Yakobo 3 - Sukuma New Testament 2000

Kwihīga kwa lūlīmi

¹ Bing'we badūgū bane, lekagi ū kūkwīla ū mu nīmo gwa būlangi, managi gīkī ū nsango gwise a balangi gūkūbiza ntaale kūtinda.

² Nguno pye a bose tūkipamaga mu mihayo ya mbika na mbika; ūlū alīho munhū atipamaga mu kayombele, ū ng'wenūyo nshikanu; hangī ashikile kūgūlanghana pyī ū mīlī gokwe.

³ Manīlagi dūhū a ha gīkī tūkatungaga mu nomo gwa falasa tūlijamu tūdoololo twa kūjilyehya gīkī jitūlyehele; na nghana ī falasa na būtaale wajo tūkajitongeelaga mu gīko.

⁴ Nūūlū hangī jiganikīlagi na meli, najo nhaale no; nīyo jikaselengetiagwa na miyaga mitaale. Alīyo jikagobagwa na kagobelo kadoololo, jatwalīīlwa ūko atogelilwe ū ngobi.

⁵ H'ūmo lūlī nū lūlīmi; ū loi lūlī kabudīka kado no, alīyo lūkihahambūlaga mihayo ya magaka mataale! Gwiganikīlagi hangī na moto, nago nūūlū gūkabiza ndo na ginehe, alīyo gūkabachaga mapoolu na mapoolu!

⁶ H'ūmo lūlī nū lūlīmi, nalo lūlī moto. Ū lūlīmi lwenūlo, ūlo tūtūūlīlilwe mu mīlī gwise, lokalile būkenaagūji. Lūkagūsosohajaga pyī ū mīlī, lwajikenaagūla ī nhūngwa pyī ī jose. Nose ū mīlī gwigeleelwa kūpemva mu moto ū gose, nū loi ū lūlīmi kūponyiwa mu nsango gwa moto!

⁷ Nguno shiinū na shiinū ū mu sī jikasugagwa na banhū, hangī jamala kūsugwa: jibize noni, nūūlū ja kwigwesa ha sī, nūūlū ja mu nyanza.

⁸ Alīyo ū lūlīmi lo banhū atīho ūyo adūgije kūlūsuga, lūlī shikolo shabūbi īsho shitalembeelaga, hangī lokalile būsūngū wa kwenheleja icha!

⁹ Tūkalūtūmamīlaga kūnkumīlīja Mulungu Sīswe, alīyo hangī hū loi lwike tūkalūtūmamīlaga na kūzuma banhū, abo babeejiwe mu suso ya ng'wa Mulungu!

¹⁰ Mu nomo gūmò gwenūyo dūhū īkafumaga mo mihayo ya kūkumīlīja na ya kūzuma! Badūgū bane, ī mihayo yenīyo ītigelile īje gīko!

¹¹ Angū, ū mu lwinzī ū lūmò gadūgije kūfuma mo minzī mapolo na malūlū?

¹² Badūgū bane, ū ntini gūdūgije kūtwaja mizeituni, nūūlū ū nzabibu kūtwaja matwajo ga ntini? H'ūmo īlī nū lwinzī, ū lo minzī masalazu lūtūdūla kūfunya minzī mapolo!

Masala ga kūfuma kūlī Mulungu

¹³ Ī gīsī ū mu bing'we nani ūyo alī na masala na witegeleja? Ū munhū ng'wenūyo ni oolechage a masala gakwe mu shītwa sha widohya ū mu kashimīzīle kakwe.

¹⁴ Alīyo ūlū mulī na wilu na wikolwa na wilwisha ū mu myoyo ying'we, yaya ū kwikumīlīja nūūlū kwībisa-bisa ī nghana!

¹⁵ A masala ayo galī gīko gatizile ū mu sī kūfuma kwigūlya, a genayo galī ga mu sī na kale; gafumile kūlī Shetani.

¹⁶ Nguno aho būlīho wilu na wilwisha, a henaho nū wiyugagūji būlīho, pyī nī yīngī ī ya sagala-sagala.

¹⁷ Alīyo a masala ayo gafumile kwigūlya, ī soolo ya mhayo galī meela na hangī ga mhola. Galī na wiyūmīlīja, galī na wigwi, gokalile shigongo na matwajo masoga; a goi gatī na būsolanhya, galī ga nghana.

¹⁸ Ī litwajo lya būtūngīlīja, īlo līkahambagwa na babeeja ba mhola, lyene mhola.