1 Bakyabazinga 13 - Baibuli Ekibono kya Katonda 2014

¹ Agho omulanzi yaava mu Buyudaaya nga Musengwa Katonda n'amulagiire, yaaja e Betheli. Yaayagaana Yeroboamu ng'ayemereire aghali alutaari, okuniokeza obubbaani.

² Omulanzi oyo, yaavumirira alutaari eyo ng'ajiira ku ebyo Musengwa Katonda bye yamulagira, ati: “Alutaari iwe, alutaari iwe, Musengwa Katonda akoba ati, ‘Bona eno, omwana omulenzi alizaalibwa mu ndhu ya Daudi, ng'eriina lye ni Yosia. Aliitira ku iwe bakabona ab'ebifo ebigulumivu ebisinzibwamu abakuniokerezaaku obubbaani, baaba ng'oti n'omusengo ogugheebwayo. Era amagumba g'abantu galyokerwa ku iwe.’ ”

³ Era omulanzi oyo yaagha akamanhiso ku lunaku olwo, ati: “Kino kw'onaamanhira nga Musengwa Katonda n'ayogeire: alutaari eno eidha kumenhekagho, eivu erigiriku liyuyike.”

⁴ Agho kyabazinga Yeroboamu bwe yawulira ebyo omulanzi bye yayogera ng'avumirira alutaari mu Betheli, yaagalula omukono ghe yali gh'alutaari, yaamusonkaku ng'akoba ati: “Mumugeme!” Amangu ago omukono ogwo gwakadambala nga taghanga kugwiza.

⁵ Alutaari yoona yaamenhekagho, eivu eryagiriku lyayuyika okutuukiriza akamanhiso omulanzi ke yagha mu liina lya Musengwa Katonda.

⁶ Agho kyabazinga Yeroboamu yaakoba omulanzi ati: “Weeghembe Musengwa Katonda wo onsabire, omukono gwange gwiregho.” Omulanzi yeeghemba Musengwa Katonda, omukono gwa kyabazinga ogwo gwairagho, gwaba mu mbeera yaagwo eyabuliidho.

⁷ Kyabazinga yaakoba omulanzi ati: “Idha tuje eka ewange, olye ku mere oiremu amaani, era ndidha kukugha n'ekirabo.”

⁸ Omulanzi yaakoba kyabazinga ati: “Ni bwetugabaniramu ghagati obukombe bwonabwona obw'omu kisaagaati kyo, tiidha kuja n'iwe, waire okulya emere, oba okunhwa amaadhi mu kifo kino.

⁹ Musengwa Katonda atyo bwe yandagiire, ng'akoba ati, ‘Otalyayo mere waire okunhwayo amaadhi, era otairira mu ngira ye wagemye ng'ojaayo.’ ”

¹⁰ Agho yaabita mu ngira yindi, yaaloba kwirirayo mu eyo ye yabitamu ng'aja e Betheli.

Omulanzi omukaire ow'e Betheli

¹¹ Mu kiseera ekyo, ghaaligho omulanzi omukaire eyali ng'aba mu Betheli. Agho batabane be baidha, baamukobera byonabyona omulanzi ole eyava mu Buyudaaya bye yakola mu Betheli ku lunaku olwo. Era baamukobera n'ebyo bye yakoba kyabazinga Yeroboamu.

¹² Iseibwe yaababuuza ati: “Ngira ki ye yagemye ng'ali kwirayo?” Batabane be baamulagirira engira omulanzi oyo ye yagema.

¹³ Yaakoba batabane be ati: “Munteere ekintu ekityamibwaku ku ndogoyi.” Agho baakimuteera ku ndogoyi, yaatyama ku ndogoyi eyo era yaagivuga.

¹⁴ Yaalumuukirira omulanzi ole, yaamwagaana ng'atyaime ghansi gh'omuti omukologho. Yaamubuuza ati: “Niiwe omulanzi eyaviire mu Buyudaaya.” Ole yaamwiramu ati: “Ninze.”

¹⁵ Agho yaamukoba ati: “Idha tuje eka ewange, olye ku mere.”

¹⁶ Aye omulanzi ole yaamukoba ati: “Tighanga kwirayo n'iwe waire okwingira n'iwe mu ndhu, era tiidha kulya mere waire okunhwa amaadhi n'iwe mu kifo kino

¹⁷ kuba Musengwa Katonda yandagira ati, ‘Otalyayo mere waire okunhwayo amaadhi, era otairirayo mu ngira ye wagema ng'ojaayo.’ ”

¹⁸ Agho omulanzi omukaire ow'e Betheli yaamukoba ati: “Zeena ndi mulanzi ng'oti niiwe. Musengwa Katonda yalagiire malaika yankoba ati, ‘Ja omwize, aidhe n'iwe mu ndhu yo, alye ku mere era anhwe ni ku maadhi.’ ” Aye nga yali ali kumulimba.

¹⁹ Kale omulanzi eyava mu Buyudaaya yairayo ghalala n'omulanzi ow'e Betheli, yaalya emere mu ndhu ye era yaanhwa n'amaadhi.

²⁰ Agho bwe baali nga batyaime ku kiiwulo, ekibono kya Musengwa Katonda kyaidha y'omulanzi omukaire eyaiza ole.

²¹ Yaakoba omulanzi ole eyava mu Buyudaaya, ng'alangirira, ati: “Musengwa Katonda akoba ati, ‘Nga bw'odheemeire nze Musengwa Katonda wo kye nakukoba, n'otakola kye nakulagira,

²² aye n'oira, n'olya emere era n'onhwa amaadhi mu kifo kye nakulobera okulyamu emere n'okunhwamu amaadhi, omulambo gwo tiguliziikibwa mu badhaadha bo.’ ”

²³ Omulanzi omukaire bwe yamala okulya emere n'okunhwa, yaateera omulanzi ye yaiza ekintu ekityamibwaku ku ndogoyi ye.

²⁴ Era omulanzi oyo bweyali aja, yaayagaanana n'empologoma mu ngira, yaamwita. Omulambo gwe gwagwa agho mu ngira. Endogoyi n'empologoma byayemerera agho gha mbali ghaagwo.

²⁵ Abantu abaali nga bali kubitagho, baaja okulinga bati, nga babona omulambo ogugwire agho mu ngira, nga n'empologoma eyemereire kumpi nagwo. Baaja baakobera abantu ab'omu kibuga omulanzi omukaire mwe yabanga.

²⁶ Omulanzi omukaire eyaiza ole bwe yakiwulira, yaakoba ati: “Oyo n'omulanzi eyadheemera Musengwa Katonda kye yamulagira, olwo Musengwa Katonda oyo n'okumughaayo, empologoma n'emuyuzayuza n'emwita. Ekyo kyatuukiriza Musengwa Katonda oyo bye yakoba omulanzi oyo ati biidha kubaagho.”

²⁷ Agho yaakoba batabane be ati: “Munteere ku ndogoyi ekintu ekityamibwaku.” Baakimuteera ku ndogoyi.

²⁸ Yaavuga endogoyi, yaaja yaayagaana omulambo gw'omulanzi nga gugwire agho mu ngira. Era ng'endogoyi n'empologoma byemereire kumpi nagwo empologoma nga teguliire era nga teyuziizayuziiza ndogoyi.

²⁹ Omulanzi oyo omukaire, yaabbeeda omulambo yaaguta ku ndogoyi, yaira nagwo e Betheli mu kibuga okugulira n'okuguziika.

³⁰ Yaatoola omulambo ogwo, ogw'omulanzi oyo eyava mu Buyudaaya, yaaguta mu magombe agage mwene, era baalira omulanzi oyo bati: “Woowe, muganda wange kwe ndigwa!”

³¹ Bwe yamala okumuziika, yaakoba batabane be ati: “Bwe nfanga, munziikanga mu magombe mwe tuziise omulanzi oyo. Amagumba gange mugatanga kumpi n'agage.

³² Era Musengwa Katonda bye yamulagira okwogera, n'avumirira alutaari eri mu Betheli n'amasabo goonagoona ag'omu bifo ebigulumivu ebisinzibwamu ebiri mu bibuga by'e Samaria, tibiriroba kutuukirira.”

Ekibi namuzisa ekya Yeroboamu

³³ Ebyo nga biwoire, kyabazinga Yeroboamu era tiyakyuka naire n'alekayo mpisa dhe mbi. Aye yeeyongera bweyongere okutaagho baakabona ab'ebifo ebigulumivu ebisinzibwamu, ng'abatoola mu bantu ababuliidho. Yaayawulanga kiisi muntu eyayendanga okuba kabona, yaamufuula kabona w'ekifo ekigulumivu ekisinzibwamu.

³⁴ Ekibi kya Yeroboamu ekyo, kyaleetera ab'endhu ye okuzikirira n'okuweekereragho irala ku nsi.