Yohana 20 - Sukuma New Testament 2000

Kūjūūka kwa ng'wa Yesu

¹ A ha lūshikū lo kwandya nyuma, ū Malia Magadalena akaja ū kū shigila dilū makīngo, ūsanga ī liwe lyīnjiagwa a ha shigila.

² Wīnga ko alīpeela ajile kūlī Simoni Petelo nū nghemba ū ūngī, ūyo Yesu walī antogilwe. Ūūkabawīla gīkī, “Bang'wīnjaga ū Seeba ū mu shigila, tūtamanile hīmba bantūūlaga halī!”

³ Hūna ū Petelo nū nghemba ū ūngī ng'wenūyo, būbūūka bajile ū kū shigila.

⁴ Bandya kūpeela nhambo pyī būbīlī wabo. Alīyo ū nghemba ū ūngī ūnshiga ū Petelo, ūbiza o kwandya ū kūshika a ha shigila.

⁵ Winama kūsūūla moi, kūnū akwīlola-lolaga ī myenda ya kūjīkīlwa; kwike atingīlile mo.

⁶ Ūshika nū Simoni Petelo a ha numa yakwe, ū ng'wene ūshikīla kwingīla mo ū mu shigila; wībona ī myenda ūmo yalī ītūūlīlilwe.

⁷ Nī shitambaala īsho shalī shikonzeelilwe ū kū ntwe gokwe ūshibona; ī shene shilinga-lingilwe shūtūūlwa heeke, shitī hamò nī myenda ī yīngī.

⁸ Hūna nū nghemba ū ūngī, ūyo akashika kwandya a ha shigila, wingīla moi; ūbona ūzunya.

⁹ Kūshisha ikanza lyenīlo baalī bataalī ū kūshiitegeleja ī shandīkwa: ī gīkī yalī yigelile ajūūke kūfuma mu bafu.

¹⁰ Hūna būshoka kaya a bahemba benabo.

Yesu na Malia Magadalena

¹¹ Kwike ū Malia ūlekwa īmīīlile haho hanze ya shigila akūlīlaga. Aho alīlīla gīko, winama kūlola hangī ū mu shigila.

¹² Ūbabona mo bamalaika babīlī bazwalile myenda yape, bigashaga aho gwalī gūlaajiwe ū mīlī go ng'wa Yesu: ūmò walī ūko gaalī magūlū, ūngī ūko gwalī ntwe.

¹³ Būmūja gīkī, “Ūlīlīlīīla kī mayū?” Nanghwe ūbawīla, “Bang'wīnjaga ū Seeba wane, alīyo natamanile ūko bantwalaga!”

¹⁴ Aho wahaya gīko ūgalūka kūlolela kū numa, ūmona ū Yesu wīmīīlaga, alīyo atang'witegelegije gīkī walī hū ng'wene ū Yesu.

¹⁵ Nanghwe Yesu ūmūja, “Ūlīlīlīīla kī mayū? Ūlīkooba kī?” Ū wei wiganika gīkī hamo ntūmami wa mu ngūnda. Ūng'wīla, “Baba ūlū wang'wīnjaga niwīlage ūko wantūūlaga, nanjīle ko!”

¹⁶ Hūna ū Yesu ūng'witana, “Malia!” Ūngalūkīla ūng'witana mu Shihebulania, “Laboni!” (makūlū gaho, “Nangi!”)

¹⁷ Ū Yesu ūng'wīla, “Yaya ū kūnidimīīla, nguno nataalī ū kūlinha kūja kūlī Baba. Alīyo jaga ū kū bang'wise, ūkabawīle gīkī nalīja kūlī Baba, ūyo alī Sīng'we na a bing'we; kūlī Mulungu wane, ūyo alī Mulungu wing'we na a bing'we.”

¹⁸ Ū Malia Magadalena aho washika ū kū bahemba ūbawīla gīkī, “Bing'we, namona ū Seeba ūniwīla ī mihayo yenīyī!”

Kwiyoolecha kwa ng'wa Yesu kū bahemba

¹⁹ Ī mhīndī ya lūshikū lwa kwandya nyuma lwenūlo, a bahemba baalī bilugalīla mu numba, kūlwa kūbogoha Bayudaya. Bahayimanīla ū Yesu wīmīīla ha gatī-gatī yabo; ūbagīsha, “Mulī mhola!”

²⁰ Aho wamala ū kūbagīsha ūboolekeja a makono gakwe, nū lūbazu. Bakayega no a bahemba ū kūmona ū Seeba.

²¹ Na ūbawīla gīkī, “Ikalagi mu mhola; ūmo anitūmīlile ū Baba nū nene nalīmutūma gīko a bing'we.”

²² Aho wamala ū kūhaya ī yenīyo ūbahaahīla; hūna ūbawīla gīkī, “Ng'wanukūlagi Moyo Ng'wela.

²³ Bose-bose abo mukūbalekeja shibi shabo bakūbiza balekejiagwa, ūlū ng'ūbatunga numho batungagwa.”

Yesu na Tomaso

²⁴ Alīyo ūmò wabo abo ikūmi na babīlī, lina lyakwe Tomaso, lina līngī witanagwa Didumo, ū ng'wene osangwa alīndūhū aho aliza ū Yesu.

²⁵ Na lūūlū būng'wīla a bahemba biye, “Twamonaga ū Seeba,” ū wei ūbawīla gīkī, “Ū nene natīko ū kūzunya ūlū natagabonile a malanda ga mizumali ū mu makono gakwe, nūgakuumya na kūgakuumya na lwala lone; hangī nūtūūla nū nkono gwane a ha lūbazu lokwe!”

²⁶ Ha numa ya shikū inaane, a bahemba būsangwa balī mu kaya hangī, nī milyango īlugalilwe, lelo nū Tomaso alī hamò nabo; kwimanīla ū Yesu wīmīīla ha gatī-gatī yabo: ūbagīsha hangī, “Mulī mhola!”

²⁷ Hūna ūng'wīla ū Tomaso gīkī, “Enhaga ū lwala lwako aha ūgalole a makono gane, wenhe nū nkono gwako ūgūtūūle a ha lūbazu lone, ūzunye ooye ū kūhana-hana.”

²⁸ Ū Tomaso ūnshokeja alīng'wīla, “Seeba wane na Mulungu wane!”

²⁹ Nanghwe ū Yesu ūng'wīla, “Hū wazunya īkī wanibona? Alīyo balī na mbango abo bakazunyaga nūūlū aho bataalī ū kūbona.”

Nguno ya kwandīka

³⁰ Ū Yesu wabeeja shimanīkījo shingī no ū kū būtongi bo bahemba bakwe. Īsho shitandīkilwe ū mu shitabo shenīshi, shilīho shingī.

³¹ Alīyo ī shenīshi shandīkilwe kūlwa kūmugunaana, muzunye gīkī ū Yesu alī Ng'wana wa ng'wa Mulungu, ūlū ng'ūzunya mukūpandīka būpanga ū mu lina lyakwe.