Yuda 1 - Sukuma New Testament 2000

Kūgīsha

¹ Nene Yuda nsese wa ng'wa Yesu Kilisto, na ng'wana wa ng'wawe wa ng'wa Yakobo. Kū batogwa abo balī bitanwa, hangī balanghanilwe na Mulungu Sīswe mulī Yesu Kilisto.

² Shigongo na mhola, hamò na būtogwa shongejiwe kū bing'we.

Būlamulwa wa bahūbya ba banhū

³ Batogwa, naalī na nghūmbū ja kūng'wandīkīla mihayo ya būpīji ūbo būlī wise pye a bose. Alīyo nabona īnigeleelilwe nang'wandīkīle ya kūmuguzuhya ū mu kūkūlwīlīla ū kūzunya, ūko benhelilwe beela lūkangala lūmò na lūmò dūhū.

⁴ Nguno balīyigungumalīka moi mu wiba-wiba na banhū abo bahelelilwe nsango kūfuma kale, abo bakūshigalūchaga ī shigongo sha ng'wa Mulungu wise kūbiza mhayo gwa būsoso. A boi batī na logohano ū kūlī Mulungu, nīyo bakūnemaga nū Seeba wise ū Yesu Kilisto, ūyo alī Seeba we wike.

⁵ Na nghana ng'wīmanile pyī ī mihayo, alīyo nalībona īlī yawiza nang'wizūkīje gīkī, ū Seeba ūyo akabafunya a banhū mu sī ya Misili, ūbapīja, ū kū būjiiwa akabakenaagūla abo bakaduuma ū kwiyūmīlīja ū mu kūzunya!

⁶ H'ūmo walī wabīītīla na a bamalaika abo bakalemeelwa kūlembeela h'ipandī lyabo, bīnga ū mu nhūngwa ījo jaalī jibigelile. A benabo abalugalīlile mu giiti sha būtungwa bo welelo na welelo; balindīīlilwe būlamulwa bo mu lūshikū lūtaale.

⁷ Na a bana Sodoma na Gomola, hamò nī mizengo īyo baalī babīmbīkanilwe nayo, nabo akabagwisīja nsango kūlwa nhūngwa ja būjingi, na būsoso wa mbika ngeni ū mu kikalīle ka mīlī. Ū nsango gwabo būlī būlolelo wa moto gwa welelo na welelo, ūyo gūbalindīīlile abo bakīītaga mihayo īlī gīko.

⁸ H'ūmo bakwītīlaga nabo a banhū benaba, balooti na basosohaja ba mibīlī yabo, hangī badalahi na basondagūji ba bataale!

⁹ Alīyo nūūlū ū Mikaeli, ū malaika ntaale, aho wilwishaga na kwihalalīja na Shetani kūlwa nguno ya mīlī go ng'wa Musa, atagimile kūnghama mu būsondagūji; akang'wīla dūhū gīkī, “Seeba akūhame.”

¹⁰ Lelo a benaba, bakūsondagūlaga mihayo īyo batayitegelegije nūūlū hado! Alīyo ī mihayo īyo bīmanile na kale kūlwa kasūmbīlwe, gīt'ūmo na ndimu jilī, hū yene īkūbasosohajaga.

¹¹ Balī mu kwihīga, nguno bakūshimīzīlaga mu nzīla ya ng'wa Kaini; banhū ba kwikala bihuutīīlaga milīmo ya kūbapandīkīla mheela, gīt'ūmo bolī būhūbi bo ng'wa Balaamu. Balī mu nhabaala kūlwa nguno ya būgomi gīt'ūbo bolī bo ng'wa Kola.

¹² A banhū benaba bakabizaga mabbado masoso ūlū balī hamò ning'we ū mu shigukulu shing'we sha būyegi, nīyo batachaaga na soni nūūlū bakwizaga kwisangīja hamò ning'we kūlya shilīwa. Banhū bahuhu ba kwikala badīlīlile gwa kwilisha boi benekīlī dūhū, babange malunde madūhū, ayo gakūhūhūūjiagwa nyaga, balī gītī mitī yaminyiwa chū, ītī na matwajo; nīyo yūma yūkīlanīja, yūkadubbūlwa na kūdubbūlwa!

¹³ Balī gītī mahuuli ga mu nyanza gakūfuluutaga ifulo, lyene minala yabo. Babange gītī masonda mayeeji ayo gabalīlilwe kūjimīlīla mu giiti sha gamha welelo bose!

¹⁴ Nū Enoka, ūyo walī munhū wa mpungatī kūfuma halī Adamu akahanga, ūbahaya a banhū benaba gīkī, “Lolagi, ū Seeba alī na mabità ga banhū bakwe shihūmbī makūmi na makūmi.

¹⁵ Aliza kūbalamula pye a banhū na kūbakaanīlīja pye a bahūnga kūlwa shītīle shabo shabūbi, īsho bakūshītaga mu būbi wabo; na kūlwa mihayo ya malofu ī yose īyo banghayaga a bahūnga na a bīīti ba shibi benabo!”

¹⁶ Bang'ung'uuji ba bang'ung'uuji na bilīja-līja, banhū ba shimīzīle ya kūtongeelwa na kwikūmva kwabo; ba milomo ya kwikala īkūyombaga mihayo ya magaka, na ya nyadooshi, ba kwikala bakūbakumīlījaga banhū kūlwa nguno ya kwipandīkīla nīīlo!

Būhūgūji na būkomeleja

¹⁷ Alīyo a bing'we batogwa, yizūkagwi ī mihayo īyo mukandya kūwīlwa na a batūng'wa ba ng'wa Seeba wise Yesu Kilisto.

¹⁸ Ūmo bakamuwīlīla gīkī, “Ū kū shikū ja kū mhelo bakwilonga basondagūji, bakūyūlomeela mihayo mibi no, kūlwa kwikūmva kwabo kwabūbi.”

¹⁹ A benaba h'a benheleja ba wilemeelwa, banhū ba nhūngwa ja mu mīlī dūhū, batī nanghwe gete ū Moyo!

²⁰ Alīyo a bing'we badūgū bane, ng'ūlomba mu nguzu ja ng'wa Moyo Ng'wela, mukūzenge ū kūzunya kwing'we ūko kūlī kwela no-no-no.

²¹ Ilanghanagi, ng'wikale mu būtogwa bo ng'wa Mulungu ū ng'wikanza lya kūshilindīīla ī shigongo sha ng'wa Seeba wise Yesu Kilisto, kūlwa kūng'winha būpanga būtūshila.

²² Ng'ūbasaatwa abo bakūhana-hanaga.

²³ Hama bangī ng'ūbahwehula kwīnga ū mu moto ng'wabapīja; nīyo ng'ūbasaatwa mu logohano. Shikolagwi nī shizwalo sha būsoso wa kūfuma mu nhūngwa ja mīlī.

Mihayo ya kūmalīja

²⁴ Hūna lūūlū ī haha, ū kūlī we ūyo adūgije kūmulanghana mutizipama, na kūmutūūla ng'wikūjo lyakwe we mubize mutī na shilingo, alīyo mubize na būyegi būtaale;

²⁵ ū kūlī we ng'wenūyo ūyo alī Mulungu ūmò wike, na mpīja wise mulī Yesu Kilisto Seeba wise, lībize ikūjo na būtaale, na nguzu na būdūla shikū jose; kwandīja haha kūshisha welelo na welelo: Alichene.