1 Bakyabazinga 3 - Baibuli Ekibono kya Katonda 2014

Kyabazinga Solomoni asaba Katonda amagezi

¹ Agho Solomoni yaaleetagho enkolagana ni kyabazinga w'e Misiri, ng'abayiza mughala wa kyabazinga oyo. Era Solomoni yaaleeta omughala oyo mu kyetebwa Ekibuga kya Daudi, okutuusa lwe yamala okwezimbira endhu n'ekisaagaati kyaku ekikye, n'eisinzizo lya Musengwa Katonda, n'ekimante okwezungulula ekibuga Yerusalemu.

² Okutuusa mu kiseera ekyo, abantu baali nga bakaagheerayo emisengo mu bifo ebigulumivu eby'okusinzizaamu, kuba ghaali nga ghakaali kuzimbwagho ndhu ya kusinzizangamu Musengwa Katonda.

³ Solomoni yagonzanga Musengwa Katonda ng'ajiira ku ebyo lata we Daudi bye yamusikirira. Aye era Solomoni oyo, yeena yagheerangayo emisengo era yaaniokezanga obubbaani mu bifo ebigulumivu eby'okusinzizaamu.

⁴ Agho Solomoni yaaja e Gibeoni okugheerayo eyo emisengo, kuba ekyo n'ekyali ekifo ekigulumivu eky'oku kasozi ekyali ekikulu. Solomoni yagheerangayo ku alutaari y'omu kifo ekyo ebigheebwayo ebyokebwa bikumi na bikumi.

⁵ Bwe yali ng'ali eyo e Gibeoni, Musengwa Katonda yaamubonekera obwire mu kirooto, yaamukoba ati: “Saba ky'oyenda, nkughe.”

⁶ Solomoni yaakoba ati: “Buliidho obairenga ng'oyoleka nga bw'ogonza einho lata wange Daudi omugheereza wo obutalekera; kuba yali mwesigwa, omutuufu era omwesimbu mu kukolagana n'iwe. Era omukuumiire okugonza kwo okwo okutakoma, waamugha omwana omulenzi afuga mpegaano mu kifo kye.

⁷ Wo Musengwa Katonda wange, iwe buti onfiire nze omugheereza wo, mbe kyabazinga mu kifo kya lata wange Daudi, waire nga ndi mwana muto. Nzira kye ndidhi naire.

⁸ Ate nze omugheereza wo ndi mu bantu be walondamu, eighanga eikologho, olukunkumuli olw'abantu abatasoboka kubalika.

⁹ Kale ni mpa nze omugheereza wo amagezi, nsobole okufuganga abantu bo, n'okwawulangagho ekirungi n'ekibi kuba naani aghanga okufuga eighanga lyo lino eikologho liti, aghazira ekyo?”

¹⁰ Musengwa Katonda yaasangaala okubona nga Solomoni ekyo ky'asabye.

¹¹ Agho yaamukoba ati: “Nga bw'osabye ekyo, n'oteesabira kughangaala, oba obukombe, oba okufa kw'abazigu bo, aye ni weesabira amagezi okwawulangagho ekituufu,

¹² kale ky'osabye nkikughaire. Era bona eno, nkughaire amagezi n'okutegeera, ebisinga omuntu owundi yeenayeena ku abo abaakusookayo bye yaali afunie, era ebisinga omuntu owundi yeenayeena ku abo abalikwiririra, by'alifuna.

¹³ Era nkughaire n'ebindi by'otasabye: obukombe n'ekitiibwa mu bulamu bwo bwonabwona, ghabule kyabazinga owundi yeenayeena ayagayaga n'iwe.

¹⁴ Era bw'onaabanga omuwulize ye ndi, n'ogemanga amateeka gange n'ebiragiro byange byonabyona, nga lata wo Daudi bwe yakolanga, ndikugha obughanguzi.”

¹⁵ Agho Solomoni yaasitukagho. Okuja okwetegereza ati nga kibaire kirooto. Yaaja e Yerusalemu, yaayemerera mu maiso g'Esanduuku y'Endagaano ya Musengwa Katonda, yaaghaayo ebigheebwayo ebyokebwa, n'ebigheebwayo olw'okutabagana. Era yaakolera abagheereza be boonaboona embaga.

Solomoni asala omusango omukalangufu

¹⁶ Lwali lulala abakazi bamalaaya babiri baidha eri kyabazinga Solomoni, baayemerera mu maiso ge.

¹⁷ Malaaya owundi yaakoba ati: “Isebantu kyabazinga, nze n'omukazi ono tusula mu ndhu ndala. Nazaala omwana nga tuli mu ndhu ndala n'omukazi ono.

¹⁸ Ku lunaku olwokusatu nga mmaze okuzaala, omukazi ono yeena yaazaala. Era twali twenka nga ghazira muntu wundi, okutoolaku ife twenka ababiri mu ndhu.

¹⁹ Agho omwana w'omukazi ono yaafa obwire, kuba omukazi ono yamulambaalaku.

²⁰ Omukazi ono yaasituka mu bwire ghagati, yaatoola omwana wange mu buliri bwange nga nze ndi mu ndoolo, yaamuta mu kifuba kye, ate yaata omwana we afiire mu kifuba kyange.

²¹ Bwe nasitukagho enkyo okwonsa omwana wange, naja okubona ng'afiire. Aye bwe namwekalirisa obukalamu, naja okubona nga ti n'omwana wange ye nazaala.”

²² Aye omukazi ole owundi yaakoba ati: “Busa, omwana omulamu n'owange, omufu n'owuwo.” N'ono eyasooka yaakoba ati: “Busa, omufu n'owuwo, omulamu n'owange.” Baakaayana batyo mu maiso ga kyabazinga.

²³ Agho kyabazinga Solomoni yaakoba ati: “Owundi ali kukoba ati, ‘Omwana omulamu n'owange, omufu n'owuwo.’ Ate owundi yaakoba ati, ‘Busa, omwana omufu n'owuwo, omulamu n'owange.’ ”

²⁴ Agho kyabazinga yaakoba ati: “Mundeetere empiima!” Bwe baagireeta,

²⁵ yaakoba ati: “Musalemu omwana omulamu ghabiri, ekitundu mukighe owundi, n'ekitundu mukighe owundi.”

²⁶ Agho inhina w'omwana omulamu, omwoyo gwamulumira omwana we, yaakoba kyabazinga ati: “Isebantu kyabazinga, omwana mutamwita. Mumumughe nga mulamu.” Aye omukazi ole owundi yaakoba ati: “Taidha kuba wange oba wuwo mumutugabaniemu.”

²⁷ Agho kyabazinga yaakoba ati: “Mutaita mwana, mumughe omukazi asoose, oyo ni inhina w'omwana mwenemwene.”

²⁸ Abaisiraeli boonaboona bwe baawulira kyabazinga Solomoni bw'asaze omusango ogwo, baamwewuunhia inho, kuba baabona ng'amagezi ga Katonda gamulimu, asobole okusalanga mu butuufu.