Shītwa 4 - Sukuma New Testament 2000

Kūding'wa kwa ba Petelo na Yohana

¹ A ba Petelo nū Yohana aho bataalī būbalomeela a banhū, kūhayimanīla babasanga ho bagabīji na Basadukayo, hamò na ntaale wa balanghani ba hekalu.

² Baalī bapembeka na būpelanu kībi no, nguno babalangaga a banhū na kūbalomeela mhola ja būjūūko bo bafu, mu lina lya ng'wa Yesu.

³ Aho bashika būbadima; kwike īkī yalī mhīndī būūkabalugalīla gīkī balanghanwe kūshisha ntondo yaho.

⁴ Alīyo abo bakagwigwa ū mhayo gwabo bakazunya, ī lisaabu lya bagosha lyūshika gītī shihūmbī shitanò.

⁵ Aho wela ī ntondo yaho ī dilū, a basugi na a banamhala na a balangi ba shilagīlo bibilinga ū mu Yelusalemu.

⁶ (Ū ntaale wa bagabīji, ū Anasi, walīho; nū Kayafa, na Yohana na Isikanda; pye a ba lūganda lwa ntaale wa bagabīji).

⁷ Aho babenha būbīmīlīja, hūna būbabūja gīkī, “Ū mhayo gwenūyo mukagwīta mu būdūla kī, na mu lina kī?”

⁸ Ū Petelo ūbashokeja kūnū okajiagwa na Moyo Ng'wela; ūbawīla gīkī, “Bing'we basugi ba banhū, na a bing'we banamhala,

⁹ ī lelo yenīyī ūlū tūlīgīsīlījiwa kūlwa nguno ya mhayo gwawiza ūyo wītīlilwe ū munhū ūyo walī nemehazu, gīkī wapījiwe ginehe;

¹⁰ a bing'we pye a bose managi, na a Baisilaeli a bose bamane, gīkī ū munhū ūyo īmīīlile kū būtongi wing'we ng'wenūyū, alī mpanga wa gīlī-gīlī mu lina lya ng'wa Yesu Kilisto wa Nazaleti, ūyo mukankoma ha nsalaba; alīyo ū Mulungu wanjūūkije kūfuma mu bafu.

¹¹ Hūna ng'wene ūyo alī Iwe īlo mukalīdalaha a bing'we bazengi, īlo lyabizile lya kwīgoloolela ī numba.

¹² Nīyo būtīho būpīji mulī munhū ūngī ose-ose, nguno ndūhū lina līngī hangī pye a hose a ha sīlīlī y'igūlū īlo binhwa a banhū, gīkī shitwigeleelilwe kūpījiwa mulyo.”

¹³ Aho babūbona ū būgimu bo ng'wa Petelo nū Yohana, būdeeba nī gīkī baalī banhū batalangilwe, bakakumya no; alīyo būbitegeleja gīkī bikalaga hamò na Yesu.

¹⁴ Bakagayiwa ū gwa kūhaya, nguno bamonaga nū munhū ūyo walī wapījiwa, īmīīlile hamò nabo a ba Petelo nū Yohana.

¹⁵ Hūna būbalagīla kūfuma hanze, bīnga ū ng'wibanza; a boi būgūhoyela ū mhayo gwenūyo bū maasaga.

¹⁶ Būhaya gīkī, “Ī gete tūbīīte ginehe a banhū benaba? Nguno pye a bana Yelusalemu bamanile hape gīkī baabeegije shimanīkījo shitaale, īsho tūtadūgije kūshijimangūcha?

¹⁷ Ī gete tūbalemejagi ū kūyomba na munhū ose-ose ū mu lina lyenīlī, ū mhayo gwenūyū gūtizongeja kūsambaala mu banhū bose.”

¹⁸ Hūna būbitana būbalemeja batizūlīhaya nūūlū hado ī lina lya ng'wa Yesu, nūūlū ni kūlanga dūhū ū mu lina lyenīlo yaya!

¹⁹ Nabo a ba Petelo nū Yohana būbashokeja būhaya gīkī, “Lamulagi bing'we benekīlī, ūlū gūtūngīlīgije ū kūlī Mulungu ū gwa kūng'wigwa bing'we kūtinda kūng'wigwa Mulungu.

²⁰ Nguno a bise dūtūdūla ū kūleka ū kwīsomboola īyo twamalile kwībona na kwīyigwa.”

²¹ Bongeja kūbakanga, hūna būbalekela būja, alīyo batabonile nzīla ya kūbinha nsango, kūlwa nguno ya banhū, īkī pye a bose bankumīlījaga Mulungu kūlwa mhayo ūyo gwalī gwilonga gwenūyo.

²² Nguno ū munhū ūyo walī wītīlwa ī shimanīkījo shenīsho walī ntaale, wa myaka īkīlile ha makūmi anè.

Kūlomba kūguzuhiwa

²³ Aho balekelwa būja ū kū bichabo, būūkabawīla īyo bakawīlwa na a bagabīji bataale na a banamhala.

²⁴ Aho bigwa, pye a bose būmūūkīja Mulungu a malaka gabo būhaya gīkī, “Seeba, hū bebe ūlī nseemi walyo ī ligūlū nī sī, pye na a manyanza, nī shose īsho shilīmo.

²⁵ Bebe ng'wenekīlī ūkalūngalūnga mu nguzu ja ng'wa Moyo Ng'wela kūbītīla mu nomo go ng'wa sīswe Daūdi, ū ntūmami wako; ūkahaya gīkī, ‘Nibūlī a mahanga gakūpelanaga, na a banhū bakūlyaga gwīnda ya dalali?

²⁶ A batemi ba mu sī bakūlomanaga; na a basugi bakwibilingaga mabanza mabanza gīkī bilwishe nū Seeba, hamò nū Kilisto wakwe!’

²⁷ “Nguno nghana ū Helode nū Pontio Pilato, na a Baisilaeli, bakikuminga ū mu nzengo ūyū, hamò na banhū ba mahanga, būnīīla gwīnda ū Ntūmami wako ng'wela, ū Yesu, ū Milwa-maguta.

²⁸ Būng'wītīla īyo bebe ng'wenekīlī wīhelile na nkono gwako kūfuma kale gīkī īkūbiza ho.

²⁹ Ali lūūlū Seeba, galolage a makango gabo ī haha, a batūmami bako ūbinhe būgimu wa kūgūsomboola ū mhayo gwako.

³⁰ Gūgoloolage ū nkono gwako kūlwa kūpīja, na koolecha shimanīkījo; mihayo ya kūkumya ībeejiwe mu lina lya ng'wa Yesu, ū Ntūmami wako ng'wela.”

³¹ Aho balomba gīko, ī lipandī lyenīlo aho baalī lyūtinginyiwa, pye a bose bokajiwa na Moyo Ng'wela. Būgūlomeela mu būgimu ū mhayo go ng'wa Mulungu.

Būsangī mu shikolo shose

³² Ū ng'wibità lya bazunya, pye a bose baalī na ngholó īmò, na moyo gūmò; walī atīho nūūlū ūmò wabo wa kūhaya gīkī ī sabo īyo walī nayo yalī yakwe ya ng'wenekīlī. Alīyo pyī ī shikolo shalī sha būsangī.

³³ A batūng'wa baalī na nīmo ntaale gwa kūbūkaanīla ū būjūūko bo ng'wa Seeba Yesu. Pye a bose baalī ha sīlīlī ya mbango ja ng'wa Seeba.

³⁴ Walī atīho nūūlū ūmò wabo ūyo wakoyiagwa makoye ga būgayiwa, nguno abo baalī na numba nūūlū migūnda bakayūjinja bajenha ī sabo ījo bapandīkaga,

³⁵ biza bajitūūla kū būtongi wa batūng'wa jagabanhyiwa; būlī ng'wene wapandīka kūlenganīla na makoye gakwe.

³⁶ Walīho munhū ūmò lina lyakwe Yosefu; wa lūganda lo Balawī, muna Kupulo. A batūng'wa baalī bang'wilīka lina lya Balinaba, makūlū gaho nūngūja wa banhū.

³⁷ Ū munhū ng'wenūyo walī na ngūnda, ūgūjinja; īsho akapandīka pyī ī shose ūshenha, wiza ūshitūūla kū būtongi wa batūng'wa.