1 Bakyabazinga 14 - Baibuli Ekibono kya Katonda 2014

Mutabane wa Yeroboamu afa

¹ Mu biseera ebyo, mutabane wa kyabazinga Yeroboamu yaalwala, eriina lye nga ni Abiya.

² Yeroboamu yaakoba mukazi we ati: “Kola weefuusefuuse olobe kumanhika nga niiwe mukazi wange. Olwo oje e Shilo eri omulanzi Ahiya, eyankoba ati ndiba kyabazinga w'abantu bano.

³ Mutwalire emigaati eminene ikumi, otwale ni ku migaati emitono, n'ekidoome eky'omudheenene gw'endhuki. Aidha kukukobera omwana bw'anaaba.”

⁴ Agho muka Yeroboamu yaakola atyo, yaasitula yaaja e Shilo, yaatuuka ku ndhu ya Ahiya. Ahiya yali takaaghanga kubona, ng'amaiso gamwidhieku ekifu olw'obukaire.

⁵ Musengwa Katonda yaakoba Ahiya ati: “Muka Yeroboamu wuuyo ali kwidha okukwebuuzaaku amanhe mutabane we bw'anaaba, kuba mulwaire. Kale oidha kumukoba oti n'oti.” Muka Yeroboamu bwe yatuuka, yeefuula okuba omukazi owundi.

⁶ Aye Ahiya yaawulira empindo dh'ebigere bye ng'atuuse ku mulyango okwingira. Yaakoba ati: “Muka Yeroboamu, ingira. Lwaki weefuula okuba omuntu owundi. Bye ntumiibwa okukukoba ti bikalamu naire.

⁷ Ja okobere Yeroboamu oti Musengwa Katonda, Katonda wa Isiraeli akoba ati, ‘Nakugulumiza, naakulondamu mu bantu, naakufuula omufuzi w'abantu bange Abaisiraeli.

⁸ Natoola obwakyabazinga ku b'endhu ya Daudi, naabukugha iwe. Aye tobaire ng'oti n'omugheereza wange Daudi, eyagema ebiragiro byange, n'agumira ku nze n'omwoyo gwe gwonagwona, n'akolanga ebyo byonka ebituufu mu maiso gange.

⁹ Wakola ebibi okusinga boonaboona abaakusooka okufuga. Wanvaaku waaja weekolera emisambwa n'ebifaananie mu kyuma ekisaanuusiibwa, waabisinza, olwo wandeetera okusungughala.

¹⁰ Kale ni bona eno, ndidha kutuusa akabi ku b'endhu yo iwe Yeroboamu, mmaliregho irala kiisi wa ku lulyo lwo ayetebwa omusaadha, k'abe omusibe oba ow'eidembe. Era ndidha kusaanizaagho irala ab'endhu yo, ng'oti n'omuntu bw'ayokya obusa okutuusa lwe buweekereragho bwonabwona.

¹¹ Kiisi wa ku lulyo lwo anaafiiranga mu kibuga, embwa dhiidha kumulyanga, ate anaafiiranga mu irungu, enhonhi dhimulyenga. Musengwa Katonda n'ayogeire ekyo.’ ”

¹² Ahiya yaayongera okukoba muka Yeroboamu ati: “Kale ni kola oireyo eka. Era olunaaniina ekigere mu kibuga oti, ng'omwana afa.

¹³ Abantu boonaboona mu Isiraeli baja kumulira, bamuziike. Ku bantu ab'oku lulyo lwa Yeroboamu, oyo yenka n'aidha okuziikibwa, kuba oyo n'ayagaaniibwa ng'alimu akalungi akasiimibwa Musengwa Katonda, Katonda wa Isiraeli.

¹⁴ Ate era olwaleero luno, Musengwa Katonda aja kweteeragho kyabazinga ow'okufuga Isiraeli. Kyabazinga oyo alisaaniagho ab'endhu ya Yeroboamu boonaboona.

¹⁵ N'okuva ku olwo, Musengwa Katonda aja kubonereza ensi Isiraeli edhugumire ng'oti n'olugada bwe lutengeeta mu maadhi. Era aja kutoola Abaisiraeli mu nsi eno enungi ye yagha badhaadha baibwe, abasansaanize eyo ng'osomoike omwiga Eufurate, kuba baamusungughaza nga beekolera ebifaananie by'omusambwa omukazi, Ashera.

¹⁶ Musengwa Katonda aja kulekulira agho Isiraeli olw'ebibi bya Yeroboamu bye yakola, n'ebyo bye yaleetera Abaisiraeli okukola.”

¹⁷ Agho muka Yeroboamu yaasituka yaagolola, yaatuuka e Tiruza. Bwe yali ali kwingira ati mu mulyango gw'endhu, omwana yaafa.

¹⁸ Isiraeli yoonayoona yaamulira era yaamuziika nga Musengwa Katonda bwe yakoba ng'abita mu mugheereza we omulanzi Ahiya.

Yeroboamu afa

¹⁹ Ebindi byonabyona Yeroboamu bye yakola, entalo dhe yalwana, n'ensambo ye yafugamu, byaghandiikibwa mu Kitabo ky'Ebyomubyanda bya Bakyabazinga ba Isiraeli.

²⁰ Yeroboamu oyo yafugira emyaka amakumi abiri, yaafa, yeeyimba ku badhaadha be abaafa. Agho mutabane we Nadabu yaamusikira ku bwakyabazinga.

Kyabazinga Rehoboamu ow'e Buyudaaya

²¹ Rehoboamu mutabane wa Solomoni yafuuka kyabazinga wa Buyudaaya ng'agheza emyaka amakumi ana na mulala (41). Yaafugira entangama ya myaka ikumi na musanvu (17) mu Yerusalemu, ekibuga Musengwa Katonda kye yalondamu okumusinzizangamu mu bibuga byonabyona eby'ebika bya Isiraeli. Inhina wa Rehoboamu oyo yali ayetebwa Naama, nga Muammoni.

²² Abantu ab'omu Buyudaaya baakola ebibi ebisinga ebya badhaadha baibwe boonaboona bye baakola. Kale baaleetera Musengwa Katonda okuba n'enkikidi ku lwaibwe.

²³ Baamusungughaza kuba boona beezimbira ku buli lusozi olugulumivu, na buli ghansi mu kinsense kya muti muzibirivu, baataagho ebifo ebigulumivu eby'okusinzizaamu, n'empango, n'ebifaananie eby'omusambwa omukazi, Ashera.

²⁴ Era mu nsi eyo mwalimu abasaadha abaakolanga obwamalaaya obw'omu isabo. Kale abantu ab'omu Buyudaaya baakolanga ebyenhinhalwa eby'abamaghanga agandi, Musengwa Katonda be yabinga mu nsi eyo ng'Abaisiraeli bali kumpi okugituukamu.

²⁵ Agho mu mwaka ogwokutaanu nga kyabazinga Rehoboamu n'afuga Buyudaaya, Shishaki kyabazinga w'e Misiri yaidha yaalumba Yerusalemu.

²⁶ Yaanhaga eby'obukombe eby'omu isinzizo n'eby'omu kisaagaati kya kyabazinga, byonabyona yaabitwala. Yaatwala n'engabo dhoonadhoona edha zaabu, Solomoni dhe yagheesa.

²⁷ Kyabazinga Rehoboamu yaagheesa engabo mu kyuma ky'ekikomo okwira mu kifo ky'edho, yaadhigemya abakulu ab'abakuumi abaakuumanga omulyango gw'ekisaagaati kye.

²⁸ Kyabazinga buli lwe yaingiranga mu isinzizo, ng'abakuumi batwala engabo edho, ate baamalanga baadhiizaayo mu ndhu mwe baadhikuumiranga.

²⁹ Ebindi byonabyona Rehoboamu bye yakola, byaghandiikibwa mu Kitabo eky'Ebyomubyanda bya Bakyabazinga ba Buyudaaya.

³⁰ Ekiseera ekyo kyonakyona, ghaabangagho entalo edhomwidhirano ghagati gha Rehoboamu ni Yeroboamu.

³¹ Rehoboamu yaafa, yeeyimba ku badhaadha be abaafa. Yaaziikibwa mu lwambiidhi lwa badhaadha be abo, mu kyetebwa Ekibuga kya Daudi. Inhina wa Rehoboamu yali ng'ayetebwa Naama, era nga Muammoni. Mutabane wa Rehoboamu oyo eyayetebwanga Abiyamu, n'eyasikira ise oyo ku bwakyabazinga.