Shītwa 8 - Sukuma New Testament 2000

¹ Ū Saulo akayega no ū kūbona gīkī, obūlagwa nghana. Ū mu lūshikū lwenūlo ī kanisa ya Yelusalemu īkagwīlwa būluhiwa būtaale no, pye a bose būsambaala, būja ūko na ūko ū mu sī ya Būyudaya nī ya Samalia; būlekeelwa dūhū a batūng'wa.

Saulo nuhya wa kanisa

² Banhū ba logohano kūlī Mulungu būmūcha ū Stefano būkanjīka; bakaanīla hataale nīyo no!

³ Alīyo ū Saulo hū ūlinhya kwīkenaagūla ī kanisa, ūyūja akwingīlaga mu būlī kaya wabadutanja pye bagosha na bakīma, kūbatwala mu jeela!

Nghūlū Jawiza kū Basamalia

⁴ Hūna, abo bakasambaala, baja bakūgūlomeelaga ū Mhayo.

⁵ Ū Filipo ūtulumenha ajile, ūūkashika kū nzengo gwa Samalia, wandya kūbalomeela ya ng'wa Kilisto.

⁶ Mabità na mabità ga banhū gikuminga na moyo gūmò, kūdegeleka īyo wīhayaga ū Filipo. Aho bashibona ī shimanīkījo īsho wabeejaga būdīlīla kūtinda.

⁷ Nguno bingī abo baalī na masamva gūyūbafuma galīlīla n'ilaka itaale, hama bingī abo baalī na būsaatu wa kūūma būhaama nūūlū būlemehazu būyūpīla.

⁸ Nīyo būbiza būyegi būtaale no ū mu nzengo gwenūyo.

⁹ Walīmo na munhū nebe ū mu nzengo gwenūyo witanagwa Simoni, walī na maleeba ga nyalogi kūfuma kale; na lūūlū walī wabakamaaja pyī ū ng'wihanga lya Basamalia, kūlwa kwigīmba-gīmba gīkī ū wei hū walī magaatala!

¹⁰ Pye a banhū, bado na bataale, baalī bang'ogohile; nguno bahayaga gīkī, “Ū munhū ng'wenūyū hū ng'wene ūyo alī būdūla bo ng'wa mulungu, ūbo būkahayiagwa ‘Būdūla Būtaale!’ ”

¹¹ Na nghana baalī bang'ogohile no, nguno walī wabahehenaja ikanza ilīhu kūlwa maleeba gakwe ga nyalogi.

¹² Alīyo ū Filipo aho wabalomeela mhola ja būtemi bo ng'wa Mulungu na lina lya ng'wa Yesu Kilisto, bagosha na bakīma bakayūzunya babatīījiwa.

¹³ Nū wei ū Simoni ūzunya ūbatīījiwa, nīyo ūyikala adimanile nū Filipo; ūyūkumya no ū kūshibona ī shimanīkījo īsho shabeejiagwa mu būdūla būtaale, pyī nī yīngī ī ya kūkamaaja.

¹⁴ Aho bigwa a batūng'wa ī Yelusalemu gīkī nī Samalia yagwanukūlile ū Mhayo go ng'wa Mulungu, būbatūma ko ba Petelo na Yohana.

¹⁵ Bahayūshika ko būbalombela bang'wanukūle ū Moyo Ng'wela;

¹⁶ nguno walī ataalī kwikīīlwa nūūlū ūmò wabo, īkī baalī babatīījiwa mu lina lya ng'wa Seeba Yesu dūhū.

¹⁷ Hūna būbatūūlīla makono, būng'wanukūla ū Moyo Ng'wela.

¹⁸ Ū Simoni aho wabona bang'wanukūla Moyo Ng'wela mu nzīla ya kūtūūlīlwa makono ga batūng'wa, ūfunya hela gīkī abinhe.

¹⁹ Ūhaya, “Ninhagi nū nene ū būdūla wenūbū; nane būlī ng'wene ūyo nalantūūlīlage makono ayūng'wanukūla ū Moyo Ng'wela!”

²⁰ Alīyo ū Petelo ūnshokeja ūng'wīla, “Jīlīīlaga ūko na hela jako ūkache najo kwenūko; nguno gashinaga ū bebe ūliganika, ī shakwinha sha ng'wa Mulungu shikapandīkagwa bo hela.

²¹ Ū bebe ūtī na ngabo gete, hangī ūtī na fiilū nūūlū hado ū mu mhayo gwenūyū; nguno ū moyo gwako gūtatūngīlīgije ū kūlī Mulungu.

²² Ali lūūlū, galūkaga wīnge ū mu būbi wako wenūbū, ūnombe ū Seeba, ūlū yūdūlīkana akūlekeje a maganiko ayo galī mu ngholó yako.

²³ Nguno nalībona ūlī n'isubī lyabūbi no gītī ndūlū yokalile būsūngū, nīyo ūlī mu būtungwa bo mihayo ītī ya būtūngīlīja!”

²⁴ Nanghwe ū Simoni ūshosha ūhaya gīkī, “Nilombelagi a bing'we ū kūlī Seeba, gūtizūnigwīla nūūlū gūmò ū mu yenīyo ng'wīhaya!”

²⁵ Bahayūmala kūfunya ū būkaanīji na kūgūlomeela ū mhayo go ng'wa Seeba, būshoka Yelusalemu, būja bakūlomeelaga mu magūngūli mingī ga Basamalia.

Filipo na muna Esiopia

²⁶ Alīyo ū Filipo ūwīlwa na malaika o ng'wa Seeba gīkī, “Būūkaga ūje dakama; ūbītīle ī nzīla ya ng'witogolo ī likalamuku, īyo ītulumenhile kūfuma Yelusalemu kūja Gaza.”

²⁷ Nghana ūbūūka ūja; walīho ngosha asoloolilwe, muna Esiopia, nanghani wa sabo jose ja ng'wa Kantake, ntemi nkīma wa sī ya Esiopia; ū munhū ng'wenūyo walī waja Yelusalemu kūjūlamya.

²⁸ Ī likanza lyenīlo akasangwa alīshoka kaya, igashije ng'wigogoteni lyakwe akūsomaga mu shitabo sha nghangi Isaya.

²⁹ Hūna ū Moyo ūng'wīla ū Filipo gīkī, “Egeelaga ho ūje hamò nalyo ī ligogoteni lyenīlo.”

³⁰ Ū Filipo ūpeela ajile ho, ūng'wigwa alīsoma mu shitabo sha nghangi Isaya; ūmūja gīkī, “Ūlīyitegeleja īyo ūlīyīsoma yenīyo?”

³¹ Nanghwe ūhaya, “Nadūgije ginehe ū kwīyitegeleja ūlū munhū atanilangile?” Ūng'wikūmbīlīja ū Filipo ūlinha mo wigasha hamò nanghwe.

³² Ī libudīka lya shandīkwa īlo wasomaga lyalī īlī; “Akatwalwa gītī ngholo ya kūsīnzwa, nūwe atafunije nūūlū ilaka lyakwe, walī sele gītī ngholo kūlī munhū akwībbutīlaga booya.

³³ Kūlwa kūdalahwa atalamulilwe mu būtūngīlīja; nani ūyo adūgije kwīsomboola ī mihayo ya shibyalīlwe shakwe? Nguno ū būpanga bokwe būkīnjiwa ū mu sī!”

³⁴ Ū nsoloolwa ng'wenūyo ūng'wīla ū Filipo gīkī, “Nalīkwikūmbīlīja ūniwīle, ū nghangi alīhaya mihayo ya ng'wa nani? Alihaya wei ng'wenekīlī, nūūlū alīnghaya munhū ūngī?”

³⁵ Ū Filipo wandīja h'ipandī lyenīlo ū mu shandīkwa, ūnomeela ya ng'wa Yesu.

³⁶ Aho bajile ū mu nzīla, bahayimanīla bashika h'ipandī galīho minzī; ū nsoloolwa ūhaya gīkī, “Gaya minzī aha, ī gīsī kī ī sha kūnilemeja natizūbatīījiwa?” [

³⁷ Nanghwe ū Filipo ūng'wīla, “Ūlū ūlīzunya na moyo gwako gose īdūlīkanile.” Ū nsoloolwa ūshosha ūhaya, “Nazunyaga gīkī ū Yesu Kilisto alī Ng'wana o ng'wa Mulungu.”]

³⁸ Hūna ūlagīla lyīmīchiwa ī ligogoteni; ū Filipo nū nsoloolwa bika būbīlī wabo, būja ū mu minzī ūūkamatīīja.

³⁹ Aho balīfuma ū mu minzī, Moyo wa ng'wa Seeba ūnghwehula ū Filipo; ū nsoloolwa atamonile hangī, alīyo aho alī mu nzīla waja okalaga būyegi.

⁴⁰ Ū Filipo akīīta ūbonelwa Azota, wajaga akūlomeelaga hose-hose ū mu mizengo, nose ūūkashika Kaisalia.