1 Bakyabazinga 17 - Baibuli Ekibono kya Katonda 2014

Eliya alanga ekiseera eky'endoboozi

¹ Agho Eliya Omutishube ow'e Tishube, eky'omu Gileadi, yaakoba kyabazinga Ahabu ati: “Ndayira mu Musengwa Katonda wa Isiraeli, Katonda oyo omulamu ye mpeereza, nti bwenebwene tighaidha kubangagho musulo waire amaadhi mu myaka gino, okutoolaku nga nkobye nti bibeegho.”

² Agho Musengwa Katonda yaakoba Eliya ati:

³ “Va ghano oje e buvandhuba, weegise okumpi n'akaiga Kerithi, e buvandhuba wa Yorudani.

⁴ Mu kaiga ako mw'oidha okutoolanga amaadhi ag'okunhwa, era ndagiire amakoova gakuleeterenga eby'okulya.”

⁵ Kale Eliya yaakola nga Musengwa Katonda bwe yamulagira. Yaaja yaaba okumpi n'akaiga Kerithi, e buvandhuba wa Yorudani.

⁶ Amakoova gaamuleeteranga emere n'emamba enkyo n'eigulo, era yaanhwanga amaadhi mu kaiga ako.

⁷ Bwe ghaabitaghooku ekiseera, akaiga kaakamiira olw'amaadhi obutagwa mu nsi eyo.

Eliya ni namwandu ow'e Zarefathi

⁸ Agho Musengwa Katonda yaakoba Eliya ati:

⁹ “Situka oje e Zarefathi eky'omu Sidoni, obe eyo. Ndagiire namwandu okukughanga eby'okulya eyo.”

¹⁰ Agho Eliya yaasituka, yaaja e Zarefathi. Bwe yatuuka ku mulyango ogw'ekibuga, yaayagaanagho namwandu ng'ali kulondereza obuku. Yaamweta, yaamukoba ati: “Nkweghembye ndeetera ku maadhi nhweku.”

¹¹ Omukazi bweyali ng'ali kuja okugaleeta, Eliya yaamweta yaamukoba ati: “Nkweghembye ndeeteraayooku ni ku kamere.”

¹² Omukazi yaakoba ati: “Ndayira mu Musengwa Katonda wo omulamu, nti bwenebwene nzira mere, okutoolaku omuganda ogw'obuwunga bw'engaano mu kaibo, n'otuzigo mu kadoome. Era mpegaano ndi kulondereza ku buku, nje eka, neefumbire akamere ako, nze n'omwana wange tukalye, memale tumale tufe endhala.”

¹³ Agho Eliya yaamukoba ati: “Otatya. Ja okole nga bw'okobye. Aye sooka onfumbireku akamere okandeetere, memale weefumbire iwe n'omwana wo

¹⁴ kuba Musengwa Katonda, Katonda wa Isiraeli akoba ati, ‘Obuwunga obw'engaano mu kaibo ako tibuja kuwaagho, n'akadoome ak'omuzigo tikaja kuwaamu, okutuusa ng'olunaku Musengwa Katonda lw'anaagwisa amaadhi ku nsi lutuuse.’ ”

¹⁵ Omukazi yaaja yaakola nga Eliya bwe yamukoba. Agho omukazi oyo, n'Eliya, ghalala n'ab'endhu y'omukazi oyo, baaba n'emere ey'okulya, okumala enaku kamaala.

¹⁶ Obuwunga obw'engaano tibwawa mu kaibo, n'akadoome tikaawaamu muzigo, nga Musengwa Katonda bwe yakoba ng'abita mu Eliya.

¹⁷ Nga ghabiseeghooku entangama, omwana w'omukazi oyo mwene ndhu, yaalwala. Obulwaire bwamutaamirira, yaawaamu n'akagheera.

¹⁸ Agho omukazi yaakoba Eliya ati: “Ondiku nzigu yaaki, iwe omuntu wa Katonda? Waidha ghano kwidhusa Katonda bibi byange, na kwitisa mwana wange?”

¹⁹ Eliya yaamukoba ati: “Leeta omwana wo.” Agho yaamumutoola mu kifuba, yaamubbeeda yaamutwala mu kisenge ekya ghaigulu mu kalina, mwene ye yasulanga, era yaamulambaaza ku buliri bwe bwene.

²⁰ Yeeghemba Musengwa Katonda ng'akoba ati: “Wo Musengwa Katonda wange, obwo otuusiisa akabi ni ku namwandu ono ansuza, waita omwana we?”

²¹ Agho yeegololera ku mwana emikuzi esatu, yeeghemba Musengwa Katonda ng'akoba ati: “Wo Musengwa Katonda wange, ganha omwana ono airemu obulamu.”

²² Musengwa Katonda yaikiriza Eliya kye yamusaba, omwana yaira engulu, yaalamuka.

²³ Agho Eliya yaagema omwana yaamutoola mu kisenge ekya ghaigulu mu kalina, yaamutwala yaamugha inhina, ng'akoba ati: “Omwana wo wuuno mulamu.”

²⁴ Agho omukazi yaakoba Eliya ati: “Mpegaano mmanhiire irala ng'oli muntu wa Katonda, era nga bwenebwene Musengwa Katonda ky'ayogera ng'abita mu iwe kiba kya mazima.”