1 Bakyabazinga 19 - Baibuli Ekibono kya Katonda 2014

Eliya ng'ali ku lusozi Sinai

¹ Agho Kyabazinga Ahabu yaakobera mukazi we Yezebeli byonabyona Eliya bye yakola, era nga bwe yaita abalanzi ba Baali boonaboona.

² Agho Yezebeli yaatuma omukwenda y'Eliya, ng'akoba ati: “Emisambwa gigwananga gyambonereza n'obukambwe, bwe bunaatuuka enkyo mu kiseera nga kino nga nkaali kukwita, ng'oti niiwe bwe waise abantu abo.”

³ Agho Eliya yaatya, yaasituka yaalumuka okuwonia obulamu bwe. Yaaja e Beerisheba eky'omu Buyudaaya. Yaaleka eyo omugheereza we,

⁴ aye mwene yaatambula mu irungu olugendo lwa lunaku lulamba, yaaja yaatyama ghansi gh'omuti ogw'ekyeyo, yaasaba afe ng'akoba ati: “Wo Musengwa Katonda bye mboine bimala! Twala obulamu bwange mpegaano, kuba ghazira kye nsinga badhaadha bange!”

⁵ Yaalambaala ghansi gh'omuti ogwo ogw'ekyeyo, endoolo dhaamugema. Yaja okubona nga malaika amusiinhaku, ng'amukoba ati: “Situka olye.”

⁶ Eliya yaja okulinga ati, ng'abona agho gha mutwe gwe omugaati ogufumbiibwa ku manda, era n'ekidoome eky'amaadhi. Yaalya era yaanhwa, memale kabiri yairayo okulambaala.

⁷ Malaika wa Musengwa Katonda yaidha omukuzi ogwokubiri, yaamusiinhaku ng'akoba ati: “Situka olye, tomanha lugendo bwe lukulemerera ng'ate lukaali luleeyi.”

⁸ Eliya yaasituka yaalya era yaanhwa. Eby'okulya ebyo byamugha amaani, yaatambula enaku amakumi ana (40) omusana n'obwire, yaatuuka ku Sinai olusozi lwa Katonda.

⁹ Eliya bwe yatuuka ku lusozi Sinai, yaayagaana empuku, yaasula omwo. Agho Musengwa Katonda yaayogera naye, ng'amubuuza ati: “Oli kukola ki ghano?”

¹⁰ Eliya yairamu ati: “Enkikidi engemye ku lulwo, iwe Musengwa Katonda Afuga Amagye, kuba Abaisiraeli baamenha endagaano ye wakola nabo. Baamenhagho alutaari dho, era baita abalanzi bo. Nze zenka, ninze nsigairegho, ate zeena bali kwenda kundhita.”

¹¹ Musengwa Katonda yaakoba ati: “Fuluma, oje oyemerere ku lusozi mu maiso gange.” Agho Musengwa Katonda yaabitagho, kiwunga ow'amaani yaayuzayuza ensozi era yaamenhamenha embaale emberi wa Musengwa Katonda. Aye Musengwa Katonda nga tali mu kiwunga oyo. Kiwunga bwe yamala okubita, ghaabaagho musisi, yaatengeesa ensi. Aye Musengwa Katonda nga tali mu musisi oyo.

¹² Musisi bwe yalekera, ghaabaagho omuliro. Aye Musengwa Katonda nga tali mu muliro ogwo. Omuliro bwe gwavaagho, ghaabaagho akamiro akatono akaghegheevu.

¹³ Eliya bwe yawulira akamiro ako, yeeghemba mu maiso ekivaalo kye, yaafuluma mu mpuku, yaayemerera ku mulyango gwayo. Olwo yaawulira amamiro nga gamukoba gati: “Eliya oli kukola ki ghano?”

¹⁴ Eliya yairamu ati: “Enkikidi engemye ku lulwo, iwe Musengwa Katonda Afuga Amagye, kuba Abaisiraeli baamenha endagaano ye wakola nabo. Baamenhagho alutaari dho, era baita abalanzi bo. Nze zenka, ninze nsigairegho, ate zeena bali kwenda kundhita.”

¹⁵ Musengwa Katonda yaamukoba ati: “Irayo mu irungu ery'e Damasiko. Bw'onaatuukayo, oidha kusiiga Hazaeli omuzigo afuuke kyabazinga wa Siria,

¹⁶ osiige ni Yehu mutabane wa Nimushi abe kyabazinga wa Isiraeli, era osiige ni Elisha mutabane wa Shafati ow'e Abeli Mehola abe omulanzi mu kifo kyo.

¹⁷ Kale omuntu yeenayeena anaawonanga okwitibwa Hazaeli, aidha kwitibwanga Yehu. Ate anaawonanga okwitibwa Yehu, aidha kwitibwanga Elisha.

¹⁸ “Aye ndirekagho abantu kasanvu (7,000) mu Isiraeli, abo boonaboona abataakubiranga Baali makiryaivu era abataamunhwegeranga.”

Elisha ayetebwa

¹⁹ Kale Eliya yaaja, yaayagaana Elisha mutabane wa Shafati ng'ali kulimisa ente yali n'emiyimbo gy'ente ikumi n'ebiri agho, nga mu kiseera ekyo yali ali kulimisa omuyimbo ogweikumi n'ebiri. Agho Eliya yaabita gh'ali, yaamusuulaku ekivaalo kye.

²⁰ Elisha yaaleka agho ente, yaalumuka embiro okunonereza Eliya, yaamukoba ati: “Ka mmale okunhwegera lata ni maama, memale ndidhe nje n'iwe.” Eliya yaamukoba ati: “Irayo, nze nkulobeire?”

²¹ Agho yaasooka yaaleka eby'okunonereza Eliya, yairayo, yaagema ente dhe yali ali kulimisa, yaadhiita. Yaafumba emamba yaadho ng'akozesa ebikoligo byadho ng'enku, yaagigabula abantu baalya. Ebyo bwe byawa, Elisha yaaja yaabanga ewa Eliya ng'amugheereza.