1 Bakyabazinga 22 - Baibuli Ekibono kya Katonda 2014

Omulanzi Mikaia alabula Ahabu

¹ Agho baamala emyaka esatu nga ghazira lutalo ghagati wa Siria ni Isiraeli.

² Aye mu mwaka ogwokusatu, Yehoshafati kyabazinga wa Buyudaaya yaaja okubona Ahabu kyabazinga wa Isiraeli.

³ Agho kyabazinga wa Isiraeli yaakoba abakungu be ati: “Mwidhi bukalamu nga Ramothi eky'e Gileadi kyaife. Aye lwaki tusirika obusirike ni tutakitoola ku kyabazinga wa Siria?”

⁴ Yaabuuza Yehoshafati ati: “Onaaja ninze mu Ramothi eky'e Gileadi okulwana olutalo?” Yehoshafati yaamwiramu ati: “Nze n'iwe tuli kirala. Abantu bange n'ekirala n'ababo, era embalaasi dhange n'ekirala n'edhidho.”

⁵ Aye era Yehoshafati yaakoba kyabazinga wa Isiraeli ati: “Mala kwebuuza ku Musengwa Katonda owulire ky'akoba.”

⁶ Agho kyabazinga wa Isiraeli yaasoloza abalanzi ng'ebikumi bina, yaababuuza ati: “Nje numbe Ramothi eky'e Gileadi, oba ntakirumba?” Bairamu bati: “Ja okirumbe, Musengwa Katonda aidha kukikugha okighangule.”

⁷ Aye Yehoshafati yaakoba ati: “Ghano ghaziraghooku mulanzi wa Musengwa Katonda wundi tumwebuuzeeku?”

⁸ Kyabazinga wa Isiraeli yaakoba Yehoshafati ati: “Ghakaaligho omuntu ye tusobola okubitamu okwebuuzaaku ku Musengwa Katonda. Oyo ni Mikaia, mutabane wa Imula. Aye timwenda naire, kuba talangangaku bikalamu ku nze, okutoolaku ebibi.” Yehoshafati yaakoba ati: “Kyabazinga, otakoba otyo.”

⁹ Agho kyabazinga wa Isiraeli yaayeta mulala ku bakungu be, yaamukoba ati: “Ja mangu oleete ghano Mikaia mutabane wa Imula.”

¹⁰ Kyabazinga wa Isiraeli ni kyabazinga Yehoshafati owa Buyudaaya, baali bavaire ebivaalo byaibwe eby'obwakyabazinga, nga batyaime, buli muntu ku kityamo kye eky'obwakyabazinga, agho gha kifo aghakubirwa engaano, okumpi n'omulyango ogwingira Samaria. Abalanzi boonaboona baali bali kulanga agho mu maiso gaibwe.

¹¹ Agho owundi ku balanzi abo, eriina lye nga ni Zedekia mutabane Kenaana, yeekolera amayiga mu kyuma ekigumu einho, yaakoba ati: “Musengwa Katonda akoba ati, ‘Amayiga gano g'oidha okukozesa okufula Abasiria okutuusa lw'olibaghangula.’ ”

¹² N'abalanzi abandi boonaboona baalangirira batyo, nga bakoba bati: “Ja olumbe Ramothi eky'e Gileadi, oidha kukighangula. Musengwa Katonda aidha kukikugha okighangule.”

¹³ Agho omukwenda eyaja okweta Mikaia, yaakoba Mikaia oyo ati: “Bona eno, abalanzi abandi boonaboona balanze bughanguzi eri kyabazinga. Weena ogwaine olange nga beene bwe bakoze, ng'oyogera bikalamu.”

¹⁴ Aye Mikaia yaakoba ati: “Ndayira mu Musengwa Katonda omulamu nti, ndidha kwogera ekyo Musengwa Katonda oyo ky'anankoba okwogera.”

¹⁵ Mikaia bwe yatuuka mu maiso ga kyabazinga Ahabu, kyabazinga oyo yaamubuuza ati: “Nje numbe Ramothi eky'e Gileadi, oba ntakirumba?” Mikaia yaamwiramu ati: “Ja olumbe Ramothi eky'e Gileadi, oidha kukighangula. Musengwa Katonda aidha kukikuta mu ngalo.”

¹⁶ Aye Ahabu yaamukoba ati: “Nakukoba nti bw'obanga ng'oli kwogera ninze mu liina lya Musengwa Katonda, ogwaine oyogere mazima gonka. Oyenda nkwiraganemu ekintu ekyo mikuzi emeka?”

¹⁷ Mikaia yaakoba ati: “Mboine abaisirukale ba Isiraeli boonaboona nga basansaaniire eyo ku nsozi, ng'oti n'entaama edhiziraku mwayi. Musengwa Katonda yankoba ati, ‘Abantu abo baziraku mukulembeze, buli mulala leka aireyo miraala mu maka ge.’ ”

¹⁸ Kyabazinga Ahabu owa Isiraeli yaakoba Yehoshafati ati: “Tyakukobeire nti taidha kulanga bikalamu ku nze, okutoolaku ebibi!”

¹⁹ Mikaia yeeyongera okukoba ati: “Kale ni wulira Musengwa Katonda by'akoba: Mboine Musengwa Katonda oyo ng'atyaime ku kityamo kye eky'obwakyabazinga, ng'eigye lyonalyona ery'omu igulu lyemereire ku luuyi lwe olw'omukono omusaadha ni ku lw'omugooda.

²⁰ Musengwa Katonda yaabuuza ati, ‘Naani anaasendasenda Ahabu okuja e Ramothi eky'e Gileadi, bamwite?’ Ono yaakoba kino, ate ole yaakoba kire.

²¹ Agho ghaidhagho omwoyo gwayemerera mu maiso ga Musengwa Katonda, gwakoba guti, ‘Nze ndidha kumusendasenda.’

²² “Musengwa Katonda yaagubuuza ati, ‘Mu nsambo ki?’ “Omwoyo gwamwiramu guti, ‘Ndidha kuja ndhogeze abalanzi be boonaboona eby'obuguya.’ “Musengwa Katonda yaakoba ati, ‘Oidha kusobola okumusendasenda. Kale ja okole otyo.’ ”

²³ Mikaia yaamaliriza ng'akoba ati: “Kale ni Musengwa Katonda ataire omwoyo ogw'obuguya mu kanwa omw'abalanzi bo boonaboona, era iwe by'akwogeireku bya kabi.”

²⁴ Agho omulanzi Zedekia mutabane wa Kenaana, yaaseeta ye Mikaia, yaamukuba oluyi ku itama era yaamubuuza ati: “Omwoyo gwa Musengwa Katonda gwanviireku gutya, memale gwogere n'iwe?”

²⁵ Mikaia yairamu ati: “Mu butuufu, ekyo olikimanha ku lunaku lw'olingira mu kisenge eky'omunda okwegisa.”

²⁶ Agho kyabazinga Ahabu yaalagira ati: “Mugeme Mikaia mumutwale eri Amoni omukulu w'ekibuga, n'eri omulangira Yoashi mutabane wa kyabazinga,

²⁷ mubakobe muti, ‘Kyabazinga alagiire ati omusaadha oyo mumute mu ikomera, era mumughenga emere n'amaadhi nga mumupimiraku bupimire, okutuusa nga ndhize bukalamu.’ ”

²⁸ Agho Mikaia yaakoba ati: “Bw'oiranga obukalamu, nga koodhi Musengwa Katonda tayogereire mu nze.” Era yaayongeraku ati: “Imwe abantu mwenamwena, muwulire kye ndhogeire.”

Ahabu afa

²⁹ Agho kyabazinga Ahabu owa Isiraeli ni kyabazinga Yehoshafati owa Buyudaaya, baaja okulumba ekibuga Ramothi eky'e Gileadi.

³⁰ Ahabu yaakoba Yehoshafati ati: “Nze ndidha kuja mu lutalo nga neefuusiisafuusiisa ng'oti ndi muntu wundi, aye iwe oidha kuvaala ebivaalo byo eby'obwakyabazinga.” Kale baaja mu lutalo, nga kyabazinga wa Isiraeli yeefuusiisafuusiisa.

³¹ Kyabazinga wa Siria yali amaze okulagira abaduumizi b'ebigaali bye amakumi asatu n'ebibiri eby'omu lutalo, ati: “Mutalwanisa muntu wundi yeenayeena, k'abe omukulu oba omuto, okutoolaku kyabazinga wa Isiraeli yenka.”

³² Agho abaduumizi b'ebigaali eby'omu lutalo abo bwe baabona kyabazinga Yehoshafati, baadhuuba bati ni kyabazinga wa Isiraeli, era baakyuka okumulwanisa. Aye Yehoshafati oyo bwe yayana einho,

³³ abaduumizi abo baabona nga ti ni kyabazinga wa Isiraeli, era baalekera agho okumubingirira.

³⁴ Agho ghaabaagho omwisirukale Omusiria eyalasa akalaso ke eyo atyo, aye yaagemya kyabazinga wa Isiraeli, agho ekivaalo kye eky'omu lutalo eky'ekyuma ghe kyegaitira mu kifuba. Kyabazinga yaakoba omuvuzi w'ekigaali kye eky'omu lutalo ati: “Kyusa ekigaali ontoole mu lutalo, kuba banfumiite.”

³⁵ Olutalo lwataama inho ku lunaku olwo. Kyabazinga wa Isiraeli baamugemerera bugemerere mu kigaali kye eky'omu lutalo okwolekera Abasiria. Omusaayi gwava mu kibwa kye, gwakuuluulira mu kigaali kye ekyo, era yaafa eigulo eryo.

³⁶ Endhuba ng'eri kumpi okugwa, kyalangirirwa mu igye lyonalyona erya Isiraeli nti: “Buli muntu aireyo mu kiketezo ky'ewaibwe, ni mu kibuga ky'ewaibwe.”

³⁷ Mu nsambo eyo kyabazinga Ahabu yaafa, baamuleeta e Samaria baamuziika.

³⁸ Baanaakiza ekigaali kye eky'omu lutalo ku nsulo y'e Samaria, embwa dhaakombera eyo omusaayi gwe, ni bamalaaya baagunaabiramu eyo, nga Musengwa Katonda bwe yakoba.

³⁹ Ebindi byonabyona Ahabu bye yakola, n'endhu ye yazimba n'agitimba n'amasanka, n'ebibuga byonabyona bye yazimba, byaghandiikibwa mu Kitabo ky'Ebyomubyanda bya Bakyabazinga ba Isiraeli.

⁴⁰ Atyo Ahabu yaafa, yeeyimba ku badhaadha be abaafa. Mutabane we Ahazia yaamusikira ku bwakyabazinga.

Kyabazinga Yehoshafati owa Buyudaaya

⁴¹ Mu mwaka ogwokuna ogwa kyabazinga Ahabu nga n'afuga Isiraeli, Yehoshafati mutabane wa Asa yaafuuka kyabazinga wa Buyudaaya.

⁴² Yali ng'agheza emyaka amakumi asatu n'etaanu egy'obukulu, era yaafuga okumala entangama ya myaka amakumi abiri n'etaanu mu Yerusalemu. Inhina yali nga ni Azuba, mughala wa Shilihi.

⁴³ Yehoshafati oyo yali wa mpisa nkalamu era nga tadhivaaku, ng'oti n'ise bweyali. Yaakolanga ebirungi Musengwa Katonda by'asiima, aye ebifo ebigulumivu eby'okusinzizaamu tiyabitoolagho. Abantu baasigala nga bakaagheerayo eyo emisengo era nga bakaaniokeza eyo obubbaani mu bifo ebyo.

⁴⁴ Era Yehoshafati oyo yaakola endagaano ey'emiraala ni kyabazinga wa Isiraeli.

⁴⁵ Ebindi byonabyona Yehoshafati bye yakola eby'amaani, n'entalo dhe yalwana, byaghandiikibwa mu Kitabo ky'Ebyomubyanda bya Bakyabazinga ba Buyudaaya.

⁴⁶ Yehoshafati oyo yamaliragho irala mu nsi ye, abasaadha abaakolanga obwamalaaya obw'omu isabo, abaali bakaasigairegho okuva mu byanda bya lata we Asa.

⁴⁷ Mu kiseera ekyo, ensi Edomu tiyali na kyabazinga, aye musigire n'eyagifuganga, nga kyabazinga wa Buyudaaya n'amutaagho.

⁴⁸ Yehoshafati yakola amaato amakologho ag'oku nhandha enene, nga ga kujanga mu Ofiri okunonayo zaabu. Aye gaaloba kuja, kuba gaamenhekera mu Ezionigeberi.

⁴⁹ Agho kyabazinga Ahazia mutabane wa Ahabu yaakoba Yehoshafati ati: “Abagheereza bange ka bajiire ghalala n'ababo mu maato.” Aye Yehoshafati yaaloba.

⁵⁰ Agho Yehoshafati oyo yaafa, yeeyimba ku badhaadha be abaafa, era yaaziikibwa mu lwambiidhi lwa badhaadha be abo, mu kyetebwa Ekibuga kya Daudi dhaadha we. Mutabane we Yehoramu yaamusikira ku bwakyabazinga.

Kyabazinga Ahazia owa Isiraeli

⁵¹ Mu mwaka ogweikumi n'omusanvu (17) ogwa kyabazinga Yehoshafati nga n'afuga Buyudaaya, Ahazia yaafuuka kyabazinga wa Isiraeli, era yaafuga okumala entangama ya myaka ebiri mu Samaria.

⁵² Yaakola ebibi eri Musengwa Katonda, ng'ajiira ku mpisa embi edha lata we Ahabu, n'edha inhina Yezebeli, n'edha kyabazinga Yeroboamu mutabane wa Nebati eyaleetera Isiraeli okwonoona.

⁵³ Ahazia oyo yaagheerezanga omusambwa Baali era yaagusinzanga. Olwo yaasungughaza Musengwa Katonda, Katonda wa Isiraeli, mu nsambo n'endala nga lata we bwe yakola.