Shītwa 28 - Sukuma New Testament 2000

Ng'wijinga lya Melita

¹ Aho twapīla tūmana gīkī ī lijinga lyenīlo litanagwa Melita.

² A benekīlī sī būtoolekeja shigongo shitaale no shikīlanīgije; būbacha moto, hūna būtwegeleja pye a bose koota. Nguno twadetemaga no kūlwa mbeho, nīyo na mbula yatūlaga.

³ Ū Paulo ūkuminga-kuminga matambī ga mantī, wiza ūgatūūla mu moto; gashinaga yalīmo nghoboko, yahayūsebelwa yūpuluka mo, yikonzeela a ha nkono gokwe.

⁴ A banhū ba mu sī yenīyo aho balībona ī līshiinū lyenīlo lyanungeelaga a ha nkono, biwīla gīkī; “Ū munhū ng'wenūyū ī gete mūlagi, nguno nūūlū īkī wapūlūgūka ū kūchīla ū mu nyanza, alīyo nahene ū būtūngīlīja būtūnzunīlījaga ū kwikala mpanga!”

⁵ Kwike ū wei ūlīsaasamulīla mu moto dūhū ī līshiinū lyenīlo, lītang'wītile kabi kose-kose.

⁶ Alīyo nahene a bene bakamana dūhū gīkī, ikanza lyose-lyose akūbimbagana, nūūlū akūhayimanīla wagwa ha sī ache haho na haho. Kwike aho baloleela sele-sele nose lyūkūla ikanza gūtang'wilongelile mhayo gose-gose gwabūbi, būgalūcha a maganiko, bandya kūnghaya gīkī mulungu.

⁷ Aho tūkashikīla, ī sī īyo yalī hihī-hihī henaho gaalī matongo ga ng'wa Pupilio, ūyo walī nsugi wa ng'wijinga lyenīlo. Ū munhū ng'wenūyo akatwanukūla na wiza-ngholó būtaale, ūtūchumbeela ha ng'wakwe ikanza lya shikū idatū.

⁸ Ū ise wa ng'wa Pupilio walī alaalile; wakoyiagwa nswiza na nzoka ja kūpanza mininga. Ū Paulo wingīla kūjūnombela, ūntūūlīla na makono ūpīla.

⁹ Ū mhayo gwenūyo aho gwaja gīko, na a bangī abo baalī basaatu ū ng'wijinga lyenīlo biza pye; nabo būpījiwa.

¹⁰ Būtwinha manongho mingī no kūlwa kūtūkūja; aho lyashika ī likanza lise lya kūbuga nyanza, būtūtungīlīja shikolo sha kūtūgunaana.

Kūshikīīla Lumi

¹¹ Ū ng'wijinga lyenīlo tūkashinga mo myeji īdatū, hū twingīla mu meli ya Isikandelia, yalī yakola ng'wenūmo pyī ī likanza lya mbeho ya mu shiyaga. Ī meli yenīyo yalī na lūmengho lwa bamulungu b'ibasa, Kastoli na Poluki.

¹² Tūkaja tūūkashika Silakusa tūkola, twikala ho shikū idatū.

¹³ Aho twīnga a henaho tūja tūūkashika Legio. Ha numa ya lūshikū lūmò gūhemba nyaga gwa kūfuma dakama; ha lūshikū lo kabīlī lwaho tūshikīīla Poteoli.

¹⁴ A henaho tūsanga hoi badūgū būtwikūmbīlīja twikala nabo shikū mpungatī, hūna tūja ī Lumi.

¹⁵ A badūgū ba kwene baalī bamala kūjiigwa ī mhola jise; hūna lūūlū būtūsūng'wanha, būshika Apiofolo na Nghambī Idatū, h'ūko tūmanhīja nabo. Ū Paulo aho wababona akanūmba Mulungu, ūguzuhiwa ū mu moyo.

¹⁶ Aho twashika ī Lumi, ū Paulo akazunīlījiwa kwikala iyene na nshilikale wa kūyūnanghana.

Būlomeeji bo ng'wa Paulo mu Lumi

¹⁷ Ha numa ya shikū idatū, ūbitana bamò ba batongeeji ba Bayudaya. Aho bikuminga ūbawīla gīkī, “Bababa badūgū bane, ū nene natabahūbile mhayo gose-gose a banhū, hama natīītile nūūlū mhayo gwa kūgomela shīmīle sha bakūlūgenji bise. Nakadimīlwa Yelusalemu nūtungwa, hūna nūtūūlwa mu makono ga Balumi.

¹⁸ Alīyo aho banibūgīlīja būbona ībeelelile kūnilekela dūhū, nguno gwalī gūtīho mhayo gwa kūnenheleja kūbūlagwa.

¹⁹ Kwike a Bayudaya aho babūlema ū būlamuji wenūbo, nūbiza gītī nahadīkījiwa kūlomba kūshika kū būtongi bo ng'wa Kaisali; nūūlū īkī natī na mhayo gwa kūbabūūla a banhū b'ihanga lyane.

²⁰ H'ī nguno yene nabona nang'witane namusomboolele, gīkī ū nyololo gwenūyū natungilwe kūlwa kwisagīlwa kwa Baisilaeli.”

²¹ Nabo būng'wīla gīkī, “A bise tūtaalī kwanukūla nyalūba yose-yose kūfuma kū Bayudaya kūtūsomboolela nghūlū jako; na ataalī kwigela nūūlū ūmò wa badūgū gīkī ize kūtūwīla, nūūlū kūhoya nise mihayo yabūbi wako.

²² Tūlībona yabeelela ū kūkwigwa ū bebe ng'wenekīlī īyo ūkwīyiganikaga; nguno ī chene a bise ūyo tūgūmanile gūlī gīkī, a kazunīje kenako kakūjaga kūdalahījiwa būlī kwene.”

²³ Hūna būlagana nanghwe gīkī bakwiza lūshikū lūngī aho wikalaga. Bahayiza lelo būbiza bingī kūtinda, nanghwe ūbonzoolela chiza, kwandīja dilū, nose lyūloka akūbakaanīlaga ya būtemi bo ng'wa Mulungu; na kūgema no-no-no kūbagunaana kūfuma mu shilagīlo sha ng'wa Musa na mu bahangi, gīkī bang'witegeleje ū Yesu.

²⁴ Bangī bīloleela īyo wīhayaga būzunya;

²⁵ alīyo bangī batazunije. Na lūūlū bīnga ho bikīla-kīlaga. Ū Paulo ūbawīla mhayo gūmò; gīkī, “Ū Moyo Ng'wela akatūngīlīja ū kūbawīla a bakūlūgenji bing'we kūbītīla mulī nghangi Isaya.

²⁶ Ūmo akahayīla gīkī, ‘Jaga ū kū banhū benaba ūkabawīle gīkī, ū kūdegeleka mukūdegeleka alīyo mutitegeleja, nū kūlola mukūlola alīyo mutūbona.

²⁷ Nguno a banhū benaba ī ngholó jabo ndito, na a matū ayo bakūdegelekelaga madito, na a miso gabo bagalilimije. Batūdūla nūūlū hado ū kūbona na miso gabo, nūūlū ū kwigwa na matū gabo batūdūla; pyī nū kwitegeleja ū mu ngholó jabo, gīkī bagalūke nabapīje.’

²⁸ Ali lūūlū, managi gīkī ū būpīji bo ng'wa Mulungu wenūbū, būlītwalwa kū banhū ba mahanga, abo bakūwanukūla.”

²⁹ Aho wamala kūhaya gīko bīnga a Bayudaya; būja balihalalīja boi bike hataale no.

³⁰ Ū wei akashinga myaka ībīlī migima alī mu numba yakwe ya kwipangisīja ng'wenekīlī; wabanukūlaga pye abo bizaga kūmona.

³¹ Hama ī nghūlū ja būtemi bo ng'wa Mulungu wajilomeelaga mu kwisandaala kose, nīyo walī atalemejiagwa nū kūlanga ī mihayo ya ng'wa Seeba Yesu Kilisto.