1 Bakyabazinga 1 - Baibuli Ekibono kya Katonda 2014

Kyabazinga Daudi mu myaka gye egy'obukaire

¹ Mu kiseera ekyo kyabazinga Daudi yali ng'akairiighe inho, era nga waire bamubwika ebyebwiko ebigheraku, nga tasuugha.

² Kale abagheereza be baamukoba bati: “Isebantu kyabazinga, ka tukunoonezeeyo omughala omutomuto akugheerezenga era ng'akulabirira. Era asulenga ghalala n'iwe musengwa waife kyabazinga, oghange okusuughanga.”

³ Agho baayagala mu Isiraeli mwonamwona omughala aboneka obulungi, era baazuula Abishagi Omushunami, baamuleetera kyabazinga.

⁴ Omughala oyo yali aboneka bulungi inho, era yaafuuka omugheereza wa kyabazinga, ng'amulabirira. Aye kyabazinga tiyamufuulaku mukazi we naire.

Adoniya yeegwaniza okufuuka kyabazinga

⁵ Agho Adoniya mutabane wa kyabazinga Daudi, ye yazaala mu mukazi ayetebwa Haggithi, yeekuluntaza ng'akoba mule ati: “Ninze ndidha okuba kyabazinga.” Era yeetegekerayo ebigaali eby'omu lutalo, n'abavuzi b'embalaasi, n'abasaadha amakumi ataanu ab'okumukuumanga.

⁶ Lata we Daudi, yali nga tamuneniangaku mu kintu kyonakyona. Adoniya oyo yali mulungi mu mboneka ye, era nga ni muto wa Abusalomu amwiraku.

⁷ Adoniya oyo yaayogera ni Yoabu mutabane w'omukazi ayetebwa Zeruia, era yaayogera ni Abiathari kabona, era abo bombi baamughagira era baamubeera.

⁸ Aye Zadoki kabona, ni Benaia mutabane wa Yehoiada, ni Nathani omulanzi, ni Shimei, ni Rei, n'abasaadha ba Daudi ab'amaani, tibaali ku luuyi lwa Adoniya.

⁹ Agho Adoniya yaaghaayo bino ng'omusengo: entaama, ente enume n'ente entototo empiite ensavu. Yaabigheerayo agho gha ibaale eryetebwa Eibaale ery'Emisota, eriri okumpi n'akaiga akeetebwa Enirogeli. Yaayeta baganda be boonaboona, abo nga n'abaana ba kyabazinga Daudi, era yaayeta n'abakungu ba kyabazinga boonaboona ab'e Buyudaaya, okwidha okubaagho.

¹⁰ Aye yaaloba kweta Nathani omulanzi, oba Benaia, oba abasaadha bale abalwani ab'amaani, waire okweta muganda we Solomoni.

Solomoni bamufuula kyabazinga

¹¹ Agho Nathani omulanzi yaaja, yaakoba Bathisheba inhina wa Solomoni ati: “Iwe okaali kuwulira ng'Adoniya mutabane wa mughalikwa wo Haggithi yafuuse kyabazinga, era nga musengwa waife Daudi taidhi?

¹² Kale ni ka nkughe ku magezi osobole okuwonia obulamu bwo n'obwa mutabane wo Solomoni:

¹³ Situkiramu oje ye kyabazinga Daudi, omukobe oti, ‘Isebantu kyabazinga, tiwandayirira nze omugheereza wo omukazi, oti mutabane wange Solomoni n'alikusikira era nga n'alityama ku kityamo kyo eky'obwakyabazinga? Memale kabiri Adoniya afuuse atya kyabazinga?’ ”

¹⁴ Nathani yaayongeraku ati: “Agho bw'onaaba ng'okaayogera ni kyabazinga, zeena ndidha kutuukiragho mu kiseera ekyo era nkakase by'okoba.”

¹⁵ Agho Bathisheba yaaja ye kyabazinga mu kisenge ye yali. Mu kiseera ekyo kyabazinga yali akairiighe inho, era nga Abishagi, omughala Omushunemi, n'amulabirira.

¹⁶ Agho Bathisheba yaakubira kyabazinga amakiryaivu era yaakutama n'ekyeni kyatuuka ku itaka. Kyabazinga yaamubuuza ati: “Oyenda ki?”

¹⁷ Bathisheba yairamu ati: “Isebantu kyabazinga, nze omugheereza wo omukazi wandayirira mu liina lya Musengwa Katonda wo, oti mutabane wange Solomoni n'alikusikira, era nga n'alityama ku kityamo kyo eky'obwakyabazinga.

¹⁸ Aye mpegaano bona, Adoniya afuuse kyabazinga, waire nga iwe musengwa wange toidhi.

¹⁹ Era aghaireyo bino ng'omusengo: ente enume, ente entototo empiite ensavu n'entaama kamaala. Era ayese batabane bo boonaboona, ni Abiathari kabona, ni Yoabu omuduumizi w'eigye. Aye Solomoni omugheereza wo tamwese.

²⁰ Agho ni Isebantu kyabazinga, Abaisiraeli boonaboona balingiriire ku iwe okubakobera ow'okukusikira ku bwakyabazinga.

²¹ Bw'otaakole otyo, kiidha kuba nti iwe musengwa wange kyabazinga olulimala okufa ni weeyimba ku badhaadha bo, nze ni mutabane wange tuja kubalirwa mu bantu ababi.”

²² Bathisheba yali akaayogera ni kyabazinga, Nathani omulanzi yaingira.

²³ Baakobera kyabazinga bati: “Nathani omulanzi wuuno aidhie.” Era Nathani oyo bwe yaingira aghali kyabazinga yaakuba amakiryaivu, yaakutama n'ekyeni kyatuuka ku itaka.

²⁴ Agho yaakoba ati: “Isebantu kyabazinga, obwo bwene wakoba oti Adoniya n'alikusikira, era nga n'alityama ku kityamo kyo eky'obwakyabazinga?

²⁵ Olwaleero luno lwene, ajiire yaaghaayo bino ng'omusengo: ente enume, ente entototo empiite ensavu n'entaama. Era ayese batabane bo boonaboona, ni Yoabu omuduumizi w'eigye, ni Abiathari kabona. Era bali eyo bali kulya era baanhwera mu maiso ge, nga bwe bakoba bati, ‘Ghangaala, kyabazinga Adoniya!’

²⁶ Aye nze omugheereza wo, ni Zadoki kabona, ni Benaia mutabane wa Yehoiada, ni Solomoni omugheereza wo, tatwese.

²⁷ Isebantu kyabazinga, niiwe eyakoze ekyo nga tokobeireeku bagheereza bo, muntu alikusikira ku bwakyabazinga?”

²⁸ Agho kyabazinga Daudi yairamu ati: “Ndhetera Bathisheba, aidhe.” Era Bathisheba yaidha, yaayemerera mu maiso ga kyabazinga.

²⁹ Kyabazinga yaalayira ati: “Ndayira mu Musengwa Katonda omulamu eyamponia buli kabi koonakoona,

³⁰ ng'oti ni bwe nakulayirira mu Musengwa Katonda, Katonda wa Isiraeli, nga nkoba nti, ‘Solomoni n'alinsikira ku bwakyabazinga era n'aliira mu kifo kyange, atyamenga ku kityamo kyange eky'obwakyabazinga. Era ntyo bwe ndidha okukola olwaleero.’ ”

³¹ Agho Bathisheba yaakuba amakiryaivu, yaakutama n'ekyeni kyatuuka ku itaka mu maiso ga kyabazinga. Yaakoba ati: “Isebantu kyabazinga Daudi, ghangaala byanda na byanda!”

³² Agho kyabazinga Daudi yaayetesa Zadoki kabona, ni Nathani omulanzi, ni Benaia mutabane wa Yehoiada. Bwe baidha gh'ali,

³³ kyabazinga yaabakoba ati: “Muje n'abakungu bange, mutyamye mutabane wange Solomoni ku nhumbu yange yeene, y'abe avuge. Olwo muserengete e Gihoni,

³⁴ Zadoki kabona ni Nathani omulanzi bamusiigire eyo omuzigo, abe kyabazinga wa Isiraeli. Ekyo nga kiwoire, mwidha kufuuwa eigwala, mukobe muti, ‘Ghangaala kyabazinga Solomoni!’

³⁵ Eyo mwidha kuvaayo nga mumunonereza, aidhe atyame ku kityamo kyange eky'obwakyabazinga kuba n'aidha okuba kyabazinga mu kifo kyange. Era mmutairegho okuba omufuzi wa Isiraeli ni Buyudaaya.”

³⁶ Benaia mutabane wa Yehoiada yairamu ati: “Amiina. Era, musengwa wange kyabazinga, neeghemba Musengwa Katonda wo akikakase.

³⁷ Nga Musengwa Katonda bw'abairenga n'iwe, Isebantu kyabazinga, era atyo bw'abe abenga ni Solomoni, era aleetere obufuzi bwe okuba obukologho einho okusinga obubwo.”

³⁸ Agho Zadoki kabona, ni Nathani omulanzi, ni Benaia mutabane wa Yehoiada, ni bale abaakuumanga kyabazinga Abakerethi n'Abapelethi, baatyamya Solomoni ku nhumbu ya kyabazinga Daudi, yaagivuga era baaja naye e Gihoni.

³⁹ Nga bali eyo, Zadoki kabona yaaja mu Weema ey'Okwagaananirangamu ni Musengwa Katonda, yaatoolayo eiyiga ery'ensolo lye baatangamu omuzigo, yaatoolamu omuzigo, yaagusiiga Solomoni. Olwo baafuuwa eigwala, era abantu boonaboona baakoba bati: “Ghangaala kyabazinga Solomoni.”

⁴⁰ Agho abantu boonaboona baaja nga bamunonereza nga bafuuwa endere, era nga basagambya n'eisanhu lingi inho, n'eitaka kumpi lyeyatiseemu olw'okuwowoigana kwaibwe.

⁴¹ Adoniya n'abageni be boonaboona be yali nabo, baali nga bali kumaliriza ekibinuko kyaibwe, baawulira okuwowoigana okwo. Era Yoabu bwe yawulira okuvuga kw'eigwala, yaabuuza ati: “Okwasiikana okwo kwonakwona mu kibuga kutegeeza ki?”

⁴² Yali akaayogera, yaja okubona, nga Yonathani mutabane wa Abiathari kabona, aidha. Adoniya yaakoba Yonathani oyo, ati: “Ingira, kuba oli musaadha mukalamu, era n'amawulire g'oleese malungi.”

⁴³ Yonathani yaira mu Adoniya ati: “Busa naire, kuba musengwa waife kyabazinga Daudi atairegho Solomoni okuba kyabazinga.

⁴⁴ Era atumye Zadoki kabona, ni Nathani omulanzi, ni Benaia mutabane wa Yehoiada, ni bale abaakuumanga kyabazinga Abakerethi n'Abapelethi, baaja baatyamya Solomoni ku nhumbu ya kyabazinga, era yaagivuga.

⁴⁵ Era Zadoki kabona ni Nathani omulanzi, bamusiize omuzigo e Gihoni, abe kyabazinga, era baavaayo baaja mu kibuga nga basagamba, olwo ekibuga kyabaamu okuwowoigana. Kale ni okwo n'okwasiikana kwe muwuliire.

⁴⁶ Solomoni buti ni kyabazinga.

⁴⁷ Ate ekindi, abakungu ba kyabazinga baidhie okweisuusa musengwa waife kyabazinga Daudi, baakoba bati, ‘Tweghemba Katonda wo afuule Solomoni okuba omumanhifu okusinga iwe bw'obaire, era afuule obwakyabazinga bwa Solomoni oyo bube bukologho inho okusinga obubwo bwe bubaire.’ Agho kyabazinga Daudi yeebaliza ku buliri bwe,

⁴⁸ era yasaaka Katonda ati, ‘Musengwa Katonda, Katonda wa Isiraeli asaakibwe, oyo aghaire omulala ku b'omusaayi gwange okutyama ku kityamo kyange eky'obwakyabazinga, era n'anganha okuba omulamu ni mbona ku ekyo.’ ”

⁴⁹ Agho abageni ba Adoniya baadhugumira era baasituka, buli muntu yaagema engira yiye.

⁵⁰ Adoniya olw'okutya Solomoni, yaasituka, yaaja yeegema ku bintu ebiri ng'oti mayiga ga nsolo ebiri ku alutaari, mu Weema ey'Okwagaananirangamu ni Musengwa Katonda.

⁵¹ Baakobera Solomoni bati: “Bona, Adoniya akutiire iwe kyabazinga Solomoni, era wuule yeegemye ku bintu ebiri ng'oti mayiga ga nsolo ebiri ku alutaari, ng'akoba ati, ‘Kyabazinga Solomoni asooke andayirire, nga taidha kundhita nze omugheereza we.’ ”

⁵² Solomoni yairamu ati: “Bw'aneebisa obukalamu, ghazira luviiri waire olulala lwe baidha kwigha mu mutwe gwe. Aye bwe balimuzuula nga yeebisa bubi, balimwita.”

⁵³ Agho kyabazinga Solomoni yaatuma abantu, baaja baatoola Adoniya ku alutaari. Adoniya yaidha mu maiso ga kyabazinga Solomoni, yaakuba amakiryaivu era yaakutama n'ekyeni kyatuuka ku itaka. Agho kyabazinga Solomoni yaamukoba ati: “Irayo ewuwo.”