1 Ab'e Korintho 2 - Baibuli Ekibono kya Katonda 2014

Amawulire agagema ku Kurisito eyakomererwa

¹ Aboluganda, bwe naidha ye muli okubakobera amazima ag'ekyama kya Katonda, tyakozesa bibono bikalangafu waire okukozesa amagezi ag'ekikugu.

² Kuba nasalagho okuleka ebindi byonabyona okutoolaku Yesu Kurisito n'okufa kwe ku musalaba.

³ Kale bwe naidha ye muli nali munafu nga ntya era nga ndhugumira zeenazeena

⁴ era mu ndhegeresa yange ni mu bukwenda bwange timwalimu magezi ga nsi agasendasenda, aye mwalimu kwoleka maani ga Mwoyo wa Katonda.

⁵ Olwo kyaba nti okwikiriza kwaimwe tikuva mu magezi ga nsi, aye kuva mu maani ga Katonda.

Amagezi ga Katonda

⁶ Waire nkobye ntyo, abo abakuze mu mwoyo mbakobera amagezi, aye nga amagezi ago ti n'ag'ensi eno oba ag'abo ab'obukumu abagifuga, abali n'okuwaagho.

⁷ Aye mbakobera amagezi ag'ekyama kya Katonda amagise, ge yataagho ng'ensi ekaali kutondebwa olw'okutugheesa ekitiisa.

⁸ Ghazira naire ku bafuzi ab'ensi eyakimanha, kuba nguli baali bakiidhi, tibandikomereire Musengwa ow'ekitiisa.

⁹ Aye nga bwe kyaghandiikibwa: “Katonda kye yategekera abo abamugonza, ghazira muntu yaali akiboineku waire okukiwuliraku, oba eyaali alowooziizaaku nga kisobola okubaagho.”

¹⁰ Aye niife Katonda be yamanhisa ekyama kye ng'abita mu Mwoyo we. Kuba Mwoyo aidhi buli kintu, era n'entegeka dha Katonda edh'omunda.

¹¹ Kuba naani aidhi ebidhuubo by'omuntu okutoolaku omwoyo gwe gwene ogumulimu? Kale ni ghazira aidhi bidhuubo bya Katonda okutoolaku Mwoyo wa Katonda.

¹² Mwoyo ye twafuna ti wa nsi eno aye ni Mwoyo ava ye Katonda, tusobole okumanha ebirabo Katonda bye yatugha.

¹³ Kale bwe tuba nga twinhonhola abo abali ni Mwoyo, titukozesa bibono bya magezi ga bantu buntu, aye tukozesa bibono bya Mwoyo.

¹⁴ Buli ataba ni Mwoyo taghanga kufuna birabo biva ya Mwoyo wa Katonda, kuba tabitegeera era abitwala ng'obusiru, kuba bimanhibwa ni mwoyo.

¹⁵ Omuntu aba ni Mwoyo oyo asobola okumanha buli kintu, aye mwene ghazira asobola kumwekebeedha.

¹⁶ Ebyaghandiikibwa bikoba biti: “Naani aidhi okulowooza kwa Musengwa? Naani asobola okumugalagira?” Aye ife tuli n'okulowooza kwa Kurisito.