1 Bakyabazinga 16 - Baibuli Ekibono kya Katonda 2014

¹ Agho Musengwa Katonda yaayogera ni Yehu mutabane wa Hanani, yaamugha obukwenda obw'okutwalira Baasha okumuvumirira, ati:

² “Walinga ng'oli bw'agho otyo, naakugulumiza, naakufuula mukulembeze ow'abantu bange Abaisiraeli. Aye weena ogemye empisa dha Yeroboamu embi, waaleetera abantu bange Abaisiraeli okwonoona, naabasungughalira olw'ebibi byaibwe.

³ Kale ni ndidha kusaanizaagho irala ab'endhu yo boonaboona, nga bwe nasaanizaagho irala ab'endhu ya Yeroboamu mutabane wa Nebati.

⁴ Iwe Baasha, omuntu wo yeenayeena anaafiiranga mu kibuga, embwa dhiidha kumulyanga, n'oyo yeenayeena anaafiiranga mu nsiko enhonhi dhiidha kumulyanga.”

⁵ Ebindi byonabyona Baasha bye yakola eby'amaani, byaghandiikibwa mu Kitabo ky'Ebyomubyanda bya Bakyabazinga ba Isiraeli.

⁶ Agho Baasha yaafa, yeeyimba ku badhaadha be abaafa, era yaaziikibwa e Tiruza. Mutabane we Ela, yaamusikira ku bwakyabazinga.

⁷ Mu butuufu Musengwa Katonda yayogera ng'abita mu mulanzi Yehu mutabane wa Hanani, yaavumirira Baasha n'ab'endhu ye, olw'ebibi byonabyona Baasha oyo bye yakola n'asungughaza Musengwa Katonda. Yasungughaza Musengwa Katonda ti lwa bibi bye yakola byonka nga Yeroboamu eyamusooka bwe yakola, aye n'olw'okwita ab'endhu ya Yeroboamu oyo boonaboona.

Kyabazinga Ela owa Isiraeli

⁸ Mu mwaka ogwamakumi abiri n'omukaaga (26) ogwa Asa nga n'afuga Buyudaaya, Ela mutabane wa Baasha yaafuuka kyabazinga wa Isiraeli, era yaafugira entangama ya myaka ebiri mu Tiruza.

⁹ Aye Zimuri, owundi ku bakungu be eyaduumiranga ekitundu ku bigaali bye eby'omu lutalo, yaamulyamu olukwe. Lwali lulala, Ela yaanhwa omwenge, yaatamiirira mu maka ga Aruza eyalabiriranga ekisaagaati kya kyabazinga e Tiruza

¹⁰ Zimuri yaingira, yaamufumita yaamwita. Agho Zimuri oyo yaamusikira ku bwakyabazinga, mu mwaka ogwamakumi abiri n'omusanvu (27) ogwa kyabazinga Asa nga n'afuga Buyudaaya.

¹¹ Zimuri olwamala okufuuka kyabazinga, nga yaakatyama ati ku kityamo kye eky'obwakyabazinga, yaita ab'endhu ya Baasha boonaboona obutalekaagho naire omwana eyetebwa omulenzi, k'abe owuwe mwene, oba ow'ab'oku lulyo lwe, waire owa bakagwa be.

¹² Mu nsambo eyo, Zimuri yaazikiriza ab'endhu ya Baasha boonaboona, nga Musengwa Katonda bwe yayogera ng'abita mu mulanzi Yehu.

¹³ Ebyo byaligho, lwa kuba ebibi byonabyona Baasha ni mutabane we Ela bye baakola nga basinza ebitali Katonda, era ni bye baakola ebyaleetera Isiraeli okwonoona, byasungughaza Musengwa Katonda, Katonda wa Isiraeli.

¹⁴ Ebindi byonabyona Ela bye yakola, byaghandiikibwa mu Kitabo ky'Ebyomubyanda bya Bakyabazinga ba Isiraeli.

Kyabazinga Zimuri owa Isiraeli

¹⁵ Mu mwaka ogwamakumi abiri n'omusanvu (27) ogwa kyabazinga Asa nga n'afuga Buyudaaya, Zimuri yaafuuka kyabazinga, era yaafuga okumala entangama ya nnaku musanvu e Tiruza. Abaisirukale Abaisiraeli baali nga bazingiiza ekibuga Gibbethoni eky'Abafilisiti okukyezunguluza.

¹⁶ Era ab'amagye abo bwe baawulira nga Zimuri yaliire mu kyabazinga olukwe yaamwita, ku lunaku lwene olwo boonaboona, baafuula Omuri omuduumizi w'eigye okuba kyabazinga wa Isiraeli.

¹⁷ Kale Omuri oyo n'Abaisiraeli boonaboona, baava e Gibbethoni, baaja baazingiza ekibuga Tiruza okukyezunguluza.

¹⁸ Zimuri bwe yabona ng'ekibuga bakighambye, yaingira mu kifo eky'okwewogomamu eky'omu kisaagaati kya kyabazinga. Agho yaakunaania ku kisaagaati ekyo omuliro, ni mwene yeeyokeramu, yaafa.

¹⁹ Yafa olw'ebibi bye, bye yakola eri Musengwa Katonda nga Yeroboamu bwe yakola, n'aleetera Isiraeli okwonoona. Zimuri oyo yakola nga Yeroboamu bwe yakola, yaasungughaza Musengwa Katonda olw'ebibi bye mwene bye yakola, era yaamusungughaza olw'okuleetera Isiraeli okwonoona.

²⁰ Ebindi byonabyona Zimuri bye yakola, omuli n'olukwe lwe yakola, byaghandiikibwa mu Kitabo ky'Ebyomubyanda bya Bakyabazinga ba Isiraeli.

Kyabazinga Omuri owa Isiraeli

²¹ Agho Abaisiraeli beesalamu ebitundu bibiri: abandi nga benda Tibuni mutabane wa Ginathi ye babe bafuule kyabazinga, ate abandi nga benda Omuri.

²² Abaayenda Omuri baasinza amaani bale abaayenda Tibuni mutabane wa Ginathi. Kale Tibuni yaafa, ate Omuri yaafuuka kyabazinga.

²³ Kale kyaba nti, mu mwaka ogwamakumi asatu n'omulala (31), ogwa kyabazinga Asa nga n'afuga Buyudaaya, Omuri yaafuuka kyabazinga wa Isiraeli, era yaafuga okumala entangama ya myaka ikumi n'ebiri. Ku myaka egyo eikumi n'ebiri, omukaaga yaagifugira mu Tiruza.

²⁴ Yaagula ku Shemeri olusozi Samaria ebitundu kakaaga (6,000) ebya feeza, yaaluzimbaku ekibuga. Ekibuga ekyo kye yaluzimbaku yaakituuma eriina Samaria, ng'ajiira ku liina lya Shemeri eyali mwene lusozi olwo.

²⁵ Omuri oyo yaakola ebibi eri Musengwa Katonda, yaayonoona okusinga n'abaamusooka boonaboona.

²⁶ Yaakolera irala nga Yeroboamu mutabane wa Nebati bwe yakola, n'asungughaza Musengwa Katonda, Katonda wa Isiraeli era n'aleetera Abaisiraeli okwonoona nga basinza ebisinzibwa ebitali Katonda.

²⁷ Ebindi byonabyona Omuri bye yakola eby'amaani, byaghandiikibwa mu Kitabo ky'Ebyomubyanda bya Bakyabazinga ba Isiraeli.

²⁸ Agho yaafa, yeeyimba ku badhaadha be abaafa, era yaaziikibwa mu Samaria. Mutabane we Ahabu, yaamusikira ku bwakyabazinga.

Kyabazinga Ahabu owa Isiraeli

²⁹ Mu mwaka ogwamakumi asatu n'omunaana (38) ogwa kyabazinga Asa nga n'afuga Buyudaaya, Ahabu mutabane wa Omuri yaafuuka kyabazinga wa Isiraeli, era yaafuga Isiraeli ng'ali mu Samaria okumala entangama ya myaka amakumi abiri n'ebiri.

³⁰ Ahabu oyo mutabane w'Omuri, yaakola ebibi eri Musengwa Katonda, okusinga n'abaamusooka boonaboona.

³¹ Eky'okukola ebibi nga Yeroboamu mutabane wa Nebati bwe yakola tikyamumala ng'oti se kitono, aye yaataaku n'okubayiza Yezebeli, mughala wa kyabazinga Ethibaali ow'Abasidoni. Ahabu oyo era yaatuuka n'okuja okugheereza omusambwa Baali era n'okugusinza.

³² Yaazimbira omusambwa ogwo eisabo mu Samaria, era munda mu isabo eryo yaaguzimbiramu alutaari.

³³ Ahabu era yaakola ekifaananie ky'omusambwa omukazi Ashera. Ahabu oyo yaakola ebisungughaza Musengwa Katonda, Katonda wa Isiraeli, okusinga bakyabazinga boonaboona aba Isiraeli abaamusooka.

³⁴ Mu biseera bye yafugiramu, Hieli ow'e Betheli mwe yazimbira obuyaaka ekibuga Yeriko. Bwe yali ng'ataagho omusingi gw'ekibuga ekyo, yaafiirwa mutabane we omuberi Abiramu. Ate bweyali aghangamu endhigi dhaakyo, yaafiirwa mutabane we Segubu, eyali nga n'asembayo obuto. Ebyo byali bityo, okutuukiriza Musengwa Katonda bye yakoba ng'abita mu Yoshua mutabane wa Nuni.