1 Bakyabazinga 15 - Baibuli Ekibono kya Katonda 2014

Kyabazinga Abiyamu ow'e Buyudaaya

¹ Agho mu mwaka ogweikumi n'omunaana nga kyabazinga Yeroboamu mutabane wa Nebati n'afuga Isiraeli, Abiyamu yaafuuka kyabazinga wa Buyudaaya.

² Yaafugira entangama ya myaka esatu mu Yerusalemu. Inhina yali nga ni Maaka, mughala wa Abishalomu.

³ Abiyamu oyo yaakola ebibi nga lata we bwe yakola. Yaaloba kugumira ku Musengwa Katonda we, nga dhaadha we Daudi bwe yamugumiraku.

⁴ Aye ku lwa Daudi, Musengwa Katonda yaagha Abiyamu oyo omwana omulenzi okumusikira ku bwakyabazinga mu Yerusalemu, n'okukuuma Yerusalemu nga kiri miraala.

⁵ Musengwa Katonda yaakola ekyo, kuba Daudi yakolanga ebituufu mu maiso ga Musengwa Katonda oyo, era tiyavanga ku kye yamulagira enaku dhoonadhoona edh'obulamu bwe, okutoolaku ekyo kye yakola Uria Omuhitti.

⁶ Ekiseera kyonakyona Abiyamu kye yamala ng'afuga, entalo edhaatanukagho ghagati gha Rehoboamu ni Yeroboamu dhaasigala nga dhikaaja mu maiso.

⁷ Era dhaaligho ghagati gha Abiyamu oyo ni Yeroboamu. Ebindi byonabyona Abiyamu bye yakola, byaghandiikibwa mu Kitabo eky'Ebyomubyanda bya Bakyabazinga ba Buyudaaya.

⁸ Agho Abiyamu oyo yaafa, yeeyimba ku badhaadha be abaafa, era yaaziikibwa mu kyetebwa Ekibuga kya Daudi. Mutabane we Asa yaamusikira ku bwakyabazinga.

Kyabazinga Asa ow'e Buyudaaya

⁹ Agho mu mwaka ogwamakumi abiri (20) nga kyabazinga Yeroboamu n'afuga Isiraeli, Asa yaafuuka kyabazinga wa Buyudaaya.

¹⁰ Yaafugira entangama ya myaka amakumi ana na mulala (41) mu Yerusalemu. Dhaadha we omukazi nga ni Maaka mughala wa Abishalomu.

¹¹ Asa oyo yaakolanga ebituufu mu maiso ga Musengwa Katonda, nga dhaadha we Daudi bwe yakolanga.

¹² Yaatoolagho mu nsi eyo omuze ogw'abasaadha ogw'okukolanga obwamalaaya obw'omu isabo. Era yaatoolagho n'ebisinzibwa ebitali Katonda, badhaadha be bye baakola.

¹³ Era yaatoola ni ku dhaadha we Maaka ekitiibwa eky'okuba inhina owa kyabazinga, kuba Maaka oyo yali n'ekifaananie ekyenhinhalwa ekyasinzibwanga eky'omusambwa omukazi Ashera. Asa yaatemagho ekifaananie ekyo, yaakyokera ku kaiga Kiduroni.

¹⁴ Aye waire Asa oyo tiyatoolagho bifo bigulumivu bye baasinzizangamu emisambwa, obulamu bwe bwonabwona yali mwesigwa ye Musengwa Katonda.

¹⁵ Yaata mu isinzizo ebintu lata we bye yeeyama okughaayo bibe ebya Musengwa Katonda, era ni mwene bye yeeyama okughaayo, ebya zaabu ni feeza.

¹⁶ Asa kyabazinga wa Buyudaaya oyo ni Baasha kyabazinga wa Isiraeli, baalwanagananga mu ntalo mu kiseera kyonakyona eky'obufuzi bwaibwe.

¹⁷ Kyabazinga Baasha owa Isiraeli yaalumba Buyudaaya. Yaazimba ekimante ekigumu okwezunguluza ekibuga Rama, ghalobe kubaagho ava mu Buyudaaya, waire ajaayo okutuuka ku kyabazinga waayo Asa.

¹⁸ Agho Asa yaatoolayo feeza yeenayeena ni zaabu eyali asigaire mu iterekero ly'eisinzizo ni mu iterekero erirye nga kyabazinga, yaamugemya abagheereza be bamutwalire kyabazinga Benihadadi ow'e Siria, eyabanga mu Damasiko. Benihadadi oyo, nga ni mutabane wa Taburimmoni era mwidhukulu wa Hezironi. Kyabazinga Asa yaagheereza kyabazinga Benihadadi obukwenda obukoba buti:

¹⁹ “Ka tukole endagaano ey'enkolagana ey'aghalala, nga balata baife ye baakola. Bona eno, nkugheereiza ekirabo ekya feeza ni zaabu. Ja omenhegho endagaano yo ey'enkolagana ni kyabazinga Baasha owa Isiraeli, olwo abe ng'ali n'okutoola amagye ge mu kiketezo kyange.”

²⁰ Agho Benihadadi yaaganha kyabazinga Asa bye yamukoba. Yaatuma abaduumizi b'eigye lye okulumba ebibuga bya Isiraeli, yaagema ebibuga bino: Iyoni, ni Dani, ni Abeli Bethi Maaka, ni Kinnerothi, n'ekiketezo kyonakyona ekya Nafutali.

²¹ Kyabazinga Baasha bwe yawulira ebigwiregho, yaalekera agho okuzimba ekimante ekigumu okwezunguluza ekibuga Rama, yaaja yaaba e Tiruza.

²² Agho kyabazinga Asa yaagha Abayudaaya boonaboona ekiragiro, aghazira okulekayo waire omulala ati, baaja baatoola e Rama amabaale n'emiti Baasha bye yali ali kuzimbisa. Asa yaabizimbisa ekimante ekigumu okwezunguluza ebibuga Mizipa era ni Geba eky'omu kiketezo kya Benjamini.

²³ Ebindi byonabyona Asa bye yakola eby'amaani, n'ebibuga bye yazimba, byaghandiikibwa mu Kitabo ky'Ebyomubyanda bya Bakyabazinga ba Buyudaaya. Aye mu biseera eby'obukaire bwe, yalwala ebigere.

²⁴ Agho Asa oyo yaafa, yeeyimba ku badhaadha be abaafa, era yaaziikibwa mu badhaadha be abo, mu kyetebwa Ekibuga kya Daudi dhaadha we. Mutabane we Yehoshafati, yaamusikira ku bwakyabazinga.

Kyabazinga Nadabu owa Isiraeli

²⁵ Agho mu mwaka ogwokubiri nga kyabazinga Asa n'afuga Buyudaaya, Nadabu mutabane wa Yeroboamu yaafuuka kyabazinga wa Isiraeli, era yaafugira entangama ya myaka ebiri.

²⁶ Yaakola ebibi eri Musengwa Katonda nga lata we bwe yakola n'ayonoona, era n'aleetera ni Isiraeli okwonoona.

²⁷ Agho Baasha mutabane wa Ahiya ow'omu kika kya Issakari, yaalya mu Nadabu oyo olukwe era yaamwitira e Gibbethoni eky'Abafilisiti, Nadabu oyo n'Abaisiraeli boonaboona kye baali bazingiiza okwezunguluza.

²⁸ Yamwita mu mwaka ogwokusatu ogwa kyabazinga Asa nga n'afuga Buyudaaya. Kale Baasha yaasikira Nadabu oyo ku bwakyabazinga bwa Isiraeli.

²⁹ Era olwamala okufuuka kyabazinga ati, ng'atoolera kwita ba ndhu ya Yeroboamu boonaboona okubasaaniagho, nga Musengwa Katonda bwe yayogera ng'abita mu mugheereza we omulanzi Ahiya ow'e Shilo.

³⁰ Ebyo byaligho olw'ebibi Yeroboamu bye yakola, n'aleetera Isiraeli okwonoona, era n'asungughaza Musengwa Katonda, Katonda wa Isiraeli.

³¹ Ebindi byonabyona Nadabu bye yakola, byaghandiikibwa mu Kitabo ky'Ebyomubyanda bya Bakyabazinga ba Isiraeli.

³² Kyabazinga Asa ni kyabazinga Baasha owa Isiraeli, bombi baalwanagananga mu ntalo ebiseera byonabyona eby'obufuzi bwaibwe.

Kyabazinga Baasha owa Isiraeli

³³ Agho mu mwaka ogwokusatu ogwa kyabazinga Asa nga n'afuga Buyudaaya, Baasha mutabane wa Ahiya yaafuuka kyabazinga wa Isiraeli yoonayoona, era yaafuga okumala entangama ya myaka amakumi abiri n'ena, ng'aba e Tiruza.

³⁴ Yaakola ebibi eri Musengwa Katonda nga Yeroboamu bye yakola, n'aleetera Isiraeli okwonoona.