1 Bakyabazinga 18 - Baibuli Ekibono kya Katonda 2014

Eliya n'abalanzi b'omusambwa Baali

¹ Nga ghabiseeghooku ekiseera, Musengwa Katonda yaakoba Eliya mu mwaka ogwokusatu ogw'endoboozi, ati: “Ja weeyoleke y'Ahabu. Ndidha kugwisa amaadhi ku nsi.”

² Kale Eliya yaaja yeeyoleka y'Ahabu. Olwo endhala yali eri kuluma inho mu Samaria.

³ Kale Ahabu yaayeta Obadia eyali nga n'alabirira ekisaagaati kya kyabazinga. Obadia oyo yali ng'ata inho mu Musengwa Katonda ekitiisa,

⁴ era Yezebeli bwe yaita abalanzi ba Musengwa Katonda, Obadia oyo yaatwala abalanzi kikumi yaabagisa mu mpuku mu bikunsu bibiri eby'abantu ataanu ataanu. Era yaabafuniranga emere n'amaadhi.

⁵ Agho Ahabu yaakoba Obadia ati: “Ja ku nsulo edh'amaadhi dhoonadhoona ni mu biiko. Oba katyo tunaayagaanayo eisubi, twawonia embalaasi n'enhumbu okufa, olwo tulobe kubaaku nsolo dhe tufiirwa.”

⁶ Kale baisania bombi ekitundu ky'ensi buli muntu ky'anaalambuula. Ahabu yaagema ku luuyi olundi, ni Obadia yaagema ku lundi.

⁷ Obadia bweyali mu ngira ng'ali kutambula, yaja okubona ng'ayagaanana n'Eliya. Obadia yaamutegeera nga n'Eliya, agho yaakuba amakiryaivu era yaakutama n'ekyeni kyatuuka ku itaka, ng'akoba ati: “Bwenebwene niiwe musengwa wange Eliya?”

⁸ Eliya yaamwiramu ati: “Ninze. Ja okobere musengwa wo kyabazinga oti ndi ghano.”

⁹ Obadia yaakoba ati: “Kibi ki kye nakola memale oyende okumpaayo ye kyabazinga Ahabu andhite?

¹⁰ Ndayira mu Musengwa Katonda wo, nti ezirayo ighanga waire obwakyabazinga, musengwa wange kyabazinga y'ataatumya kukunooniayo. Era bwe baakobanga bati, ‘Ghano aziragho’, ng'alayiza obwakyabazinga obwo oba eighanga eryo, okukakasa nga tibakubonangaku.

¹¹ Mpegaano iwe oli kunkoba nje nkobere musengwa wange nti oli ghano.

¹² Aye naaba naakava gh'oli nti, ng'omwoyo gwa Musengwa Katonda gukutwala ye ntaidhi! Agho bwe nnaatuuka ni nkobera Ahabu, aye ate n'atasobola kukubona, aidha kundhita, ate nga nze omugheereza wo ndhisiisa ekitiisa mu Musengwa Katonda okuviira irala mu buto bwange.

¹³ Musengwa Katonda wange, tibaakukobera kye nakola, Yezebeli bweyali ng'ali kwita abalanzi ba Musengwa Katonda? Natwala abantu kikumi ku balanzi ba Musengwa Katonda abo, naabagisa mu mpuku mu bikunsu bya bantu makumi ataanu ataanu, era naabafuniranga emere n'amaadhi.

¹⁴ Kale mpegaano iwe butya bw'onkoba nje nkobere musengwa wange nti oli ghano? Aidha kundhita bwite.”

¹⁵ Eliya yaakoba ati: “Ndayira mu Musengwa Katonda omulamu Afuga Amagye, ye mpeereza, nti bwenebwene ndidha kweyolekera kyabazinga olwaleero.”

¹⁶ Kale Obadia yaaja ye Ahabu, yaamukobera. Era Ahabu yaaja okubona Eliya.

¹⁷ Ahabu bwe yabona Eliya, yaamukoba ati: “Bwenebwene obwo niiwe otabulatabula Isiraeli?”

¹⁸ Eliya yaamwiramu ati: “Nze ti ninze atabulatabula Isiraeli, aye niiwe n'ab'endhu ya lata wo, kuba mwava ku biragiro bya Musengwa Katonda mwasinza emisambwa Baali.

¹⁹ Mpegaano ni, soloza Abaisiraeli boonaboona, baidhe twagaanane ku lusozi Karumeli, ghalala n'abalanzi ba Baali ebikumi ebina n'ataanu (450) era n'abalanzi ebikumi ebina (400) ab'omusambwa omukazi Ashera, abalya ku kiiwulo kya Yezebeli.”

²⁰ Kale Ahabu yaayetesa Abaisiraeli boonaboona, beesololeza ku lusozi Karumeli ghalala n'abalanzi boonaboona.

²¹ Agho Eliya yaaja eri abantu abo boonaboona, yaabakoba ati: “Mulituusa li okuyuugira eno n'ere nga timusalagho? Oba nga Musengwa Katonda ni Katonda, oyo ye mube musinze. Aye oba nga Baali ni Katonda, kale musinze oyo.” Aye abantu baaloba kumwiramu kibono waire ekirala.

²² Agho Eliya yaakoba abantu ati: “Ninze zenka omulanzi wa Musengwa Katonda akaasigairegho, aye abalanzi ba Baali bali ebikumi bina n'ataanu.

²³ Kale batughe ente enume ibiri. Abalanzi ba Baali balondeku enaaba eyaibwe, bagisalesalemu bagite ku nku, aye batagikunaaniaku muliro. Zeena ndidha kutegeka ente ere eyindi, ngite ku nku nga tigikunaaniizaaku muliro.

²⁴ Olwo imwe mwidha kweta omusambwa gwaimwe, ate nze ndhete Musengwa Katonda. Kale oyo anaasindika omuliro mu kuvugira, nga ni Katonda.” Abantu boonaboona bairamu bati: “Ky'okobye kirungi.”

²⁵ Agho Eliya yaakoba abalanzi ba Baali ati: “Mwerondereku ente ndala era niimwe mube musooke okubaaga, kuba muli kamaala, memale mwete omusambwa gwaimwe. Aye mutagikunaaniaku muliro.”

²⁶ Abalanzi ba Baali baatwala ente ye baabagha, baagitegeka. Agho baayeta omusambwa baali okuva ku nkyo okutuuka mu kasana ghagati, nga bakoba bati: “Wo Baali, wulira otwiremu.” Aye ghaaloba kubaagho mamiro gawulikika, waire okubaagho airamu. Baatuumiratuumira gh'alutaari ye baazimba.

²⁷ Mu kasana ghagati Eliya yaabakiina, ng'akoba ati: “Mwete inho, kuba oyo katonda mwene. Bw'ataba nga ghaligho ky'ali kulowooza einho, asobola okuba ng'ajiire kwetereezaaku, oba ng'aliku gh'ajiire mu lugendo. Oba katyo asobola okuba ng'atendwike, nga kyetaagisa okumuzuusa.”

²⁸ Abalanzi ba Baali baayeta inho, era beesala n'empiima n'ebyambe, nga bweyali empisa yaibwe, okutuusa omusaayi okukuuluula.

²⁹ Ekiseera eky'omu kasana ghagati bwe kyabita, beeyongera okweyasa okutuuka ku kiseera ekyeigulo eky'okughaayo emisengo. Aye ghaaloba kubaagho mamiro gawulikika, waire okubaagho abairamu, oba abafaaku.

³⁰ Agho Eliya yaakoba abantu boonaboona ati: “Museete ghano ghe ndi.” Abantu boonaboona baaseeta gh'ali. Yaazimba buyaaka alutaari ya Musengwa Katonda eyali emenheibwagho.

³¹ Yaatoola amabaale ikumi n'abiri, ng'ajiira ku bungi obw'ebika eby'abantu ebisimuka mu Yakobo. Yakobo oyo, Musengwa Katonda ye yakoba ati: “Oidha kwetebwanga Isiraeli.”

³² Amabaale ago yaagazimbisa alutaari ey'okusinzizangaku Musengwa Katonda. Yaagisimaku olukonko okugyezunguluza, nga lujaamu lita ng'oti ikumi na ina edh'amaadhi.

³³ Agho yaatindirira enku ku alutaari, yaasalasala mu nte, yaagita ku nku edho. Yaakoba ati: “Mwidhuze ensugha ina amaadhi, mumale mugafuke ku kigheebwayo ekyo ekyokebwa ni ku nku.” Baakola batyo.

³⁴ Yaakoba ati: “Kabiri mukole mutyo omukuzi ogwokubiri.” Baakola batyo omukuzi ogwokubiri. Era yaakoba ati: “Kabiri mukole mutyo n'omukuzi ogwokusatu.” Era baakola batyo n'omukuzi ogwokusatu.

³⁵ Amaadhi gaakuuluula okwezungulula alutaari, gaidhuza n'olukonko.

³⁶ Ekiseera eky'okughaayo ekigheebwayo ekyeigulo bwe kyatuuka, Eliya omulanzi yaaseeta kumpi ni alutaari, yaakoba ati: “Wo Musengwa Katonda, Katonda wa Aburahamu, owa Isaaka, era owa Yakobo, olwaleero ka bakimanhe nga niiwe Katonda mu Isiraeli, era nga nze ndi mugheereza wo, era nga bino byonabyona mbikoze nga iwe omaze kundagira.

³⁷ Wo Musengwa Katonda ndhiraamu, nkweghembye ndhiraamu, abantu bano baghange okumanha nga iwe Musengwa Katonda, niiwe Katonda, era ng'okyusiisa emyoyo gyaibwe okugiiza y'oli.”

³⁸ Agho Musengwa Katonda yaasindika omuliro gwaika, gwayokya ekigheebwayo ekyo n'enku n'amabaale n'eitaka, era gwakaza amaadhi agaali mu lukokonko.

³⁹ Abantu boonaboona bwe baabona ekyo, baakuba amakiryaivu era baakutama n'ebyeni bya tuuka ku itaka. Baakoba bati: “Musengwa Katonda ni Katonda! Musengwa Katonda ni Katonda!”

⁴⁰ Agho Eliya yaabakoba ati: “Mugeme abalanzi ba Baali, ghalobe kubaagho alumukagho waire omulala.” Kale baabagema. Eliya yaabaserengesa ku kaiga Kishoni, yaabaitira eyo.

Ekiseera eky'endoboozi kiwaaku

⁴¹ Agho Eliya yaakoba kyabazinga Ahabu ati: “Ja olye, onhwe. Ndi kuwulira okuwuuma okw'amaadhi amangi agatoonha.”

⁴² Kale Ahabu yaaja okulya n'okunhwa. Ate Eliya yaaja ku ntwiko y'olusozi Karumeli, yaakutama ku itaka, yaata omutwe gwe mu bikiryaivu bye.

⁴³ Yaakoba omugheereza we ati: “Ja ghaigulu olinge ku luuyi olw'enhandha.” Omugheereza yaaja ghaigulu yaalingayo. Yaakoba ati: “Ezirayo kintu.” Eliya yaamukoba ati: “Irayo emikuzi musanvu.”

⁴⁴ Ku mukuzi ogwomusanvu, omugheereza yaakoba ati: “Mboine, akale akatono akaaga ng'oti mukono gwa muntu, kali kusituka nga kava ku nhandha.” Eliya yaakoba omugheereza we ati: “Ja okobe kyabazinga Ahabu oti, ‘Tegeka ekigaali kyo eky'omu lutalo, oireyo eka ng'amaadhi gakaali kukulobera.’ ”

⁴⁵ Mu kaseera katono, eigulu lyazibirira n'ebire, empewo yaatoolera okukunta, amaadhi gaagwa ebitaloodheka. Ahabu yaaniina mu kigaali kye eky'omu lutalo, yaavuga yaaja e Yezireeli.

⁴⁶ Agho amaani ga Musengwa Katonda gaidha ku Eliya, yaanhweza ekivaalo kye mu nkende, yaalumuka yeesooka Ahabu aghaingirirwa e Yezireeli.