1 Bakyabazinga 11 - Baibuli Ekibono kya Katonda 2014

Solomoni ava ku Katonda

¹ Kyabazinga Solomoni yayenda abakazi kamaala abamaghanga agandi, omwali ni mughala wa kyabazinga ow'e Misiri, n'abakazi Abamoabu, n'Abammoni, n'Abaedomu, n'Abasidoni, n'Abahitti.

² Solomoni yabayiza abakazi okuva mu maghanga ago, waire nga Musengwa Katonda yali amaze okukoba Abaisiraeli ati: “Mutafumbiraganwanga na bantu abo, kuba bwenebwene baja kubakyusa emyoyo gyaimwe, musinze emisambwa gyaibwe.” Aye Solomoni yaabeesibaku, yaabenda.

³ Yali n'abakazi be abambeedha nga baghera lusanvu, ate yaaba n'abakazi be ab'embali nga baghera ebikumi bisatu. Abakazi abo baakyusa omwoyo gwe,

⁴ era ghe yakairikira baali nga bamuleeteire okusinza emisambwa, yaaloba kugumira ku Musengwa Katonda we, nga lata we Daudi bwe yamugumiraku.

⁵ Solomoni yaasinza omusambwa omukazi Ashitorethi ogw'Abasidoni, n'omusambwa Milikomu ogw'Abammoni, ogwenhinhalwa.

⁶ Kale mu nsambo eyo Solomoni yaakola ekibi eri Musengwa Katonda, yaaloba kugumira ku Musengwa Katonda oyo, nga lata we Daudi bwe yamugumiraku.

⁷ Agho yaazimba ku lusozi oluli ku luuyi olw'e buvandhuba wa Yerusalemu, ekifo ekigulumivu eky'okusinzizaamu omusambwa Kemoshi ogw'Abamoabu ogwenhinhalwa, n'eky'okusinzizaamu omusambwa Moleki ogw'Abammoni, gwona era ogwenhinhalwa.

⁸ Era mu nsambo n'endala eyo, yaazimbira bakazi be boonaboona abamaghanga agandi, ebifo mwe baaniokezanga obubbaani era ni baghangayo emisengo y'emisambwa gyaibwe.

⁹ Musengwa Katonda yaasungughalira Solomoni, kuba yakyuka yaava ku Musengwa Katonda, Katonda wa Isiraeli, eyamubonekera emikuzi ebiri,

¹⁰ n'amusikirira obutasinzanga misambwa, aye ate Solomoni n'aloba okujiira ku ebyo Musengwa Katonda oyo bye yamulagira.

¹¹ Kale Musengwa Katonda kyeyava n'akoba Solomoni ati: “Nga bw'okoze ekyo, n'oloba okukuuma endagaano ye nakola n'iwe, era n'odheemera amateeka ge nakulagira, bwenebwene ndidha kukutoolaku obwakyabazinga, mbughe owundi ku bagheereza bo.

¹² Aye ku lwa lata wo Daudi, ekyo tiidha kukikola ng'okaali mulamu, ndikikola ng'omwana wo n'afuga.

¹³ Ate era tirimutoolaku bwakyabazinga bwonabwona, aye ndimulekeragho ekika kirala ku lwa Daudi omugheereza wange, ni ku lwa Yerusalemu, ekibuga kye nalonda okuba ekyange.”

Abazigu ba Solomoni

¹⁴ Agho Musengwa Katonda yaasiikuula omulangira Hadadi ow'e Edomu, yaafuuka omuzigu wa Solomoni.

¹⁵ Einhuma ere nga bino bikaali kubaagho, Daudi bwe yaghangula Edomu, Yoabu omuduumizi w'eigye yaja okuziika abaitibwa, era yaita kiisi musaadha mu Edomu.

¹⁶ Yoabu oyo n'Abaisiraeli boonaboona be yali nabo, baali eyo okumala emyezi mukaaga, okutuusa lwe baamala okwita kiisi musaadha,

¹⁷ okutoolaku Hadadi n'abandi ku bagheereza Abaedomu aba lata we, abaalumuka ni baja e Misiri ni Hadadi oyo ng'akaali mwana muto.

¹⁸ Baava mu Midia, baaja e Parani baatoolayooku abasaadha be baaja nabo e Misiri. Agho baatuuka ye kyabazinga w'e Misiri, yaagha Hadadi ekibandha n'endhu, era yaamughanga n'ensako kwe yalyanga.

¹⁹ Hadadi yaaba mugonzi inho ye kyabazinga w'e Misiri, era kyabazinga oyo yaatoola mulamu we, muganda wa mukazi we, yaamumugha okumubayiza. Omukazi oyo yali inhebantu, ng'eriina lye ni Tahapenesi.

²⁰ Muganda wa Tahapenesi oyo yaazaalira Hadadi omwana omulenzi, yaamweta Genubathi. Omwana oyo yaatuusa okuva ku mabeere nga Tahapenesi ali mu kisaagaati kya kyabazinga. Kale Genubathi yaakulira mu kisaagaati kya kyabazinga w'e Misiri ghalala n'abaana ba kyabazinga.

²¹ Agho Hadadi bwe yawulira ng'ali e Misiri ati, Daudi afiire era nga ni Yoabu omuduumizi w'eigye yeena afiire, yaakoba kyabazinga w'e Misiri ati: “Ndeka nje, ndhireyo mu nsi y'ewaife.”

²² Aye kyabazinga yaamubuuza ati: “Kiki ky'oli kudhulirira ng'oli eno ewange, ekiri kukwendesa okwirayo mu nsi y'ewaimwe?” Hadadi yairamu ati: “Iwe ndeka buleke, nje.”

²³ Agho Katonda yaasiikuulira Solomoni omuzigu owundi, nga ni Rezori mutabane wa Eliada. Rezori oyo yalumuka ku musengwa we Hadadezeri, kyabazinga w'e Zoba.

²⁴ Daudi bwe yamala okwita ab'e Zoba, Rezori oyo yaasoloza abasaadha, yaaba mukulu waibwe. Baaja e Damasiko baaba eyo, era baamufuulira eyo kyabazinga waayo.

²⁵ Yaafuga Siria, era yaaba muzigu wa Isiraeli inho mu biseera bya Solomoni byonabyona, yaataghaania Isiraeli ng'oti ni Hadadi bwe yakola.

Katonda asuubiza Yeroboamu okumugha obwakyabazinga

²⁶ Era ni Yeroboamu mutabane wa Nebati ow'e Zereda mu Efuraimu, inhina nga ni namwandu ayetebwa Zerua, yeena yaadheemera kyabazinga Solomoni, musengwa we.

²⁷ Ekyaviiraku Yeroboamu okudheema ni kino: Kyabazinga Solomoni yali ali kuzimba ekifo kye baidhuzaamu eitaka ekyetebwa Millo, era ng'ali kusemba mu bituli ebyali mu kimante ky'ekibuga ekyetebwa ekya Daudi lata we.

²⁸ Omusaadha oyo Yeroboamu yali wa maani. Era Solomoni bwe yamubona nga mwisuka akola n'amaani, yaamugha okulabiriranga emirimo gyonagyona egy'olukako egyakolebwanga mu kiketezo ky'Abamanasse n'eky'Abaefuraimu.

²⁹ Lwali lulala mu kiseera ekyo, Yeroboamu ng'ali kutambulaku ng'ava e Yerusalemu, omulanzi Ahiya ow'e Shilo yaamwagaana mu ngira, olwo baaba nga bali bwa babiri bonka mu irungu. Ahiya yali avaire ekivaalo ekiyaaka.

³⁰ Agho Ahiya oyo yaagema ekivaalo ekiyaaka kye yali avaire, yaakikanulakanulamu ebitundu ikumi na bibiri.

³¹ Yaakoba Yeroboamu ati: “Twalaku ebitundu ikumi ku ebyo, kuba Musengwa Katonda, Katonda wa Isiraeli akoba ati, ‘Ndidha kutoola obwakyabazinga ku Solomoni nkugheeku ebika ikumi.

³² Solomoni aidha kusigaza ekika kirala ku lw'omugheereza wange Daudi, ni ku lwa Yerusalemu ekibuga kye nalondamu mu bika byonabyona ebya Isiraeli.

³³ Ndidha kukola ntyo, kuba Solomoni oyo yanvaaku yaasinza omusambwa omukazi Ashitorethi ogw'Abasidoni, n'omusambwa Kemoshi ogw'Abamoabu, n'omusambwa Milikomu ogw'Abammoni. Yandheemera yaakola ebibi, yaaloba kugema mateeka na biragiro byange, nga lata we Daudi bwe yakolanga.

³⁴ Aye tiidha kutoola ku Solomoni oyo bwakyabazinga bwe bwonabwona. Ndidha kumuleka afuge ekiseera kye ky'anaamala nga mulamu, ku lw'omugheereza wange Daudi ye nalondamu, eyagemanga ebiragiro byange n'amateeka gange.

³⁵ Nditoola obwakyabazinga ku mwana wa Solomoni oyo, naakugha iwe ebika ikumi.

³⁶ Aye ate omwana wa Solomoni oyo ndimulekera ekika kirala, olwo buliidho omugheereza wange Daudi abenga ng'akaaligho n'omuntu ow'oku lulyo lwe afuga mu Yerusalemu, ekibuga kye nalonda kibe ekifo mwe banansinzizanga.

³⁷ Iwe Yeroboamu ndidha kukutwala obe kyabazinga wa Isiraeli, era ofuge ekiketezo kyonakyona ky'onaayenda.

³⁸ Bw'onaatanga omwoyo ku byonabyona bye nkulagira, n'ogumira ku nze, n'okola bye nsiima, era n'ogemanga amateeka n'ebiragiro byange ng'omugheereza wange Daudi bwe yakolanga, ndidha kubanga ghalala n'iwe. Ndikugha okufuga Isiraeli, era naaleetera ab'endhu yo okusigalagho nga bakaafuga, nga bwe nagha omugheereza wange Daudi.

³⁹ Era ndibonereza baidhukulu ba Daudi olw'ebibi bya Solomoni, aye tiribabonereza byanda na byanda.’ ”

⁴⁰ Agho Solomoni yaasala amagezi okwita Yeroboamu, aye Yeroboamu yaalumukira mangu e Misiri ewa kyabazinga waayo eyayetebwanga Shishaki, yaaba eyo okutuusa Solomoni bwe yafa.

Solomoni afa

⁴¹ Ebindi byonabyona ebyogerwa ku Solomoni, ni byonabyona bye yakola, era n'amagezi ge, byaghandiikibwa mu Kitabo ky'Ebikolwa bya Solomoni.

⁴² Entangama Solomoni ye yamala ng'afuga Isiraeli yoonayoona mu Yerusalemu, yali ya myaka makumi ana (40).

⁴³ Agho Solomoni oyo yaafa yeeyimba ku badhaadha be abaafa, yaaziikibwa mu kyetebwa Ekibuga kya Daudi lata we. Mutabane we Rehoboamu yaamusikira ku bwakyabazinga.