1 Bakyabazinga 12 - Baibuli Ekibono kya Katonda 2014

Ebika eby'oku luuyi olw'omukono omugooda olw'e buvandhuba bidheema

¹ Agho Rehoboamu yaaja e Shekemu Abaisiraeli ye baali beesolokeiza okumufuula kyabazinga.

² Yeroboamu mutabane wa Nebati yaakiwulira ng'akaali mu Misiri ye yali alumukiire okuwona kyabazinga Solomoni. Agho yaira,

³ kuba Abaisiraeli baamwetesa. Era bwe yatuuka, yaabeeyimbaku boonaboona abeesoloza, baaja baakoba Rehoboamu bati:

⁴ “Lata wo Solomoni yatukaluubiriza inho ekibitiriire, yaatukozesa emirimo emikakali era emizito. Aye iwe tugondeze ku bulamu, otukendeereze ku buzito obwo, twidha kukugheerezanga.”

⁵ Rehoboamu yaabakoba ati: “Muje, muliira ye ndi nga ghabiseegho enaku isatu.” Abantu baaja.

⁶ Kyabazinga Rehoboamu yeebuuza ku bantu abakulu, abaaghanga lata we Solomoni amagezi ng'akaali mulamu. Yaababuuza ati: “Magezi ki ge mumpa? Abantu bano mbairemu ntya?”

⁷ Baamwiramu bati: “Bw'oba ng'oyenda okuba omugheereza w'abantu bano olwaleero, oidha kubairamu ng'okozesa ebibono ebikalamu, olwo baidha kubanga bagheereza bo enaku dhoonadhoona.”

⁸ Aye kyabazinga Rehoboamu yaava ku magezi g'abantu abakulu ge baamugha, yeebuuza ku baisuka abaakula naye era abaali nga n'abamugheereza mu kiseera ekyo.

⁹ Yaababuuza ati: “Magezi ki ge mumpa? Twiremu tutya abantu bano abankobye bati, ‘Kendeeza ku buzito lata wo bwe yatutaaku?’ ”

¹⁰ Agho abaisuka abo baamukoba bati: “Abantu abo abakukobye bati, ‘Lata wo yatukaluubiriza inho ekibitiriire, yaatukozesa emirimo emizito, aye iwe tukendeezeeku ku buzito obwo,’ bakobe oti, ‘Akaala kange akansubi, kanene okusinga enkende ya lata wange.

¹¹ Kale ni oba nga lata wange yabakaluubiriza ekibitiriire, nze ndidha kwongera bwongere okubakaluubiriza einho. Era oba nga lata wange yabakangaivulanga ng'abakubisa enkoba edhabuliidho, nze ndidha kubakangaivulanga nga mbakubisa enkoba edhiriku obusuna!’ ”

¹² Kale nga ghabiseegho enaku isatu, Yeroboamu n'abantu boonaboona baidha ye kyabazinga Rehoboamu nga bwe yabakoba, ati: “Muliira ye ndi nga ghabiseegho enaku isatu.”

¹³ Agho kyabazinga yaabairamu na bukambwe, kuba yava ku magezi abantu abakulu ge baamugha,

¹⁴ yaajiira ku g'abaisuka ge baamugha, ng'akoba ati: “Oba nga lata wange yabakaluubiriza ekibitiriire, nze ndidha kwongera bwongere okubakaluubiriza einho. Era oba nga lata wange yabakangaivulanga ng'abakubisa enkoba edhabuliidho, nze ndidha kubakangaivulanga nga mbakubisa enkoba edhiriku obusuna!”

¹⁵ Kale atyo kyabazinga yaaloba kuwulirisa bantu. Musengwa Katonda n'eyaleetera ebintu okuja bityo, olwo atuukirize kye yakoba Yeroboamu mutabane wa Nebati ng'abita mu Ahiya ow'e Shilo.

¹⁶ Abantu bwe baabona nga kyabazinga tabawuliriisa, baamwiramu bati: “Mugabo ki gwe tuli nagwo ni Daudi? Tuzira kye tuli nakyo kya nsikirano ni mutabane wa Yesse. Imwe Abaisiraeli, ka twireyo ewaife. Daudi alabirire ab'endhu ye.” Kale Abaisiraeli baagolola ewaibwe.

¹⁷ Aye Rehoboamu yaasigala ng'akaafuga Abaisiraeli abaabanga mu kiketezo eky'e Buyudaaya bonka.

¹⁸ Agho kyabazinga Rehoboamu yaatuma mu Baisiraeli Adoramu eyali akulira abo abaasaliranga abantu abaakolanga emirimo egy'olukako amakatala. Aye Abaisiraeli baamukuba amabaale, baamwita. Agho kyabazinga Rehoboamu yaayangugha, yaaniina ekigaali kye eky'omu lutalo, yaalumukira e Yerusalemu.

¹⁹ Okuva n'olwo, Abaisiraeli ab'omu kiketezo eky'oku luuyi olw'omukono omugooda olw'e buvandhuba wa Isiraeli, baadheema okufugibwa ab'endhu ya Daudi ni ye buli eno.

²⁰ Agho abantu ab'omu Isiraeli yoonayoona, bwe baawulira nga Yeroboamu aize okuva e Misiri, baamwetesa okwidha ghe baali beesololeiza, era baamufuula kyabazinga wa Isiraeli yoonayoona. Ekika kya Yuda kyonka n'ekyasigala nga kikaafugibwa ab'endhu ya Daudi.

Shemaia bye yalanga

²¹ Agho Rehoboamu bwe yatuuka e Yerusalemu, yaayeta abantu ab'omu kika kya Yuda n'ekya Benjamini. Abasaadha abalwani einho abaghera emitwalo eikumi n'omunaana (180,000), beesoloza okuja okulwanisa Abaisiraeli ab'omu kiketezo eky'oku luuyi olw'omukono omugooda olw'e buvandhuba wa Isiraeli, Rehoboamu oyo asobole okukiizaayo mu bwakyabazinga bwe.

²² Aye Katonda yaakoba omusaadha we Shemaia ati:

²³ “Koba Rehoboamu mutabane wa Solomoni era kyabazinga wa Buyudaaya, okobe n'ab'omu kika kya Yuda, n'ekya Benjamini, era n'abantu boonaboona abandi, oti,

²⁴ ‘Musengwa Katonda akoba ati mutaja kulumba baganda baimwe, Baisiraeli banaimwe. Mwireyo buli muntu mu maka ge, kuba ebyo ebibairegho, ninze nabireetagho.’ ” Agho baagondera ekiragiro kya Musengwa Katonda, bairayo ewaibwe nga Musengwa Katonda bwe yabalagira.

Yeroboamu ava ku Musengwa Katonda

²⁵ Agho Yeroboamu yaazimba ekibuga Shekemu mu kiketezo kya Efuraimu eky'oku nsozi, yaaba omwo. Era yaava agho yaazimba ekibuga Penueli.

²⁶ Yaakoba mule ati: “Obwakyabazinga bwidha kabiri kwirira ab'endhu ya Daudi,

²⁷ kasita abantu bano banaajanga e Yerusalemu okughaayo emisengo ye Musengwa Katonda mu isinzizo. Olwo omwoyo gwaibwe kabiri gukyukire eri musengwa waibwe Rehoboamu kyabazinga wa Isiraeli, nze bandhite, baire y'ali.”

²⁸ Kale kyabazinga Yeroboamu oyo yaalowoolereza inho ku kintu ekyo, era yaamala yaakola ebifaananie eby'ente ento bibiri mu zaabu. Agho yaakoba abantu ati: “Mubairenga nga muja e Yerusalemu okumala ekiseera ekireeyi ekimala. Mubone eno, imwe Abaisiraeli, bano ni bakatonda baimwe abaabatoola mu Misiri.”

²⁹ Agho yaata ekifaananie eky'ente ento ekindi mu Betheli, n'ekindi yaakita mu Dani.

³⁰ Ekyo kyaleetera abantu okwonoona, kuba baajanga okusinza omusambwa ogwali mu Betheli, era baajanga n'okusinza gule ogwali eghala mu Dani.

³¹ Yeroboamu era yaazimba amasabo mu bifo ebigulumivu eby'okusinzizaamu, yaataagho bakabona ng'abatoola mu bantu abatali ba mu kika kya Levi.

Omulanzi avumirira eky'okusinziza e Betheli

³² Era yaataagho ekibinuko, kibengagho mu mwezi ogwomunaana, ku lunaku olweikumi n'eitaanu, nga kye baabanga nakyo mu Buyudaaya. Yaaja ku alutaari e Betheli yaaghaayo emisengo y'ebifaananie eby'ente ento bye yakola, era yaataagho bakabona abaagheerezanga mu masabo ge yazimba.

³³ Ku lunaku olweikumi n'eitaanu olw'omwezi ogwomunaana, omwezi mwene gwe yalonda ku lulwe, yaaja ku alutaari ye yazimba e Betheli. Yaateeragho Abaisiraeli ekibinuko, yaaja ku alutaari yaaniokeza obubbaani.