Yohana 17 - Sukuma New Testament 2000

Kūlomba kwa ng'wa Yesu

¹ Ū Yesu aho wamala kūhaya ī yenīyo, ūlangamīla kwigūlya. Ūlola ng'wigūlū wandya kūhaya gīkī, “Baba lyashika ī likanza; nkūjage ū Ng'wana wako, nanghwe ū Ng'wana wako akūkūje ū bebe.

² Nguno wang'winhile būsugi higūlya ya banhū bose, gīkī pye abo wang'winhile abinhe būpanga bo welelo na welelo.

³ Ū būpanga bo welelo na welelo wene kūkūmana bebe ūyo ūlī Mulungu wa nghana; Mulungu ūmò wike, hamò na Yesu Kilisto, ūyo ūntūmile bebe.

⁴ Ū nene naagūshikīlīgije ū nīmo ūyo ūninhile kūgūbeeja, nūkwenhela ikūjo ū mu sī.

⁵ Ali lūūlū Baba, nigūngūhyage hamò nangho ī haha, nabize mo ū ng'wikūjo īlo naalī nalyo hamò nangho kūfuma na a haho sī ītaalī kūseeng'wa.

⁶ A banhū abo ūbasolile kūfuma mu sī ūninha nene, naaboolekegije ī lina lyako. A boi baalī bako, alīyo waninhile nene, nīyo ī haha bagūdimile ū mhayo gwako.

⁷ Bamanile gīkī pyī ī shikolo īsho ūninhile shilī shako.

⁸ Nguno ī mihayo yako īyo ūninhile nene, naamalile kūbinha būyanukūla. Hūna lūūlū, ī haha bamanile gete gīkī, ū nene nafumile kūlī bebe. Na bazunije gīkī ū bebe hū ng'wene ūyo ūnitūmile.

⁹ A benaba h'abo nalībalombela; natūlombelaga banhū ba mu sī, alīyo abo ūninhile, nguno a benaba balī bako.

¹⁰ Pye a bane balī bako, na a bako balī bane. Na lūūlū nakūkūjiagwa ū mubo.

¹¹ Ū nene ī haha natīmo ū mu sī, naliza kūlī bebe; alīyo a bene bataalī balīmo ū mu sī. Baba ng'wela, balanghanage mu lina lyako īlo ūninhile, babize mu būmò, gīt'ūmo bise tūlī ūmò.

¹² Aho naalī nataalī hamò nabo, nalūbalanghanaga na kūbakīngītīīla mu lina lyako īlo ūninhile. Atayagalile nūūlū ūmò wabo, ūlū atī ū ng'wana wa kūyagala dūhū; kūlwa gīkī shishikīlījiwe ī shandīkwa.

¹³ Ī haha naliza kūlī bebe, ī mihayo yenīyī nalīyīhaya mu sī, gīkī babize nabo ū būyegi bone ū mubo; nīyo būbize būshikanu.

¹⁴ Ū nene naamalile ū kūbinha ū mhayo gwako, hūna lūūlū a ba mu sī baabakolilwe īkī a bene batī ba mu sī, gīt'ūmo nene natī wa mu sī.

¹⁵ Natūlombaga ūbīnje ū mu sī, alīyo ūbalanghane ū kūlī Mi.

¹⁶ A boi batī ba mu sī gīt'ūmo nene natī wa mu sī.

¹⁷ Beejage mu nghana yako; ū mhayo gwako hū yene ī nghana.

¹⁸ Ūmo ūkanitūmīla nene ū mu sī, nū nene h'ūmo nalībatūmīla a boi ū mu sī.

¹⁹ Naliyeeja nene ng'wenekīlī kūlwa nguno yabo, gīkī nabo babize beejiagwa mu nghana.”

Yesu kūbalombela bazunya bose

²⁰ “Natūbalombelaga aba dūhū, alīyo na a babo balanizunye kūlwa mhayo gwabo aba.

²¹ Nabo pye babize balī mu būmò gīt'ūmo bebe Baba ūlī mulī nene, nū nene ūmo nalī mulī bebe. Na a bene babize ū mu bise; ī sī īzunye gīkī nghana ūnitūmile bebe.

²² Na hangī ū nene naabinhile ī likūjo īlo ūninhile ū nene, gīkī babize balī mu būmò, gīt'ūmo bise tūlī ūmò.

²³ Ū nene mubo nū bebe mulī nene; ū būmò wabo būshikane mu gīko, ī sī īmane gīkī ū bebe h'ūyo ūnitūmile, na hangī gīkī ūbatogilwe nabo gīt'ūmo ūnitogelilwe ū nene.

²⁴ Baba, natogilwe abo wamalile kūninha babize hamò nane. Balībone ī likūjo īlo ūninhile, nguno ūnitogilwe kwīngīīla kale, na a haho sī ītaalī kūseeng'wa.

²⁵ Baba ntūngīlīja, a banhū ba mu sī batakūmanile, alīyo ū nene nakūmanile; na a benaba bamanile gīkī hū bebe ūyo ūnitūmile.

²⁶ A benaba naabalangile ī lina lyako, hangī nakongeja ū kūbalanga, ū būtogwa wako ūmo ūnitogelilwe na a bene babize nabo, nū nene nabize hamò nabo.”