Yohana 13 - Sukuma New Testament 2000

Kūbooja mhambala bahemba

¹ Ali lūūlū, kūfuma aho shitaalī kūshika ī shigukulu sha pasaka, ū Yesu walī amanile gīkī ī likanza lyakwe lya kwīnga ū mu sī kūja kūlī Ise, lyalī lyashika. A bakwe abo balī mu sī walī abatogilwe no, nīyo walī abatogilwe kūshisha kū būkalīkījo!

² Hūna lūūlū, aho balīlya shilīwa sha mhīndī, ū Shetani osangwa omalaga kūntūūlīla ū Yuda ng'wana Simoni Isikaliote, iganiko lya kūnodeela ū Yesu.

³ Alīyo ū wei ū Yesu walī amanile gīkī, pyī ī shose shitūūlilwe na Ise mu makono gakwe, na gīkī ū wei afumile kūlī Mulungu, na hangī ajile kūlī Mulungu.

⁴ Hūna ūbūūka a ha shilīwa; ūzuula ī nghanjo yakwe, wītūūla ha mhūjo, ūsola taulo witunga.

⁵ Ūsola na minzī ng'wikalayi, hūna wandya kūbooja ī mhambala jabo a bahemba bakwe, wajipyagūla nī taulo īyo walī witunga.

⁶ Aho washika halī Simoni Petelo, ū ng'wene ūng'wīla gīkī, “Seeba ū bebe hū ūnooje mhambala ū nene?”

⁷ Ū Yesu ūnshokeja alīng'wīla, “Ūyo nalīgwīta ūtūgūmana ū bebe ī haha: ūkūgūmana ha numa.”

⁸ Ū Petelo ūng'wīla gīkī, “Yaya ū bebe ūtalanooja mhambala jane welelo bose!” Ū Yesu ūng'wīla, “Ūlū natakoogije tūtūbiza na būsangī, ū bebe nū nene.”

⁹ Ū Simoni Petelo ūng'wīla, “Seeba, ūlū chene numho ītī mhambala jane dūhū, alīyo na a makono gane, pyī nū ntwe!”

¹⁰ Ū Yesu ūng'wīla gīkī, “Ūyo wamalaga kooga atī na nguno ya kooga hangī, ūlū ītī mhambala jakwe dūhū. Ū ng'wenūyo welaga pyī ū mīlī. A bing'we mulī beela, kwike mutī a bose!”

¹¹ Akahaya gīkī, “Mutī beela a bose;” nguno walī aamanile ūyo walī n'iganiko lya kūnodeela.

¹² Aho wamala ū kūbooja ī mhambala jabo ūzwala ī shizwalo shakwe, wigasha hangī. Hūna ūbabūja, “Ng'wagwitegeleja ūyo namala kūng'wītīla gwenūyū?

¹³ A bing'we mukūnitanaga Nangi na Seeba, mukūtūngīlījaga, nguno nghana nalī ng'wene.

¹⁴ Ali lūūlū, ū nene ūyo nalī Seeba na Nangi, ūmo nang'oogeja mhambala jing'we gīkī, na a bing'we shing'wigeleelilwe kūbiziyooja mhambala bing'we kū bing'we gīko.

¹⁵ Nguno nang'winha būlolelo, gīkī ūmo nang'wītīla, na a bing'we mubizīīta gīko.

¹⁶ Nalīmuwīla gwa nghana gīkī, ū nsese atī ntaale kūnkīla ū ise-būgonzo; nūūlū ū ntūng'wa atankīlile ū ntūmi wakwe.

¹⁷ Ūlū ng'wīdeeba ī yenīyī hūna ng'wīyīta, mukūbiza na mbango.

¹⁸ Alīyo natūmuhayaga pye a bose, nguno nabamanile abo nabasolile; kwike ū mu gīko shilīshikīlījiwa ī shandīkwa: ī gīkī, ‘Ūyo alīlya shilīwa shane waniigalūkaga!’

¹⁹ Nalīmuwīla ī haha kūko ītaalī kwilonga, ūlū īlilonge muzunye ī gīkī ū nene hū nalī Ng'wene.

²⁰ Zunyagi nalīmuwīla gwa nghana gīkī, ū wa kūng'wanukūla ūyo nantūmile nene, wananukūlaga nene, hama ūyo ūnanukūla nene, numho wang'wanukūlaga ūyo anitūmile ū nene.”

Kūbawīla ya kūlodeelwa kwakwe

²¹ Ū Yesu aho wamala kūhaya ī mihayo yenīyo, wandya kūkoya no-no-no ū mu moyo; nose ūhaya hape gīkī, “Nalīmuwīla gwa nghana, ūmò wing'we akūnilodeela!”

²² A bahemba bibakīla, bandya kwilola-lola boi kū boi, gīkī hīmba nani ūyo wanghayaga.

²³ Ūmò wabo, ūyo Yesu walī antogilwe, walī wigasha wihela nanghwe haho bbihī.

²⁴ Hūna ū Simoni Petelo ūnshinyela ū nghemba ng'wenūyo, ūng'wīla amūje ūyo wanghayaga.

²⁵ Ūngalūkīla ū Yesu; ūmūja gīkī, “Seeba, ni nani shi?”

²⁶ Ū Yesu ūhaya, “Ūyo nalakoje nhonge nang'winhe hū ng'wene.” Wahayūkoja nhonge ūng'winha Yuda ng'witūnja wa ng'wa Simoni Isikaliote!

²⁷ Ū munhū ng'wenūyo aho wīlya ī nhonge yenīyo, wingīlīīlwa na Shetani; nanghwe ū Yesu ūng'wīla, “Gwītage wangū ūyo ūlīgwīta!”

²⁸ Alīyo pye abo baalī bigasha batagwitegelegije ū mhayo ūyo wang'wīlaga.

²⁹ Bangī būyiganika gīkī hamo īkī ū Yuda wikalaga nago ū nfuko, ū Yesu wang'wīlaga gīkī, “Jaga ūkagūle ī shikolo īsho shitwigeleelilwe kūtūmamīla ha shigukulu, nūūlū kūbinha bahabī.”

³⁰ Hūna ū Yuda aho wīlya ī nhonge yenīyo ūfuma hanze haho na haho; nīyo yalī būjikū!

Shilagīlo shipya

³¹ Ū ng'wenūyo aho wafuma, ū Yesu wandya kūbawīla gīkī, “Ī haha ū Ng'wana wa Munhū alīgūngūhiwa, hūna ū mulī we akūjiwe ū Mulungu.

³² Ū Mulungu ūlū winhwa ikūjo ū mulī wei, nanghwe ū Mulungu akūnkūja ū Ng'wana mulī wei ng'wenekīlī, nīyo akūnkūja haho na haho.

³³ Bing'we baana, nataalī nalīho hamò ning'we kakanza kado, mukūnikooba. Alīyo gīt'ūmo naabawīlīlile Bayudaya gīkī, ‘Ūko najile a bing'we mutūdūla ū kwiza ko,’ na a bing'we h'ūmo nalīmuwīlīla ī haha!

³⁴ Nang'winha shilagīlo shipya: Itogagwi, nīyo ng'witogwe gīt'ūmo namutogelilwe ū nene.

³⁵ Ūlū ng'witogwa būlī ng'wene na biye, pye a banhū bakūmudeeba gīkī mulī bahemba bane.”

Petelo akūnema Yesu

³⁶ Hūna ū Simoni Petelo ūmūja gīkī, “Seeba ūjile halī?” Nanghwe ū Yesu ūnshokeja, “Ūko najile ūtūdūla ū kūnilondeela ī haha, alīyo ūkūnilondeela ha numa!”

³⁷ Ū Petelo ūng'wīla, “Nibūlī Seeba natūdūla ū kūkūlondeela ī haha? Ū nene nūūlū būpanga bone nakūbūfunya kūlwa nguno yako!”

³⁸ Nanghwe ū Yesu ūnshokeja, “Ū bebe ūkūfunya būpanga wako kūlwa nguno yane? Nalīkūwīla gwa nghana gīkī, ī nghungulume ītishokeela kūhīla, aho ū bebe ūtaalī kūnilema nghangala idatū!”