena (40,000) edhaaghaluzanga ebigaali bye eby'omu lutalo, nga buli ndala eri n'akasenge kaayo. Era yali n'abavuzi b'embalaasi omutwalo mulala n'enkumi ibiri (12,000).

²⁷ Abakungu bale eikumi n'ababiri, baalinga n'okuleetera kyabazinga Solomoni eby'okulya bye yeetaaganga, era n'okuleetera n'abo abaalyanga ewa kyabazinga oyo bye beetaaganga. Buli mukungu yaleetanga mu mwezi ogugwe, era nga tibaganha ni ghabaagho bwetaavu bwa kintu kyonakyona.

²⁸ Baaleetanga ni sayiri yeena, n'eisubi ery'embalaasi, n'ery'ensolo enumusi dh'embiro, nga babireeta woonawoona ghe byabanga nga byetaagibwa, buli muntu nga bwe yabanga ng'alagiirwa.

²⁹ Katonda yaagha Solomoni amagezi n'okutegeera mu nsambo eswikiriire, era n'obwongo obungi ng'oti musenho gwa ku mbali kwa nhandha.

³⁰ Amagezi ga Solomoni nga gasinga amagezi ag'abantu b'e buvandhuba n'ag'abagezi ab'e Misiri goonagoona.

³¹ Solomoni n'eyali asinga abantu boonaboona amagezi. Yasinga Ethani Omuezera, yaasinga ni Hemani, ni Kalukoli, ni Darida, abo nga batabane ba Maholi. Era yaamanhikana mu maghanga goonagoona ageezungulwire agho.

³² Yayiiya ensambo enkumi isatu (3,000), n'enhembo edhiswika mu lukumi (1,000).

³³ Yayogera ku miti, okuva ku muvule ogw'omu Lebanoni, okutuuka ku kati akeetebwa hissopu, akamera ku bimante. Yaayogera ni ku nsolo, ni ku nhonhi, ni ku byeghaluliza ku itaka, ni ku byenhandha.

³⁴ Abantu baava mu maghanga goonagoona okwidha okuwulira ku magezi ga Solomoni. Era bakyabazinga ab'ensi dhoonadhoona abaawulira ku magezi ge, baatuma abantu okwidha okugawulirisa.