Shītwa 6 - Sukuma New Testament 2000

Kūsolwa bagunaani mpungatī

¹ Ū mu shikū jenījo aho bakwīla a bahemba, būkilonga būdugumi. A Bayudaya ba Shiyunani būyūbadugumīla a Bayudaya ba Shihebulania, nguno a bachīlwa babo bakayūbītīīlwa ū kūgunaanwa ū mu mihayo ya būlī lūshikū.

² Hūna lūūlū ab'ikūmi na babīlī būbitana pye a bahemba būhaya gīkī, “Ītī yawiza a bise tūgūleke ū nīmo gwa kūgūlanga ū mhayo go ng'wa Mulungu, tūyūlonja mihayo ya shilīwa.

³ A bing'we badūgū solanhyagi banhū mpungatī ū mu bing'we, tūbatūūle a ha nīmo gwenūyū. Babize bakūkaanīlagwa gīkī bokajiwe na Moyo, hangī balī na witegeleja.

⁴ Lelo a bise bene tūkomeeje ū kūgwīta ū nīmo gwa kūlomba na kūgūlomeela ū mhayo.”

⁵ Ī liganiko lyenīlo lyūbayeja pye a badūgū; būnsola Stefano, munhū wa kūzunya na okalile Moyo Ng'wela, na Filipo na Pilokolo na Nikanola na Timona na Palimena na Nikolao, nghembekwa wa Antiokia.

⁶ A banhū benabo būbenha ū kū batūng'wa, būbalombela na kūbatūūlīla makono.

⁷ Ha numa ya henaho, ū mhayo go ng'wa Mulungu gongeja ū kūja gūkūsambaalaga; nī lisaabu lya bahemba ū mu Yelusalemu lyongeja ū kūkūla, na bagabīji bingī būyūgwanukūla ū kūzunya kwenūkū.

Kūding'wa kwa ng'wa Stefano

⁸ Hūna ū Stefano kūlwa kokajiwa nguzu na būdūla, ūyūbeeja mihayo ya kūkumya na shimanīkījo shitaale ū mu banhū.

⁹ Kwimanīla bigela banhū balebe ba ng'wisinagogi litanagwa lya Wiyabī, na bana Kilene na Isikandelia, na bana Kilikia, na bana Asia; būyūng'wihalalīja ū Stefano.

¹⁰ Kwike batawīmīlile ū witegeleja bo kasomboolele kakwe, nū Moyo ūyo walī mulī we.

¹¹ Banoga nose būkobya banhū būbahana; bahaye gīkī, “Ū ng'wenūyū twang'wigwile alīnsondagūla ū Musa nū Mulungu!”

¹² Būbabipya a masala a banhū na a banamhala, pye na a balangi ba shilagīlo; biza būndima ū Stefano būntwala kwibanza.

¹³ Būtūūla bakaanīji balomolomo; būhaya gīkī, “Ū munhū ng'wenūyū alemile gete ū koya ū kūlīsondagūla ī lipandī lyeela īlī, nī shilagīlo.

¹⁴ Nguno twang'wigwile alīhaya na gīkī, angū ū Yesu wa Nazaleti ng'wenūyū akūlīkenaagūla ī lipandī lyenīlī, ajigalūche nī nhūngwa ījo twalekelwa na Musa!”

¹⁵ Pye abo baalī bigashije ū ng'wibanza aho banola ū Stefano, būbūbona ū būshū bokwe bobizaga gītī bo ng'wa malaika.