1 Ab'e Korintho 1 - Baibuli Ekibono kya Katonda 2014

¹ Ninze Paulo, eyayetebwa olw'okwenda kwa Katonda, okuba omutume wa Kurisito Yesu, n'owoluganda Sosithene.

² Tughandiikira Ekikunsu eky'Abaikiriza mu Kurisito ekya Katonda ekiri mu Korintho abo boonaboona abaayetebwa okuba abatuukirivu mu Kurisito Yesu, ghalala n'abantu boonaboona abali buli ghantu, abeeghemba mu liina lya Yesu Kurisito Musengwa waibwe era owaife.

³ Enkabi n'emiraala ebya Katonda Lata waife, ni Musengwa Yesu Kurisito bibe n'imwe.

Okwesiima okuli mu Kurisito

⁴ Buliidho nsiima Katonda olwaimwe, olw'ekisa kye yabagemerwa mu Kurisito Yesu.

⁵ Kuba olw'okuba mu Kurisito, Katonda yabafuula abakombe mu bintu byonabyona, mu ndhogera ni mu kumanha.

⁶ Obukwenda obugema ku Kurisito bwasimba emizi mu imwe.

⁷ Olwo ghaabula ekitone eky'omwoyo kyonakyona kye muzira, nga bwe muteegerera okweyoleka kwa Musengwa waife Yesu Kurisito.

⁸ Ono n'alibagemerera mwaba bagumu okutuusa ku nkomerero, mulobe kuba na musango gwonagwona ku lunaku lwa Musengwa waife Yesu Kurisito.

⁹ Katonda mwesigwa, oyo eyabeeta okwisa ekirala n'Omwana we Yesu Kurisito Musengwa waife.

Obutaisania mu Kikunsu ky'Abaikiriza mu Kurisito

¹⁰ Aboluganda, mbeeghembye mu liina lya Musengwa waife Yesu Kurisito mwisanie, mulobe kweyawulayawulamu aye mube kitole mu kulowooza ni mu kukola.

¹¹ Kuba, aboluganda abandi ku bantu ab'omu ndhu ya Kuloe bankobera bukalamu, mbu ghaligho okusoolasoola mu imwe.

¹² Kye ndi kukoba ni kino, mbu abandi bakoba bati: “Nze ndi wa Paulo,” n'abandi bati: “Nze ndi wa Apollo,” n'abandi bati: “Nze ndi wa Petero,” ate abandi bati: “Nze ndi wa Kurisito.”

¹³ Obwo Kurisito ayawiirwayawiirwamu? Paulo n'eyabafiirira ku musalaba? Oba mwabatizibwa kuba beegeresebwa ba Paulo?

¹⁴ Neebaza Katonda okuba nga ghazira ku imwe ye nabatiza okutoolaku Kurisipo ni Gayo.

¹⁵ Kale ghazira aghanga kukoba ati yabatizibwa kuba mwegeresebwa wange.

¹⁶ Otyo, ndidhukiire, nabatiza ni Sitefana n'amaka ge goonagoona, aye tiidhukira nga nabatizayooku omuntu owundi yeenayeena.

¹⁷ Kurisito tiyantuma kubatiza aye yantuma okukobera abantu Amawulire Amalungi, era ngabakobere nga tikozesa magezi ga bantu, olwo okufa kwa Kurisito ku musalaba kulobe kuwaamu maani gaakwo.

Kurisito, amaani era amagezi ga Katonda

¹⁸ Abo abali kuzikirira tibabona makulu mu kibono kya kufa kwa Kurisito ku musalaba, aye ife abali kulokolebwa tukibona nga n'amaani ga Katonda.

¹⁹ Kuba ebyaghandiikibwa bikoba biti: “Ndizikiriza amagezi g'abagezi, era naamaliragho irala okumanha kw'abeegerese.”

²⁰ Kale olwo omugezi ali gha? Oba omwegerese ali gha? Oba kabwidhibwidhi ow'ensi eno mu kutakana ali gha? Katonda ayoleike ng'amagezi ag'ensi eno gaaga busiru,

²¹ kuba Katonda mu magezi ge yalemesa abantu okumumanha mu magezi gaibwe beene. Era yaasalagho okulokola abo abamwikiriza ng'abita mu kibono kye tubakobera, abandi kye beeta “obusiru”.

²² Kuba Abayudaaya benda bumanhiso, ate Abagureki baagala magezi.

²³ Aye ife tubakobera ku Kurisito ye baakomerera, eyafuuka ekitimuguunha eri Abayudaaya, ate ekizira makulu eri abamaghanga agandi.

²⁴ Aye eri Abayudaaya n'abamaghanga agandi abaayetebwa Katonda, ekibono kino ni Kurisito, amaani era amagezi ga Katonda.

²⁵ Kuba obwandiboneike ng'oti n'obusiru bwa Katonda, bugezi okusinga amagezi ag'abantu, ate obwandibaire obunafu bwa Katonda, n'amaani agasinga ag'abantu.

²⁶ Aboluganda, mwidhukire bwe mwali Katonda lwe yabeeta. Batono ku imwe ensi be yali etwala ng'abagezi, batono abaali ab'obukumu oba abakungu.

²⁷ Katonda yasalagho okulonda abo ensi b'etwala nga basiru, aswaze abagezi. Era yaalonda abo ensi b'etwala okuba abanafu, aswaze ab'amaani.

²⁸ Yalonda abo ensi b'etwala nga ba ghansi, nga baziramu mugaso era abanhoomebwa, olwo ayoleke ng'abo ensi b'etwala ng'abalimu omugaso, muzira.

²⁹ Era ghabule omuntu aghanga okwesuuta mu maiso ga Katonda.

³⁰ Katonda oyo n'ensimuko ey'obulamu bwe muli nabwo mu Kurisito Yesu. Kurisito oyo Katonda ye yafuula amagezi gaife, era oyo n'atufuula abatuufu eri Katonda, era n'atutukuza, era oyo n'okununulibwa kwaife.

³¹ Kale nga bwe kyaghandiikibwa: “Oyo eyeesuuta, yeesuutenga ku lwa Musengwa.”