1 Ab'e Korintho 3 - Baibuli Ekibono kya Katonda 2014

Abagheereza ba Katonda

¹ Aboluganda, nali nga tighanga kwogera n'imwe nga bwe nandyogeire n'abantu abali ni Mwoyo. Nali nga ndi n'okwogera n'imwe nga bwe nandyogeire n'ab'ensi, ate abaana abaghere mu kwikiriza Kurisito.

² Nali n'okubanhwesa amata mu kifo ky'emere olw'okuba mwali mukaali kutuuka kugirya. Era waire ni mperaano mukaali kutuuka kugirya

³ kuba mukaali ba nsi. Kuba oba mu imwe mukaalimu ensaalwa n'okusoolasoola, kino tikyoleka nga mukaali ba nsi era ng'abantu abandi bwe bali?

⁴ Owundi ku imwe bw'akoba ati: “Nze ndi wa Paulo”, ate owundi ati: “Nze ndi wa Apollo”, agho muba nga timwebisiisa ng'oti n'abantu ab'ensi?

⁵ Kuba bwenebwene Apollo naani? Era Paulo naani? Tuli bagheereza bugheereza ba Katonda, be yakozesa okutuusa imwe ku kwikiriza. Buli muntu ku ife akola omulimo Katonda gwe yamugha okukola.

⁶ Nze nasimba ensigo, Apollo yaafukirira, aye Katonda n'eyakuza.

⁷ Bwenebwene oyo asimba oba afukirira ti n'ekikulu, aye ekikulu, ni Katonda akuza.

⁸ Oyo asimba ayagayaga n'oyo afukirira era Katonda alisasula buli muntu olw'omulimo gwe yakola.

⁹ Kuba ife, Katonda tuli bakozi baine era imwe muli nimiro ya Katonda. Kabiri muli kizimbe kya Katonda.

¹⁰ Nga nkozesa ekirabo Katonda kye yampa, nataagho omusingi ng'omuzimbi omukugu, era omuntu owundi kw'ali kuzimbira. Kale buli azimbaku yeegendereze ensambo y'azimbiraku.

¹¹ Kuba Katonda yamala okutaagho Yesu Kurisito nga n'omusingi guti gwonka, era nga ghazira musingi gundi gusobola kuteebwagho.

¹² Ole asobola okuzimbira ku musingi ogwo: zaabu, oba feeza, oba amabaale ag'omughendo, oba emiti, oba eisubi oba eisandha.

¹³ Aye omulimo gwa buli muntu guliboneka ku lunaku lwa Kurisito, kuba olwo gulyolekebwa mu muliro, era mu muliro omwo, obulungi obwa buli mulimo gwa muntu, bwamanhika.

¹⁴ Omuzimbi aligheebwa empeera, kye yazimbira ku musingi bwe kirisigala nga tikyokeibwa muliro.

¹⁵ Aye omulimo gw'omuntu yeenayeena bwe gulyokebwa alifiirwa, waire mwene ng'aliwona aye era aliba oti n'atuumye mu muliro.

¹⁶ Timwidhi nga muli isinzizo lya Katonda, era nga Mwoyo wa Katonda aba mu imwe?

¹⁷ Kale buli muntu azikiriza eisinzizo lya Katonda, Katonda alimuzikiriza kuba eisinzizo lya Katonda itukuvu era imwe beene niimwe eisinzizo eryo.

¹⁸ Ghatabangagho muntu yeesubagha mwene. Omuntu yeenayeena mu imwe bwe yeerowooza okuba omugezi, mu magezi ag'ensi, afuuke musiru memale aghange okufuuka omugezi

¹⁹ kuba ensi ky'edhuuba okuba amagezi, kiba busiru mu maiso ga Katonda. Era kuba kyaghandiikibwa kiti: “Atega abagezi ng'abita mu magezi gaibwe geene”

²⁰ era n'aghandi kiti: “Musengwa aidhi ng'ebidhuubo by'abagezi tibigasa.”

²¹ Kale omuntu yeenayeena ateesuutanga olw'ebyo abantu bye bakoba, kuba ebintu byonabyona byaimwe.

²² Oba Paulo, oba Apollo, oba Petero, oba nsi, oba bulamu, oba okufa, oba ebirigho, oba ebiribaagho, byonabyona byaimwe.

²³ Ate imwe muli ba Kurisito, ate Kurisito wa Katonda.