1 Bakyabazinga 2 - Baibuli Ekibono kya Katonda 2014

Daudi bye yasembayo okusikirira Solomoni

¹ Agho Daudi bweyali ng'ali kumpi okufa, yaasikirira mutabane we Solomoni ati:

² “Ekiseera kyange eky'okufa ng'abantu boonaboona bwe bali n'okufa, kiri kumpi okutuuka. Kale oba nga wa maani era ogumanga kisaadha.

³ Otuukirizanga ebyo byonabyona Musengwa Katonda wo by'ayenda okole, ng'ojiira ku ebyo by'akukoba mu mateeka ge ni mu biragiro bye, nga bwe byaghandiikibwa mu Mateeka ga Musa. Olwo obenga n'enkabi mu byonabyona by'onaakolanga, ni yoonayoona y'onaajanga.

⁴ Era olwo Musengwa Katonda atuukirizenga kye yansuubiza, bwe yankoba ati ku baidhukulu bange n'okunaabanga anaafuganga Isiraeli, kasita baidhukulu bange abo baneegenderezanga okugema bye yalagira n'omutima gwaibwe gwonagwona, era n'omwoyo gwaibwe gwonagwona.

⁵ “Ate era oidhi Yoabu mutabane wa Zeruia kye yankola, bwe yatemula abaduumizi b'eigye lya Isiraeli ababiri Abuneri mutabane wa Neri, ni Amasa mutabane wa Yetheri. Yabatemulira mu biseera eby'emiraala, ng'abeesasuulizaaku olw'abantu abaitibwa mu ntalo. Mu nsambo eyo yandeetera okuvunaanibwa ogw'okwita abantu abaziraku musango.

⁶ Kale ni okolanga nga bw'oidhi. Otalobanga kumwita, ni bw'aliba nga mukaire wa nvu.

⁷ “Aye bisanga bukalamu batabane ba Barazillai Omugileadi, era ka babenga mu abo b'onaalabiriranga, kuba bambisa bukalamu bwe nali nga ndi kulumuka muganda wo Abusalomu.

⁸ “Era ghaligho ni Shimei ali n'iwe, ng'oyo ni mutabane wa Gera Omubenjamini ow'e Bahurimu. Shimei oyo yanvuma bubi inho ku lunaku lwe naja e Mahanaimu. Aye bwe yaidha okundhagaana ku mwiga Yorudani, namulayirira mu Musengwa Katonda nti, tiidha kumwita.

⁹ Kale ni otamusonighanga naire. Oli musaadha mugezi era oidha kumanha eky'okumukola. Otalobanga kumwita waire nga mukaire.”

Daudi afa

¹⁰ Agho Daudi yaafa yeeyimba ku baadhaadha be abaafa, yaziikibwa mu kyetebwa Ekibuga kya Daudi.

¹¹ Yali afugiire Isiraeli okumala entangama ya myaka amakumi ana; yafugira emyaka musanvu mu Heburoni, era yaafugira emyaka amakumi asatu n'esatu mu Yerusalemu.

¹² Agho Solomoni yaasikira lata we Daudi ku bwakyabazinga, era obwakyabazinga bwe bwaba bugumu bwene.

Adoniya afa

¹³ Agho Adoniya mutabane wa Daudi ye yazaala mu Haggithi, yaidha eri Bathisheba inhina wa Solomoni. Bathisheba yaamubuuza ati: “Oidhie bya bulungi?” Adoniya yairamu ati: “Yii, bya bulungi.”

¹⁴ Era yaakoba ati: “Ndi ni kye nhenda okukukoba.” Bathisheba yaakoba ati: “Kyogere.”

¹⁵ Adoniya yaakoba ati: “Oidhi bukalamu nga ninze eyali ow'okusikira obwakyabazinga, era ng'abantu boonaboona mu Isiraeli ekyo kye baali basuubira. Aye muganda wange yaafuuka kyabazinga, kuba Musengwa Katonda atyo bwe yayenda.

¹⁶ Kale, mpegaano ndi kukusaba ekintu kirala, era nkweghembye otakiinhima.” Bathisheba yaamukoba ati: “Kyogere.”

¹⁷ Adoniya yaamukoba ati: “Nkweghembye nsabiraagho kyabazinga Solomoni, kuba iwe taidha kukwima, ampe Abishagi Omushunemi, abe mukazi wange.”

¹⁸ Bathisheba yaakoba ati: “Kale ndhikiriiza. Ndidha kukwogererayo ye kyabazinga.”

¹⁹ Kale Bathisheba yaaja ye kyabazinga Solomoni okwogererayo Adoniya. Kyabazinga yaasituka okusangaaza inhina ng'akutaimeku. Yaatyama ku kityamo kye eky'obwakyabazinga. Yaalagira baaleetera inhina ekityamo, inhina yaatyama ku luuyi olw'omukono omusaadha olwa kyabazinga.

²⁰ Inhina yaakoba ati: “Ndi n'akantu akatono kalala kati, ke nhenda okukusaba. Otakaanhima.” Kyabazinga yaamukoba ati: “Maama, kasabe. Tiidha kukakwima.”

²¹ Inhina yaamukoba ati: “Leka muganda wo Adoniya atwale Abishagi Omushunemi, abe mukazi we.”

²² Kyabazinga Solomoni yairamu inhina ati: “Lwaki oli kusabira Adoniya, Abishagi Omushunemi abe mukazi we? Musabire n'obwakyabazinga bwona, kuba ni mukulu wange, ate nga Abiathari kabona ni Yoabu mutabane wa Zeruia bali ku luuyi lwe.”

²³ Agho kyabazinga Solomoni yaalayira mu Musengwa Katonda ati: “Adoniya bw'ataitibwe olw'ekyo ky'asabye, Katonda agwananga yambonereza inho.

²⁴ Ndayira Musengwa Katonda omulamu eyampa obwakyabazinga bwa lata wange Daudi, nze n'ab'endhu yange, era n'andeetera okukakata ku kityamo eky'obwakyabazinga, nga bwe yasuubiza. Ndayira nti bwenebwene olwaleero Adoniya aidha kwitibwa.”

²⁵ Agho kyabazinga Solomoni yaalagira Benaia mutabane wa Yehoiada, yaaja yaita Adoniya.

Abiathari bamubinga ku bwakabona, ate Yoabu bamwita

²⁶ Kyabazinga Solomoni yaakoba Abiathari kabona ati: “Ja mu kyalo kyo mu Anathothi. Ogwaniire okwitibwa, aye tiidha kukwita mpegaano, kuba walabiriranga Esanduuku ya Musengwa Katonda ey'Endagaano, bwe wali ni lata wange Daudi, era waabanga ghalala naye mu bizibu bye byonabyona.”

²⁷ Kale atyo Solomoni yaabinga Abiathari ku mulimo ogw'okuba kabona wa Musengwa Katonda. Mu nsambo eyo, yaatuukiriza Musengwa Katonda kye yakoba ku b'endhu ya Eli mu Shilo.

²⁸ Amawulire ago bwe gaatuuka ku Yoabu, yaalumukira mu Weema ey'Okwagaananirangamu ni Musengwa Katonda, yeegema ku bintu ebiri ng'oti mayiga ga nsolo, ebiri ku alutaari. Yoabu yatya, kuba yeeyimba ni Adoniya, waire nga tiyeeyimbaku na Abusalomu.

²⁹ Bwe baakobera kyabazinga Solomoni bati: “Yoabu alumukiire mu Weema ya Musengwa Katonda, era ali gh'alutaari,” Solomoni yaalagira Benaia mutabane wa Yehoiada ati: “Ja omwite.”

³⁰ Benaia yaaja yaatuuka ku Weema ya Musengwa Katonda, yaakoba Yoabu ati: “Kyabazinga akulagiire ati, ‘Fuluma.’ ” Yoabu yaakoba ati: “Busa, ndidha kufiira ghano.” Benaia yaiza ye kyabazinga obukwenda ati: “Yoabu akobye ati n'ati. Atyo bw'andhizeemu.”

³¹ Agho kyabazinga yaakoba Benaia ati: “Kola nga bw'akobye. Mwite, omuziike, nze n'ab'endhu ya lata wange tulobe kuvunaanibwa kufa kwa bantu Yoabu oyo be yaita nga baziraku musango.

³² Musengwa Katonda aidha kumubonereza ng'amulanga ebikolwa bye eby'ekitemo, kuba yaita abasaadha babiri nga lata wange Daudi taidhi. Abasaadha abo baali batuufu era nga bali n'ebisaanizo okumusinga, era nga ni bano: Abuneri mutabane wa Neri era omuduumizi w'eigye lya Isiraeli, ni Amasa mutabane wa Yetheri era omuduumizi w'eigye lya Buyudaaya.

³³ Yoabu n'eizaire lye baidha kubonerezebwanga enaku dhoonadhoona, nga babalanga olw'okwita abantu abo. Aye Daudi n'eizaire lye era n'abasika be ku kityamo kye eky'obwakyabazinga, Musengwa Katonda aidha kubaghanga emiraala enaku dhoonadhoona.”

³⁴ Kale Benaia mutabane wa Yehoiada yaaja yaita Yoabu, baamuziika ewuwe mu irungu.

³⁵ Agho kyabazinga yaataagho Benaia mutabane wa Yehoiada okuba omuduumizi ow'eigye mu kifo kya Yoabu. Era kyabazinga yaataagho Zadoki kabona mu kifo kya Abiathari.

Shimei afa

³⁶ Agho kyabazinga yaayetesa Shimei, yaamukoba ati: “Weezimbire endhu mu Yerusalemu, obenga omwo. Era otagezangaku kuva mu kibuga omwo, n'oja ghantu ghandi naire.

³⁷ Kimanhe bumanhe nti k'olivaayo n'osomoka akaiga Kiduroni, oliitibwa bwitibwe. Era oliba nga niiwe mwene weereeteire okufa.”

³⁸ Shimei yaakoba kyabazinga ati: “Isebantu kyabazinga, ky'okobye kirungi. Era nga bw'okobye, zeena omugheereza wo bwe ndidha okukola.” Kale Shimei yaaba mu Yerusalemu ekiseera kinene.

³⁹ Aye nga ghabiseegho emyaka esatu, babiri ku bairu ba Shimei baalumuka, baaja eri Akishi mutabane wa Maaka, kyabazinga w'e Gathi. Abantu baakobera Shimei bati: “Bona eno, abairu bo bali mu Gathi.”

⁴⁰ Shimei yaasituka, yaatyama ku ndogoyi ye, yaaja e Gathi ewa Akishi okunoonia abairu be. Bwe yatuukayo, yaabatoolayo.

⁴¹ Abantu baakobera Solomoni bati Shimei yava e Yerusalemu yaaja e Gathi, era yaira.

⁴² Kyabazinga yaayetesa Shimei, yaamukoba ati: “Tyakulayiza mu Musengwa Katonda, ni nkukaninkiriza nga nkoba nti k'oliva e Yerusalemu n'oja aghantu aghandi woonawoona, kimanhe bumanhe nti oliitibwa bwitibwe? Era tiwandhiramu oti, ‘Ky'okobye kirungi. Ndidha kukigondera?’

⁴³ Kale, lwaki totuukiriiza kye walayira mu Musengwa Katonda, era lwaki omenhie ekiragiro kye nakulagira?”

⁴⁴ Kyabazinga era yaakoba Shimei ati: “Oidhi bukalamu mu mwoyo gwo ebibi byonabyona bye wakola lata wange Daudi. Kale Musengwa Katonda ky'anaava n'akubonereza.

⁴⁵ Aye nze Solomoni, Musengwa Katonda aidha kumpa enkabi era aidha kuleetera obwakyabazinga bwa Daudi okukakata enaku dhoonadhoona.”

⁴⁶ Agho kyabazinga Solomoni yaalagira Benaia mutabane wa Yehoiada, yaaja yaita Shimei. Agho obwakyabazinga bwakakata mu mikono gya Solomoni.