Yohana 21 - Sukuma New Testament 2000

Yesu kwiyoolecha kū bahemba mpungatī

¹ Hanuma hangī ū Yesu akīīta wiyoolecha ū kū bahemba bakwe baalī kū nyanza ya Tibelia. Ū mu kwiyoolecha kwakwe ī mihayo yalī gīkī:

² ū Simoni Petelo walī hamò na Tomaso, ūyo witanagwa Didumo, na Natanaeli ū muna Kana ya Galilaya; hamò na ba ng'wana Zebedayo, na bahemba bangī babīlī.

³ Hūna ū Simoni Petelo ūbawīla a biye gīkī, “Bing'we bagosha, naja kūtega ndīlo ū nene.” Nabo būng'wīla, “Nise tūlīja hamò nangho!” Nghana būja būūkingīla mu lyato. Alīyo ū būjikū wenūbo batagwashije shose-shose.

⁴ Aho wela ī dilū, bahayimanīla ū Yesu wīmīīla a ha ng'walo; kwike a boi a bahemba batang'witegelegije gīkī hū walī ng'wene ū Yesu.

⁵ Ūbahamukīla ūhaya gīkī, “Bing'we basūmba, mulī na shilīwa shose-shose?” Nabo būnshokeja, “Mm yaya!”

⁶ Ūbawīla, “Tegagi ū ntego a ha lwandī lwa būlyo bo lyato aho, mukūgwasha!” Na nghana aho bagūtega, būlemeelwa nū kūgūzubūla kūlwa wingī bo ndīlo.

⁷ Hūna ū nghemba ūyo Yesu walī antogilwe ūng'wīla ū Petelo gīkī, “Bebe hū ng'wene ū Seeba ū ng'wenūyo!” Ū Simoni Petelo aho wigwa gīkī ū ng'wenūyo walī Seeba, witunga ng'wenda; nguno walī dūūhū, hūna wiponeja mu nyanza.

⁸ Alīyo a bahemba a bangī būshikīīla bo lyato balīgūduta ū ntego go ndīlo, nguno baalī batī kūle nū ng'walo. Bolī bū kūle bo magūlū gītī igana.

⁹ Aho bashika a ha ng'walo būsanga moto gwa makala gobachiagwa, a higūlya yago īlīho ndīlo na ngatī.

¹⁰ Ū Yesu ūbawīla gīkī, “Enhagi aha ndīlo jimò ījo ng'wagwasha haha.”

¹¹ Ū Simoni Petelo ūja ūūkagūduta ū ntego ūgwenha ha ng'walo; gwalī gokala pa, ndīlo nhaale-nhaale igana na makūmi atanò n'idatū. Alīyo nūūlū īkī gwalī gokala gīko, nahene gūtatandūkile!

¹² Hūna ū Yesu ūbawīla gīkī, “Nzūgi aha mulye.” Alīyo nūūlū ūmò wa bahemba atagimile kūmūja, “Ūlī nani?” Nguno bakamana gīkī hū ng'wene ū Seeba.

¹³ Ū Yesu wiza ūgūsola ū ngatī ūbinha; nī ndīlo wīta gīko.

¹⁴ Ū lwenūlo lūbiza lūkangala lo kadatū ū Yesu kwiyoolecha ū kū bahemba bakwe kūfuma a h'ikanza lya būjūūko.

Yesu na Petelo

¹⁵ Bahayūmala ū kūlya, ū Yesu ūmūja ū Simoni Petelo gīkī, “Simoni ng'wana Yohana, ū bebe ūnitogilwe kūbatinda a benaba?” Ūng'wīla, “Alichene Seeba; ū bebe ūmanile gīkī nakūtogilwe.” Ūng'wīla, “Balishage a baana ba ngholo bane.”

¹⁶ Ūmūja hangī lo kabīlī, “Simoni ng'wana Yohana, ūnitogilwe?” Nanghwe ūng'wīla, “Alichene Seeba; ūmanile nakūtogilwe.” Ūng'wīla “Jidīīmage ī ngholo jane.”

¹⁷ Ūmūja hangī lo kadatū, “Simoni ng'wana Yohana, ūnitogilwe?” Nose ū Petelo ūpīnīhala, nguno ū Yesu akamūja lūkangala lo kadatū gīkī, “Ūnitogilwe?” Na ūng'wīla, “Ū bebe Seeba ūmanile pyī ī yose, ūmanile gete ī gīkī nakūtogilwe.” Hūna ū Yesu ūng'wīla, “Jilishage ī ngholo jane.

¹⁸ Kwike nalīkūwīla gwa nghana gīkī, aho ūtaalī ūlī nsūmba ūkūmanitunga bebe ng'wenekīlī waja ūko ūtogelilwe. Alīyo ūlū ūlanamhaale, ūkūgagoloola a makono gako, na munhū ūngī akūtunge akūtwale ūko ūtatogilwe kūja.”

¹⁹ Ū mukūgūhaya ū gwenūyo, akoolecha ūmo akūchīla ū Petelo, kūlwa kūnkūja Mulungu. Aho wamala kūhaya gīko ūng'wīla; “Nilondeelage.”

Yesu na nghemba ntogwa

²⁰ Ū Petelo aho wikībūka ūmona ū nghemba ūyo Yesu walī antogilwe, ūyo h'ikanza lya shilīwa walī wigasha wihela nanghwe haho bbihī; ūmūja na gīkī, “Seeba nani ūyo akūkūlodeela?” Ū ng'wenūyo nanghwe wakūūbījaga.

²¹ Ū Petelo aho wamona ū nghemba ng'wenūyo ūng'wīla ū Yesu gīkī, “Seeba al'ūyū nanghwe hangī ginehe?”

²² Ū Yesu ūng'wīla “Ī gīsī gūlīho mhayo kī ū kūlī bebe, ūlū nūbiza natogilwe ū ng'wenūyū ashinge ho kūshisha nashoke? Ū bebe ng'wene nilondeelage dūhū!”

²³ Hūna ū mu badūgū gūkumūka gwa gīkī ū nghemba ng'wenūyo atūcha! Alīyo ū Yesu atahayile gīkī atūcha. Akahaya dūhū gīkī, “Ī gīsī gūlīho mhayo kī ū kūlī bebe, ūlū nūbiza natogilwe ū ng'wenūyū ashinge ho kūshisha nashoke?”

²⁴ Ū nghemba ū ng'wandīki wayo ī mihayo yenīyī hū ng'wene ū mbonà wayo, na hangī tūmanile gīkī ū būkaanīji bokwe būlī bo nghana.

²⁵ Na yīngī mingī īlīho īyo wabeeja ū Yesu; ūlū ni kwandīkwa pyī ī yose būlī gwene gūmò-gūmò, naliganika nūūlū ī sī yenekīlī ni ītadūgije ū kūshibūūcha ī shandīkwa: Alichene!