Yohana 2 - Sukuma New Testament 2000

Yesu ha būkwīlīma mu Kana ya Galilaya

¹ Ha lūshikū lo kadatū lwaho, shikabiza ho shigukulu sha būkwīlīma mu Kana ya Galilaya; nū nina wa ng'wa Yesu walīko.

² Nū Yesu walīko hamò na a bahemba bakwe, nguno baalī balaalīkwa.

³ Bahayimanīla yashila ī divai; hūna ū nina ūng'wīla, “Bamala ī divai!”

⁴ Nanghwe ū Yesu ūng'wīla gīkī, “Mayū, nilekage ū nene, ī likanza lyane lītaalī ū kūshika!”

⁵ Ū nina ūbawīla a batoneeji gīkī, “Ūlū alamuwīle mhayo gose-gose gwītagi.”

⁶ Jikasangwa jilīho hoi nno itandatū ja mawe, ja kūtūūlīla minzī ga kūmanooja mhambala, ūmo shalī shīmīle sha Bayudaya. Būlī lūnno lwalī lūshikile kokala madebbe atanò nūūlū mpungatī.

⁷ Hūna ū Yesu ūbawīla gīkī, “Jokajagi minzī ī nno.” Būjokaja pa-pa-pa.

⁸ Ha numa ya henaho ūbawīla hangī, “Dahagi magehu lūūlū muntwalile ū ntaale wa shigukulu!” Nghana būntwalīla.

⁹ Ū ntaale wa shigukulu aho wagaloja a minzī genayo, ūbona gīkī īlī divai; kwike ūjimīīlwa ūko yafumaga, alīyo a batoneeji abo baalī bagadaha a minzī baalī bamanile. Hūna ū ntaale wa shigukulu ūng'witana ū ntooji.

¹⁰ Ūng'wīla gīkī, “Pye a banhū bakatengaga tame ī divai ī nonu; ūlū būng'wa a banhū bigeja, nūūlū ūlīyīfunya lūūlū nī yīyo īchoomeelile shi! Hama ū bebe nibūlī wībīkaga ī divai ī nonu, nose gashika makanza aya?”

¹¹ Ū wenūbo walī wandījo wa shimanīkījo īsho Yesu akabeeja mu Kana ya Galilaya; shoolecha ikūjo lyakwe, a bahemba bakwe būnsanya.

¹² Aho yabīta ī yenīyo ū Yesu akaja Kafalanaūmu; nū nina na a baana ba ng'wawe būja koi, hamò na a bahemba bakwe, kwike batikalile ko shikū ningī.

Kwejiwa kwa hekalu

¹³ Hūna lūūlū aho yegeela kūshika pasaka ya Bayudaya, ū Yesu ūlinha kūja Yelusalemu.

¹⁴ Ūūkasanga balīmo ū mu hekalu basūlūja ba ng'ombe na ngholo na mhunda, na bakaabanya ba hela bigashaga.

¹⁵ Ūsola ngoye ūbeeja mbooko, ūjipeeganja ī ngholo nī ng'ombe jūfuma ū mu hekalu; nī meza ja bakaabanya ba hela ūjisalingūla, ūbitagūja ī hela jabo.

¹⁶ A bajinja ba mhunda ūbawīla, “Gīnjagi a genaya ū ng'wenūmu, ī numba ya ng'wa Baba mutīgalūchage kūbiza ya basūlūja!”

¹⁷ A bahemba bakwe būgwizūkwa ūyo gwandīkilwe; gīkī, “Būkūnilya ū wilu kūlwa numba yako.”

¹⁸ Hūna lūūlū a Bayudaya būnshokeja būng'wīla, “Ūlītoolekeja shimanīkījo kī, ī gīkī ū bebe wigeleelilwe kwīyīta pyī ī yenīyī?”

¹⁹ Nanghwe ū Yesu ūbashokeja ūbawīla, “Īsambagūlagi ī hekalu īyī, nane nakwīyīmīlīja hangī mu shikū idatū.”

²⁰ A Bayudaya būng'wīla, “Mm! Ī hekalu īyī yashishaga myaka makūmi anè n'ītandatū īkūzengagwa, ū bebe hū wīyīmīlīje mu shikū idatū dūhū!”

²¹ Kwike ū wei ohayaga hekalu ya mīlī gokwe.

²² Ū Yesu aho wajūūka kūfuma mu bafu, a bahemba bakwe bizūkwa gīkī walī wagūhaya ū mhayo gwenūyo, būshisanya ī shandīkwa, pyī nī mihayo īyo wīhayaga ū Yesu.

Abamanile hape pye a banhū

²³ Aho alī mu Yelusalemu kūlwa nguno ya shigukulu sha pasaka, bingī bakalīzunya ī lina lyakwe aho bashibona ī shimanīkījo īsho wabeejaga.

²⁴ Alīyo ū wei ng'wenekīlī ū Yesu, walī atīītaga mhayo mu kwiyoolecha gīkī babone bansanye, nguno ū wei walī abamanile hape pye a banhū.

²⁵ Nose yalī ītīho nguno ya kūng'wīla mihayo ya ng'wa munhū ose-ose, īkī ū wei walī amanile īsho shilī mu gatī ya ng'wa munhū.