1 Bakyabazinga 10 - Baibuli Ekibono kya Katonda 2014

Kyabazinga omukazi ow'e Sheba akyalira Solomoni

¹ Agho kyabazinga omukazi ow'e Sheba bwe yawulira obumanhifu bwa Solomoni obwamugheebwa Musengwa Katonda, yaidha n'ebibuuzo ebikalangafu okumuleba.

² Yaidha e Yerusalemu n'ekikunsu eky'abagheereza be nga kinene inho, n'engamiya edheetwise obuwoowo, ni zaabu mungi inho, n'amabaale ag'omughendo. Era bwe yatuuka ewa Solomoni yaamukobera byonabyona ebyamuli ku mwoyo.

³ Solomoni yaamwiramu ebibuuzo bye. Ghazira kintu waire ekirala kiti ekyazibughalira Solomoni okwinhonhola.

⁴ Kyabazinga omukazi ow'e Sheba oyo yaabona amagezi ga Solomoni, n'ekisaagaati kye eky'obwakyabazinga kye yazimba,

⁵ n'emere ye yagabulanga ku meeza ye, n'ensambo abakungu be ye baatyamangamu, n'ensambo abagheereza be ye baagheerezangamu nga bali mu bivaalo byaibwe, n'abo abaagheerezanga eby'okunhwa. Era yaabona n'ebigheebwayo ebyokebwa Solomoni bye yaghangayo mu isinzizo. Ebyo byonabyona byamwewuunhisa inho ekibitiriire.

⁶ Agho yaakoba Solomoni ati: “Bye nawulira nga ndi mu nsi yange ku bikolwa byo ni ku magezi go, byali bituufu.

⁷ Aye tyabiikiriza, okutuusa lwe ndidhie ni mbyeboneraku n'agange. Era bwenebwene bye nawulira byali katundu butundu ak'ebyo bye mboine. Amagezi n'obukombe by'oli nabyo bisingira ghala ebyo bye nawuliraku.

⁸ Bakazi bo beesiimye! N'abagheereza bo ababa buliidho mu maiso go ni bawulira eby'amagezi by'oyogera beesiimye!

⁹ Musengwa Katonda wo asaakibwe, eyayoleka nga bw'akusiimye, n'akufuula kyabazinga wa Isiraeli. Musengwa Katonda oyo agonza inho Isiraeli, kyeyava n'akufuula kyabazinga, olamulenga mu mazima ni mu butuufu.”

¹⁰ Agho yaatonera kyabazinga zaabu agheza kilo ng'oti enkumi ina (4,000), n'obuwoowo kamaala inho, n'amabaale ag'omughendo. Era tighaidhangaghooku kabiri bya buwoowo byaga agho bungi ng'oti n'ebyo kyabazinga omukazi ow'e Sheba bye yatonera kyabazinga Solomoni.

¹¹ Olugololiro olw'amaato ga Hiramu olwaleeta zaabu okuva mu Ofiri, era ni lwene olwo olwaleeta n'embaawo edhaali kamaala einho edh'emiti egyetebwa emyalumugi, n'amabaale ag'omughendo.

¹² Kyabazinga Solomoni yaakozesa embaawo edho okukolera obukomera ku madaala ag'omu isinzizo, n'ag'omu kisaagaati kye. Yaadhikolamu n'endingidi, n'entongooli edh'abembi. N'okuva ku olwo, mu Isiraeli timwairamu kuleetebwamu waire okubonekamu embaawo edh'emiti emyalumugi edhiri ng'oti n'edho, okutuusa ni ye buli eno.

¹³ Agho kyabazinga Solomoni yaagha kyabazinga omukazi ow'e Sheba byonabyona bye yayenda na buli kye yasaba, nga tobaliireeku ebyo kyabazinga Solomoni mwene bye yayiiya okumugha mu mwoyo omugabi. Kale kyabazinga omukazi oyo yaasiibula, yairayo mu nsi ye, ghalala n'abagheereza be.

Obukombe bwa kyabazinga Solomoni

¹⁴ Zaabu Solomoni ye yafunanga omwaka, yaghezanga kilo ng'oti emitwalo ebiri n'enkumi isatu (23,000),

¹⁵ nga tobaliireeku oyo eyavanga mu basuubuzi ni mu mpooza ku bitundibwa, n'oyo eyavanga mu bakyabazinga boonaboona ab'e Buwarabu, ni mu bafuzi ab'ebiketezo mu Isiraeli.

¹⁶ Kyabazinga Solomoni yagheesa engabo enene ebikumi bibiri (200), buli ndala yaagirimbyaku zaabu azitogha kilo ng'oti musanvu.

¹⁷ Yaagheesa n'engabo entono ebikumi bisatu, buli ndala yaagirimbyaku zaabu azitogha kilo ng'oti ibiri. Dhoonadhoona yaadhita mu ndhu eyayetebwanga Ekibira kya Lebanoni.

¹⁸ Kyabazinga era yaakola ekityamo eky'obwakyabazinga ekikologho mu isanka, yaakirimbyaku zaabu omukenenule.

¹⁹ Ekityamo ekyo kyaliku amadaala mukaaga, ng'einhuma waakyo eriyo ekifaananie eky'omutwe ogw'ente ento. Era kyaliku ekintu kw'owuumuliza emikono eruuyi n'eruuyi, nga ku mbali okwa buli kintu kw'owuumuliza emikono, ghaligho ekifaananie ky'empologoma eyemereire.

²⁰ Ghaaligho n'ebifaananie ebindi eby'empologoma ikumi na bibiri, nga dheemereire ndala ndala ku luuyi ni ku luuyi okwa buli idaala, ku madaala gale omukaaga. Tighaalighooku kityamo kya bwakyabazinga kyakolebwa kabiri mu bwakyabazinga bundi, nga kifaanana n'ekyo.

²¹ Ebintu byonabyona ebya kyabazinga Solomoni bye yakozesanga ku by'okunhwa, byali bya zaabu. Era ebintu byonabyona ebyakozesebwanga ku by'okulya mu ndhu eyayetebwanga Ekibira kya Lebanoni, byali bya zaabu mukenenule. Tighaaligho kintu kyonakyona kya feeza, kuba mu biseera bya Solomoni, feeza tiyatwalibwanga ng'ekintu eky'omughendo.

²² Kyabazinga yali n'olugololiro olw'amaato agaajanga e Tarushishi ku nhandha enene nga gali ghalala n'olugololiro olw'amaato ga Hiramu. Buli lumaliira lwa myaka esatu, olugololiro olw'amaato olwo lwairanga okuva e Tarushishi nga luleese zaabu, ni feeza, n'amasanka, n'ensude, n'enkembo.

²³ Kale atyo kyabazinga Solomoni yaasingira ghala bakyabazinga boonaboona ku nsi, obukombe n'amagezi.

²⁴ Abantu ab'omu nsi yoonayoona baayendanga okwidha aghali Solomoni oyo, okuwulira ebibono eby'amagezi ge, Katonda ge yamugha.

²⁵ Buli muntu eyaidhanga, ng'aleeta ekirabo: ebintu bya feeza n'ebya zaabu, ebivaalo, eby'okulwanisa, obuwoowo, embalaasi n'enhumbu. Abantu baaleetanga ebintu ebyo buli mwaka.

²⁶ Solomoni yasoloza ebigaali eby'omu lutalo n'abavuzi b'embalaasi. Yali n'ebigaali eby'omu lutalo lukumi na bina (1,400), n'abavuzi b'embalaasi omutwalo mulala n'enkumi ibiri (12,000) abandi yaabata mu bibuga ebikuumirwamu ebigaali eby'omu lutalo, ate abandi yaabata mu Yerusalemu, mwene ye yali.

²⁷ Mu biseera bye, feeza yayala mu Yerusalemu, yaaba mungi ng'oti bwa mabaale. N'emivule gyaba mingi ng'oti miti emisikamore egy'omu biketezo eby'omu biiko.

²⁸ Embalaasi Solomoni dhe yali nadho, yadhiragirizanga kuva mu Misiri ni mu Kue, era abasuubuzi be baadhisasuliranga.

²⁹ Ekigaali eky'omu lutalo ekirala kyagulwanga mu Misiri ku bitundu lukaaga ebya feeza, n'embalaasi endala yaagulwanga ku bitundu kikumi n'ataanu ebya feeza. Bakyabazinga boonaboona ab'Abahitti n'ab'e Siria, baagulanga ebigaali eby'omu lutalo n'embalaasi, ku basuubuzi ba Solomoni abo.