1 Bakyabazinga 20 - Baibuli Ekibono kya Katonda 2014

Olutalo lwa Siria ni Isiraeli

¹ Benihadadi, kyabazinga wa Siria, yaasoloza eigye lye lyonalyona, era ni bakyabazinga abandi amakumi asatu na babiri baamweyimbaku, nga bali n'embalaasi n'ebigaali eby'omu lutalo. Agho yaaja, yaazingiza Samaria okukyezunguluza era yaakirwanisa.

² Yaatuma abakwenda mu kibuga ye kyabazinga Ahabu owa Isiraeli, okumukoba ati:

³ “Feeza ni zaabu wo, byange, era ni bakazi bo n'abaana bo abasinga bulungi, bange.”

⁴ Kyabazinga wa Isiraeli yairamu ati: “N'agh'agho musengwa wange kyabazinga, nze ndi wuwo ni byonabyona bye ndi nabyo, nga bw'okobye.”

⁵ Nga ghabiseeghooku akaseera, abakwenda kabiri bairayo ye kyabazinga Ahabu, baakoba bati: “Benihadadi ali kukoba ati, ‘Natuma abakwenda y'oli, nga nkukoba ompeereze feeza wo ni zaabu wo, ni bakazi bo, n'abaana bo.

⁶ Aye enkyo, mu kiseera ng'oti ni kino, ndidha kukusindikira abakungu bange, baidhe baagaaze mu ndhu yo ni mu ndhu dh'abakungu bo. Era kiisi ekinaabasanhusa kye banaagemangaku, baidha kukitwala.’ ”

⁷ Agho kyabazinga wa Isiraeli yaayeta abakulembeze boonaboona mu ighanga, yaabakoba ati: “Bwenebwene mugwaine mukimanhe nti omusaadha ono ali kutusonsoonia, kuba yansindikira abakwenda mbu mmughe abakazi bange, n'abaana bange, ni feeza wange, ni zaabu wange. Era tyamulobera naire.”

⁸ Abakulembeze boonaboona era n'abantu boonaboona bairamu bati: “Otawulirisa ebyo, era otaganha naire.”

⁹ Agho Ahabu yaakoba abakwenda ba Benihadadi ati: “Mukobe musengwa wange kyabazinga muti, nze omugheereza we ndidha kukola bire byonabyona bye yasooka okunkoba. Aye kino tighanga kukikola.” Abakwenda baagolola, baatwalira Benihadadi obukwenda obwo.

¹⁰ Agho Benihadadi yaamusindikira obukwenda, ng'akoba ati: “Ndidha kuleeta abasaadha bange bazikirize Samaria, bakifuule ng'oti nkungu bukungu, ate era enkungu eyo erobe na kubabuna buli mulala okuyoolaku omuganda. Ekyo bwe ntaakituukirize, emisambwa gimbonerezanga n'obukambwe.”

¹¹ Kyabazinga wa Isiraeli yaamwiramu ati: “Mumukobe muti, ‘Ole agemye eby'okulwanisa okuja mu lutalo, tagwaine kwesuutiriza ng'oti n'ole amaze okubiisa ghansi ng'alughangwire.’ ”

¹² Benihadadi bwe yaawulira obukwenda obwo ng'ali kunhwa mu ntindi ghalala ni bakyabazinga bale abaamweyimbaku, yaalagira abasaadha be ati: “Mwemerere mu bifo byaimwe!” Baayemerera mu bifo byaibwe nga beetegeike okulumba ekibuga.

¹³ Mu kiseera ekyo ghaabaagho omulanzi eyaja eri Ahabu kyabazinga wa Isiraeli, yaakoba ati: “Musengwa Katonda akoba ati, ‘Oli kubona eigye eryo lyonalyona eikologho? Ndidha kulita mu ngalo dho olwaleero, memale omanhe nga ninze Musengwa Katonda.’ ”

¹⁴ Ahabu yaabuuza ati: “Ni baani abanaalirumba?” Omulanzi yairamu ati: “Abaisuka, abagheereza ab'abafuzi ab'omu biketezo, n'abanaalirumba.” Kyabazinga yaabuuza ati: “Naani anaasooka okulumba?” Omulanzi yairamu ati: “Niiwe.”

¹⁵ Agho kyabazinga Ahabu yaabala abaisuka abagheereza ab'abafuzi ab'omu biketezo, baaba nga baghera ebikumi bibiri n'asatu na babiri (232). Ng'amaze ekyo, yaabala eigye lyonalyona era Isiraeli lyaba nga ligheramu abantu kasanvu (7,000).

¹⁶ Baalumba mu kasana ghagati, nga Benihadadi ni bakyabazinga amakumi asatu n'ababiri abaidha okumuyambaku mu lutalo, nga bali mu ntindi bali bwa kunhwa kutamiira!

¹⁷ Abaisuka abagheereza ab'abafuzi ab'omu biketezo, n'abaasooka okulumba. Benihadadi yaatuma abakeesi, baamukobera bati ghaligho abalwani abaviire mu Samaria.

¹⁸ Yaalagira ati: “Bwe baba nga baidhie lwa miraala, mubageme mubaleete nga balamu, ni bwe banaaba nga baidhie kulwana, era mubageme mubaleete nga balamu.”

¹⁹ Kale abaisuka abagheereza ab'abafuzi ab'omu biketezo baafuluma ekibuga, n'eigye lyabavaaku einhuma.

²⁰ Era buli muntu ku beene, yaita omuntu ye yalwana naye. Abasiria baalumuka, era Abaisiraeli baababingirira. Aye Benihadadi kyabazinga wa Siria yaawona ng'alumukira ku mbalaasi, ghalala n'ab'eigye lye ab'oku mbalaasi.

²¹ Kyabazinga wa Isiraeli yaalwana olutalo, yaanhaga embalaasi n'ebigaali eby'omu lutalo, era yaita Abasiria kamaala inho.

²² Agho omulanzi ole yaaja ye kyabazinga wa Isiraeli, yaamukoba ati: “Ja weenhweze era weetegereze bukalamu ky'onaakola, kuba omwaka bwe gunaaba nga gwinhama, kyabazinga wa Siria aidha kwira akulumbe.”

Benihadadi alumba Samaria omukuzi ogwokubiri

²³ Agho abakungu ba kyabazinga wa Siria baamukoba bati: “Emisambwa gy'Abaisiraeli abo misambwa gya ku nsozi, kye baava ni batusinga amaani. Aye ka tulwane nabo ku museetwe, olwo bwenebwene twidha kubasinga amaani.

²⁴ Era kino ky'obe okole: toola bakyabazinga bale, buli mulala mu kifo ky'obaire omutairemu, mu kifo kyaibwe oteemu abaduumizi ab'amagye.

²⁵ Era bala, ogheze eigye eryagayaga ni lire lye wafiirwa: aghaali embalaasi oizeegho embalaasi, n'aghaali ekigaali eky'omu lutalo oizeegho ekigaali eky'omu lutalo. Memale olwo tulwane nabo ku museetwe, bwenebwene tituulobe kubasinga maani.” Kyabazinga Benihadadi yaikiriza amagezi ge baamugha, era yaakola nga bwe baamukoba.

²⁶ Omwaka bwe gwali nga guli kwinhama, yaasoloza Abasiria, yaaja nabo mu Afeki okulwanisa Abaisiraeli.

²⁷ N'Abaisiraeli boona baasolozebwa, baagheebwa ebikozesebwa, baaja okulwana n'Abasiria abo. Abaisiraeli baasimba weema dhaibwe nga balinzagainia nabo, nga bali ng'oti bwa bughaso bwa mbuzi bubiri obutono, aye Abasiria nga babunie woonawoona.

²⁸ Agho omuntu wa Katonda yaaja yaakoba Ahabu kyabazinga wa Isiraeli ati: “Musengwa Katonda akoba ati, ‘Olw'okuba Abasiria baakoba bati nze Musengwa Katonda ndi musambwa gwa ku nsozi ogutali gwa mu biiko, ndidha kukuta mu ngalo olukunkumuli olwo lwonalwona olw'abalwani, memale mumanhe nga ninze Musengwa Katonda.’ ”

²⁹ Abasiria n'Abaisiraeli baasimba weema dhaibwe nga badhirinzagainia okumala enaku musanvu. Ku lunaku olwomusanvu baatoolera okulwana. Mu lunaku lulala, Abaisiraeli baita mu igye lya Siria abaisirukale ab'oku bigere emitwalo ikumi (100,000).

³⁰ Abaawonagho baalumukira mu kibuga Afeki. Eyo ate ekimante eky'oku kibuga kyagwa ku baisirukale emitwalo ebiri na kasanvu (27,000). Benihadadi yeena yaalumuka, yaaja mu kibuga, yeegisa mu kisenge eky'omunda.

³¹ Abakungu be baamukoba bati: “Twawulira tuti bakyabazinga ba Isiraeli baba ba kisa. Tukusaba otuganhe twesibe ekutiya mu nkende n'emigugha mu nkoto, tuje eri kyabazinga wa Isiraeli, tomanha bw'awonia bulamu bwo.”

³² Kale beesiba ekutiya mu nkende n'emigugha mu nkoto, baaja eri kyabazinga wa Isiraeli, baakoba bati: “Omugheereza wo Benihadadi ali kukoba ati, ‘Nkweghemba ndekera obulamu bwange.’ ” Ahabu yaabuuza ati: “Akaali mulamu? Oyo muganda wange.”

³³ Abasaadha abo baali nga bali kwekalirisa inho Ahabu oyo ky'ayogera. Kale bwe yakoba ati: “Oyo muganda wange,” amangu ago beenhuka ku ekyo, baakoba bati: “Yii, muganda wo Benihadadi.” Ahabu yaakoba ati: “Muje mumuleete.” Benihadadi yaidha ye Ahabu. Ahabu oyo yaamuniinisa mu kigaali kye eky'omu lutalo.

³⁴ Agho Benihadadi yaakoba Ahabu ati: “Ebibuga lata wange bye yanhaga ku lata wo, nze ndidha kubikwiriza. Era oidha kuba wa idembe okwezimbira obutale mu Damasiko, nga lata wange bwe yeezimbira mu Samaria.” Ahabu yaamukoba ati: “Ku kakalu ako, ndidha kukuleka oje.” Agho yaakola naye endagaano, yaamuleka yaaja.

Omulanzi avumirira Ahabu

³⁵ Agho omusaadha mulala ku balanzi, nga Musengwa Katonda n'amulagiire, yaakoba mwine ati: “Nkweghembye nkuba.” Aye mwine yaaloba.

³⁶ Agho yaamukoba ati: “Nga bw'odheemeire ekiragiro kya Musengwa Katonda, bw'onaaba nga waakava ghe ndi, empologoma eidha kukwita.” Era olwali okuva oyo ghe yali ati, empologoma yaamwita.

³⁷ Agho omulanzi oyo yaayagaanana n'omusaadha owundi, yaamukoba ati: “Nkweghembye nkuba.” Omusaadha yaamukuba yaamunoza, yaamutaaku n'eibwa.

³⁸ Agho omulanzi oyo yeesiba ekighero mu maiso okwefuusafuusa, yaaja yaateega kyabazinga Ahabu ku ngira.

³⁹ Kyabazinga bweyali ng'ali kubitagho, omulanzi oyo yaamweta ng'akoba ati: “Isebantu kyabazinga, nze omugheereza wo bwe nali nga ndi kulwana mu lutalo, omwisirukale mulala yaava ere yandeetera omusaadha, era yankoba ati, ‘Kuuma omusaadha ono. Aye bwe kalikutanda n'akweibaku, obulamu bwo bw'olisasulamu obubwe, oba olirigha ebitundu bya feeza lukumi (1,000).’

⁴⁰ Kale, nze omugheereza wo bwe nali nga ndi kukola ebintu kamaala eno n'ere, omusaadha yeiba.” Kyabazinga wa Isiraeli yaamukoba ati: “Omusango n'iwe mwene ogwesaliire.”

⁴¹ Agho omulanzi yeetoola mangu ekighero mu maiso. Kyabazinga wa Isiraeli bwe yamubona, yaamutegeera nga n'omulala ku balanzi.

⁴² Omulanzi yaakoba kyabazinga ati: “Musengwa Katonda akoba ati, ‘Nga bwe walekula omusaadha ye nalagira okwita, n'omuleka n'aja, obulamu bwo bw'oidha okusasuzaamu obubwe, n'abantu bo b'oidha okusasuzaamu ababe.’ ”

⁴³ Agho kyabazinga wa Isiraeli yairayo ewuwe e Samaria nga yeenhiinkaire era nga mweraliikirivu.