Yohana 12 - Sukuma New Testament 2000

Yesu kwitīīlwa maguta

¹ Hūna aho jasaaga shikū itandatū īshike ī pasaka, ū Yesu ūja Betania ūko walī ū Lazalo, ūyo Yesu walī wanjūūcha kūfuma mu bafu.

² Ūbeegejiwa shilīwa, ū Malita ūbiza ntoneeji wabo; nū Lazalo walī ūmò wa babo bakigasha kūlya nū Yesu.

³ Kūhayimanīla ū Malia wasola maguta ga mpango ntaale, ga būdito bo kūshika gītī nusu kilo. Ūng'witīīla ū Yesu kū mhambala jakwe, wandya kūjipyagūla na nzwīlī jakwe; pyī ī numba yokala ng'waso gwa maguta genayo.

⁴ Ūmò wa bahemba bakwe, Yuda Isikaliote; ūyo walī n'iganiko lya kūnodeela ū Yesu, ūhaya gīkī,

⁵ “Nibūlī a maguta genaya gatajinjiwe jigela denali magana adatū binhwa bahabī?”

⁶ Akahaya gīko ītī kūlwa kūbiganika bahabī, alīyo īkī walī ng'wibi; walī wamanīīla kwīnja īsho shatūūlagwa ū mu nfuko, nguno hū wei walī nanghani wago.

⁷ Nanghwe ū Yesu ūhaya gīkī, “Nekage īkī walī agabīkile kūlwa lūshikū lo kūjīkwa kwane.

⁸ Nguno a bahabī a bene mulī nabo pyī ī shikū, alīyo ū nene natūbiza ning'we gwa-gwa-gwa.”

Gwīnda ya kūmūlaga Lazalo

⁹ A Bayudaya aho badeeba gīkī ū Yesu walī henaho, biza hoi ibità itaale; kwike ītī kūlwa nguno ya ng'wa Yesu dūhū; alīyo kwiza kūmona nū Lazalo, ūyo walī wajūūchiwa na Yesu kūfuma mu bafu.

¹⁰ Hūna lūūlū kūlwa mhayo gwenūyo, a bagabīji bataale būlya gwīnda ya kūmūlaga nū Lazalo,

¹¹ nguno Bayudaya bingī abo bakaja koi, bakanzunya Yesu kūlwakwe.

Kwingīla mu Yelusalemu nyatemi

¹² Ū kū ntondo yaho ibità itaale lya banhū abo baalī biza kū shigukulu, bakigwa gīkī ū Yesu aliza Yelusalemu.

¹³ Būbūūcha matambī ga mitī ya nhende, būja kūnsūng'wanha kūnū balīhamuka būhaya gīkī, “Hosana; akumīlījiwe ūyo aliza mu lina lya ng'wa Seeba, hū ng'wene ū Ntemi wa Isilaeli.”

¹⁴ Ū Yesu ūpandīka mūūga ya nzobe, ūdamhīla wigasha gīt'ūmo gwandīkilwe gīkī,

¹⁵ “Bebe Sayuni ūtogohage, Managa gīkī, ū Ntemi wako aliza, adamhīlile ng'wana wa nzobe.”

¹⁶ A bahemba bakwe ū Yesu batayitegelegije wangū ī mihayo yenīyī; alīyo aho wagūngūhiwa, bakizūkwa gīkī yalī yandīkilwe kūlwa nguno yakwe, h'ī chene akīītīlwa pyī ī yose yenīyo.

¹⁷ Ī libità lya banhū abo baalī nanghwe aho alīng'witana Lazalo ūnjūūcha kūfuma mu bafu, bakaja balīnkumūcha.

¹⁸ H'ī nguno yene ibità itaale līkansūng'wanha, īkī baalī bigwa gīkī walī wabeeja shimanīkījo shilī gīko.

¹⁹ A henaho a Bafalisayo būyiwīla balīhaya, “Angū mulībona gīkī gūtīho ūyo tūlīīta; lolagi īkī pyī ī sī īlīnondeela wei dūhū!”

Bayunani kūkooba kūmona Yesu

²⁰ Baalīho Bayunani balebe, nabo baalī baja kūlamya ū ng'wikanza lya shigukulu.

²¹ Hūna lūūlū a banhū benabo būng'wegeela Filipo, ū muna Betisaida ya Galilaya: būnomba balīhaya gīkī, “Baba, tūlītogwa kūmona ū Yesu!”

²² Nanghwe ū Filipo ūja ūūkang'wīla Andelea; hūna būbīlī wabo gīko, ū Andelea nū Filipo, būūkang'wīla ū Yesu.

²³ Ū Yesu ūbashokeja alībawīla gīkī, “Lyashikaga ī likanza, ū Ng'wana wa Munhū agūngūhiwe.

²⁴ Nalīmuwīla gwa nghana gīkī ī mbīyū ya būsīga ūlū ītagwile ha sī īkacha, īkwikala iyene dūhū gīko; alīyo ūlū yūcha īkūtwaja matwajo mingī.

²⁵ Ū wa kūtogwa būpanga bokwe akūbūjimīīja; alīyo ū wa kūbūkolwa ū būpanga bokwe aho ataalī mu sī, akūbūlanghana kūshisha welelo na welelo.

²⁶ Ū wa kūnitūmamīla ni anilondeelage, nīyo aho nalī ū nene, nū ntūmami wane shing'wigelile abize henaho; ū wa kūnitūmamīla akūkūjiwa nū Baba!”

Ng'wana wa Munhū kūsungwa higūlya

²⁷ “Ī haha nalī na makoye mataale no ū mu ngholó yane, hīmba nahaye kī? Gīkī nipījage Baba nīnge ū ng'wikanza lyenīlī? Alīyo ningīlaga ū ng'wikanza lyenīlī kūlwa nguno ya mhayo gwenūyū.

²⁸ Baba, līkūjage ī Lina lyako!” A henaho liza ilaka kūfuma ng'wigūlū līlīhaya gīkī, “Na nghana nalīkūgije, na nakongeja ū kūlīkūja!”

²⁹ Bamò ū ng'wibità īlo lyalī lyīmīīla henaho aho bigwa būhaya, “Yahilima mbula;” bangī, “Wayombiwa na malaika!”

³⁰ Ū Yesu ūshosha ūhaya gīkī, “Ī lilaka lyenīlī lītilongile kūlwa nguno yane, alīyo kūlwa nguno ying'we.

³¹ Ī haha kwashikīīla ū kūlamulwa kwa sī; nīyo ī haha alīponyiwa hanze ū nsugi wa sī.

³² Hūna ū nene ūlū nalabūūchiwe a ha sī nanunjiwe higūlya, nakūbaduta pye a banhū kūlī nene.”

³³ Ū gwenūyū akagūhaya kūlwa koolecha mbika ya kachīle ako walī hihī kūcha.

³⁴ Nalyo ī libità lya banhū lyūnshokeja līlīhaya, “A bise tūmanile kūfuma mu shilagīlo gīkī, ū Kilisto alī wa kūshinga ho welelo bose. Hama nibūlī ū bebe ūlīhaya gīkī, ‘Ū Ng'wana wa Munhū shiigelile anunjiwe higūlya?’ Ū Ng'wana wa Munhū ng'wenūyū ni nani?”

³⁵ Ū Yesu ūbawīla gīkī, “Ī lisana mutaalī nalyo ikanza iguhī; ali lūūlū, igulambījagi ū kūshimīza aho mutaalī nalyo ī lisana, būtizūng'wilīla mukabiza mu giiti; nguno ūyo akūshimīzaga mu giiti atamanile ūko ajile.

³⁶ Līsanyagi ī lisana aho mutaalī nalyo, mubize baana b'isana.” Ū Yesu aho wamala ū kūhaya ī yenīyo ūbīngīla ūja ūūkibisa.

Būtūzunya wa Bayudaya

³⁷ Ū Yesu walī wabeeja shimanīkījo shingī no ū mubo, alīyo nahene baalī batanzunyaga.

³⁸ Gūbiza gwashikīīla ū mhayo ūyo gūhayiwe na nghangi Isaya; gīkī, “Seeba, nani ūyo ayīzunije ī mihayo yise? Nū nkono gwa ng'wa Seeba nani ūyo akundūlīlilwe?”

³⁹ Hū chene batazunije, nguno ū Isaya alīhaya na hangī gīkī,

⁴⁰ “Wababbokugije a miso gabo, nī ngholó jabo ūjitīndīhaja, gīkī batizūbona na miso, hangī batizitegeleja ū mu ngholó bakagalūka nabapīje.”

⁴¹ Ū Isaya akīhaya ī yenīyī nguno walī walīloleela ī likūjo lya ng'wa Kilisto; hūna lūūlū wanghayaga wei.

⁴² Alīyo ahene na a basugi bakakwīla abo bakanzunya, kwike baalī batakaanīlaga hape, kūlwa kūbogoha Bafalisayo, gīkī batizūfunyiwa ng'wisinagogi.

⁴³ Nguno baalī batogilwe ikūjo lya banhū kūtinda ikūjo lya ng'wa Mulungu.

Būlamulwa kūlwa mhayo go ng'wa Yesu

⁴⁴ Alīyo ū Yesu akahamuka ūhaya gīkī, “Ū wa kūnizunya atanizunije nene, alīyo ūyo anitūmile.

⁴⁵ Nū wa kūnibona nene wamonaga ūyo anitūmile.

⁴⁶ Ū nene nalī Isana, nizile ū mu sī gīkī ū wa kūnizunya atizongeja kwikala mu giiti.

⁴⁷ Ūyo ūyigwa ī mihayo yane alīyo ūleka ū kwīdima, ū nene natūnamula nguno natizile kūlamula ba mu sī, alīyo kūbapīja a ba mu sī.

⁴⁸ Ūyo ūnilema nī mihayo yane ūlema ū kwīyanukūla, alī nanghwe ū namuji wakwe. Ū mhayo ūyo nakūgūhayaga hū gwene gūkūnamula a ha lūshikū lo būkalīkījo.

⁴⁹ Nguno ū nene natihayīlaga yane ya ng'wenekīlī, alīyo ū Baba ūyo anitūmile, hū ng'wene akūnilagīlaga ī ya kūlūngalūnga nī ya kūhaya.

⁵⁰ Namanile gīkī ī shilagīlo shakwe shilī būpanga bo welelo na welelo; hūna lūūlū īyo akūniwīlaga ū Baba, nū nene h'īyo nakwīhayaga.”