Shītwa 5 - Sukuma New Testament 2000

Anania na nke Safila

¹ Alīyo walīho munhū nebe, lina lyakwe Anania na nke okwe Safila; ū ng'wene ohayūjinja ū ngūnda gokwe,

² ūlekeela ibudīka lya sabo īyo akapandīka, gīkī inonghe wei ng'wenekīlī, nū nke ūbiza amanile! Ī libudīka īlo līkasaaga ūlīsola ūlītwala kū batūng'wa.

³ Alīyo ū Petelo ūng'wīla gīkī, “Bebe Anania, nibūlī ū Shetani okalaga ū mu ngholó yako, nose wabisaga ibudīka lya sabo īyo wapandīkile ū mu mpango gwa ngūnda, gīkī ūnembe ū Moyo Ng'wela?

⁴ Ī sabo yenīyo, aho yalī mu nkono gwako yalī ītī yako? Na a haho wījinja yalī ītī mu būdūla wako? Nibūlī wabisaga mhayo gūlī gīko ū mu ngholó yako? Ūtalembile banhū, wanembaga Mulungu!”

⁵ Ū Anania aho wigwa ī mihayo yenīyo ūgwa, ūcha! Abo bakigwa bakagwīlwa booba būtaale no.

⁶ Basūmba būbūūka būngolanya, būnfunya hanze, būūkanjīka.

⁷ Aho lyabīta ikanza lya sa gītī idatū, wiza nū nke, nanghwe wingīla; kwike ūsangwa ataalī ū kwīmana īyo yagwaga.

⁸ Ū Petelo ūng'wīla nanghwe gīkī, “Bebe aliniwīlage, ī sabo yenīyī, h'īyo ng'wapandīkile aho ng'wagūjinja ū ngūnda?” Nū ng'wene ūhaya, “Alichene, h'ī yene!”

⁹ Ū Petelo ūng'wīla, “Alīyo nibūlī ng'walomanaga kūngema ū Moyo wa ng'wa Seeba? Managa gīkī a ha nyango henaho, galīho magūlū ga banhū bajaga kūnjīka ū ngoshi wako, nū bebe bakūkūbūūcha!”

¹⁰ Nanghwe ī likanza lyenīlo ūgwa ha sī ū kū magūlū ga ng'wa Petelo, ūcha! Bahayingīla a basūmba būnsanga waacha; būmūcha nanghwe būūkanjīka, būng'wiheja nū ngoshi wakwe.

¹¹ Ī kanisa ī yose yūgwīlwa booba būtaale, pye na a bangī abo bakayigwa ī yenīyī!

Shimanīkījo na sha kūkumya

¹² A batūng'wa bakayūbeeja na makono gabo shimanīkījo na mihayo mingī ya kūkumya ū mu banhū; a bose bibilingaga na moyo gūmò ng'wibīndo lya ng'wa Solomoni.

¹³ Alīyo ū mu bangī walī atīho nūūlū ūmò wa kūgima kwisangīja nabo; kwike ahene a banhū babakumīlījaga.

¹⁴ Hama a bazunya bakongeja ū kūkwīla; nguno mabità ga bagosha na bakīma gakayūngalūkīla Seeba.

¹⁵ Nose a banhū būyūbenha na basaatu bababūūkije ha būlīīlī nūūlū ha shilago, biza babatūūla hihī na nzīla, gīkī ūlū alībīta ū Petelo gūyūbakuumya bamò babo nūūlū nengeeji gokwe dūhū.

¹⁶ Bangī būyūfuma na kū mizengo yīngī, īyo yalī hihī-hihī na Yelusalemu, balībenha bababūūkije a basaatu na a babo bakoyiagwa masamva; pye bapīlaga.

Kūluhiwa kwa batūng'wa

¹⁷ Hūna ū ngabīji ntaale ūbūūka osaayaga kīngī nasho, hamò na a b'igele lya Basadukayo abo baalī nanghwe.

¹⁸ Būshika būbadima bo hape-hape a batūng'wa, būja būūkabasoosela mu jeela.

¹⁹ Alīyo ī būjikū wiza malaika o ng'wa Seeba, ūgūlugūla ū nyango gwa ha jeela. Ūbatongeela abafunije kūja hanze, hūna ūbawīla gīkī,

²⁰ “Jagi ū mu hekalu mukabalomeele a banhū pyī ī mihayo ya būpanga wenūbū.”

²¹ Aho bigwa gīko nghana būbūūka dilū makīngo, būja ū mu hekalu būūkandya kūlanga. Ū ngabīji ntaale aho wiza na a babo baalī nanghwe, būlībilinga ī libanza, na a basugi ba Baisilaeli a bose būbiza ho; hūna būtūmīja ū kū jeela gīkī bakenhwe a batūng'wa.

²² Alīyo a bashilikale aho bashika ko batabasangile ū mu jeela, būshoka biza būjifunya ī mhola.

²³ Būhaya gīkī, “Ī jeela twīsanga īlugalile chiza no, na a balanghani bīmīīlaga a ha milyango, kwike twahayūlugūla tūtasangile mo munhū ū mu gatī!”

²⁴ Ū ntaale wa balanghani ba hekalu na a bagabīji bataale aho bagwigwa ū mhayo gwenūyo būzwangana, būyiganika gīkī hīmba bakūbiza bagwīlagwa mhayo kī!

²⁵ Wiza munhū nebe ūbawīla gīkī, “Alibalolagi abo ng'walī ng'wabatūūlile mu jeela, babo balī mu hekalu bīmīīlaga balībalanga banhū!”

²⁶ Hūna ūja ū ntaale wa bashilikale na balanghani ba hekalu, būūkabenha; kwike ītī bo nguzu, nguno bakogoha gīkī a banhū bakūbaponda mawe.

²⁷ Aho babenha, būshikīla kūbīmīlīja ū ng'wibanza. Hūna ū ntaale wa bagabīji ūbabūja

²⁸ alīhaya gīkī, “Bing'we, tūtamulemegije tūmuwīla gīkī yaya ū kūlanga hangī ū mu lina lyenīlo? Hama īkī hū mulībona lūūlū gīkī ī haha pyī ī Yelusalemu ng'wīyokajaga mamihayo ging'we ayo mukūlangaga, nose a mininga gakwe ū munhū ng'wenūyo mulīhaya kūtūbilīja bise!”

²⁹ Hūna ū Petelo na a batūng'wa biye būshosha gīkī, “A bise ītwigeleelilwe tūng'wigwe Mulungu kūtinda banhū.

³⁰ Ū Mulungu wa bakūlūgenji bise wanjūūkije ū Yesu ūyo mukamūlaga bo kūnungeleja ha līntī.

³¹ Ū Mulungu wangūngūhije ū Munhū ng'wenūyo, ī haha alī kū būlyo wakwe, Ntemi na Mpīja kūlwa kūbinha a Baisilaeli būdūla bo kūgalūka na kūlekejiwa shibi shabo.

³² A bise tūlī bakaanīji bayo ī mihayo yenīyī, nū Moyo Ng'wela ūyo Mulungu akūbinhaga būlī bene abo būng'wigwa.”

³³ Aho bigwa gīko, būching'wa ū mu ngholó jabo, būbona gīkī bababūlage.

³⁴ Alīyo ū ng'wibanza ng'wenūmo walīmo Nfalisayo nebe, nangi wa shilagīlo, lina lyakwe Gamalieli. Ū munhū ng'wenūyo baalī bankūgije pye a banhū. Hūna wīmīīla ūlagīla bafunyiwe hanze a banhū benabo kakanza kado.

³⁵ Ūlīwīla ī libanza gīkī, “Bing'we bababa Baisilaeli, ilanghanagi ūmo mulīhaya kūbīītīla a banhū benaba.

³⁶ Nguno aho jitaalī ū kūshika ī shikū jenīji, akilonga munhū nebe; Teuda, ūyūja akwigīmba-gīmbaga gīkī shadiima. Na nghana akapandīka bahemba: bagosha ba kūshika gītī magana anè; alīyo akabūlagwa, na a bahemba bakwe pye a bose būsalanghana, gūgaya nū yūyo wagwītaga.

³⁷ Aho wabīta ū ng'wenūyo, wigela hangī ūngī ū mu shikū ja banhū kwandīkwa; walī Yuda muna Galilaya. Nanghwe ūduta banhū, alīyo nū ng'wene akayagala, abo baalī bang'wigwile būsalanghana pye a bose.

³⁸ Nose ū nene nalīmuwīla ī haha gīkī, lekanagi nabo gete a banhū benaba, ng'ooye ū kwikala mukūbakūūbīlījaga. Nguno ī liganiko lyenīlī nūūlū ū nīmo gwenūyū ūlū gūbize gūfumile kū banhū gūkūcha dūhū.

³⁹ Alīyo ūlū gūfumile kūlī Mulungu, mutūdūla ū kūgūkenaagūla na hado yaya; ilanghanagi mutizūbiza mukwilwishaga na Mulungu!” Nghana būng'wigwa.

⁴⁰ Hūna būbitana a batūng'wa, būbatūla mbooko; hama būbalemeja ū kūlīhaya ī lina lya ng'wa Yesu, būbalekela būja.

⁴¹ A batūng'wa bīnga ū ng'wibanza bayegaga no, nguno bakabona bisaabagwa gīkī bigeleelilwe kūgoolwa kūlwa lina lya ng'wa Yesu.

⁴² Bakongeja kūyūja būlī lūshikū ū mu hekalu kūlanga, hama batooyile nū kūja hose-hose ū mu kaya ja banhū bakūlomeelaga ya ng'wa Kilisto Yesu.