Shītwa 27 - Sukuma New Testament 2000

Paulo kūtwalwa Lumi

¹ Hūna aho gwalamulwa gīkī tūbuge nyanza kūja Italia, ū Paulo hamò na batungwa bangī būtūūlwa mu nkono gwa ntaale wa bashilikale igana, wa nghambī ya Augusto; lina lyakwe Juliasi.

² Twingīla mu meli ya Adilamuteo, yalī īhelilwe kūja īlīsīngīja īkwīmaga mu myalo ya Asia. Hūna tūbūūka tūjile; Alistako ū muna Tesalonike ya Makedonia wiza hamò nise.

³ Ha ntondo yaho tūshika Sidoni, ū Juliasi ūng'wītīla shigongo ū Paulo, ūnzunīlīja aje kū banwani biye kūjūgunaanwa.

⁴ Aho twīnga a henaho, tūlinhya itanga tūja tūkūsīngījaga hihī-hihī na Kupulo, nguno ū nyaga gwatūfumīīlaga kū būtongi.

⁵ Twahayūbūkīla ū būjiba bo nyanza ya Kilikia na Pamfulia, tūshika Mula, nzengo gwa Likia.

⁶ A henaho ū ntaale wa bashilikale igana ūbona meli ya Isikandelia yajaga Italia, ūtūtūūla ng'wenūmo.

⁷ Tūja lūgendo lwa pole-pole ikanza lya shikū ningī; aho twegeela kūshika Nido, ū nyaga gūtūlemeela. Na lūūlū tūbiza gītī tūlījīlīīla Salimoni, tūja tūkwikilimbījaga ijinga lya Kuleti, lītūshīkīgije ū nyaga.

⁸ Ū kwandīja henaho ū lūgendo lwise lūbiza lo makoye mataale no, alīyo nose tūshika h'ipandī litanagwa Ng'walo Gwawiza, hihī na Lasea.

⁹ Hūna īkī ī shikū jikakwīla nū lūgendo longeja kūbiza lo kwihīga kūtaale, hama nī shigukulu sha kūfunga shūsangwa shamalile kūbīta, ū Paulo ūbahūgūla.

¹⁰ Ūbawīla gīkī, “Bababa nalībona ū lūgendo lwenūlū lūkūbiza na būkenaagūji hamò na būjimīīja būtaale; nīyo ītī kū miligo na meli dūhū, alīyo nū būpanga wise!”

¹¹ Kwike ū ntaale wa bashilikale igana ūbona īlī yawiza kwīta īyo yahayiagwa na ntaale wa lūgendo hamò nū ng'wenekīlī meli, kūtinda kūdīlīla īyo īkahayiwa na Paulo.

¹² Nose īkī ū ng'walo gwenūyo gwalī gūtī gwawiza ū kwikala ho mu makanza ga mbeho ya mu shiyaga, a bingī būbona īlī hambū-hambū kwīnga ho. Ūlū yūdūlīkana bashikīīle ha ng'walo gwa Foenike ya Kuleti, bakalīmalīle henaho ī likanza lya shiyaga. Ū ng'walo gwenūyo gwalī gūlolelile dakama ya ng'weli na sukuma ya ng'weli.

Makoye ga nyaga mu nyanza

¹³ Kūhayimanīla nyaga gwa kūfuma dakama, gūyūhemba hado-hado, gītī mu nyaleele-leele. A bene biganika gīkī mmho ī mihayo īlīja gīt'ūmo baalī batogelilwe; hūna būzubūla ishika, bandya kūja bakwīyikilimbījaga ī Kuleti.

¹⁴ Alīyo lītabītile ikanza ilīhu gūbūūka nyaga ntaale, gūkitanagwa Ulokilo; gwiza gwībītīla

¹⁵ ī meli, gwījananīja gūkwīheheejaga. Tūkagema tūgemile ū kwīgoba, alīyo nose ū nyaga gūtūnogolecha, tūgwa ngholó; gongeja kūtūselengetya gūtūtwalile!

¹⁶ Nose tūshika kwijinga idoololo līkitanagwa Kilauda, lyūbiza gītī lyatūshīkīja ho hado; twalī na lyato, tūhadīkīja kūlītūūla mu meli, tūūkaheeba kū kale.

¹⁷ Hūna bigunaana kwībohya ngoye ī meli. Ī likanza lyenīlo yaselengetiagwa kūjīlīīla Suliti. Bogoha gīkī īkūja īkichimīje mu maseni, hūna bicha ishika yūbiza ya kūyūtwalwa pole-pole.

¹⁸ Ū kū ntondo yaho a makoye ga nyaga gūbiza mataale kūtinda, nose bandya kwīponya ī miligo.

¹⁹ Kū lūshikū lo kadatū lwaho būyūponanja boi benekīlī na makono gabo shikolo shimò na shimò sha mu meli.

²⁰ Ū nyaga ūyo gwatūkoyaga gwalī ntaale no; hama jikabīta shikū ningī tūtūbonaga līīmi nūūlū sonda, kūshisha tūgwa ngholó gete; kūshila ū kwisagīlwa kwa kūpīla!

²¹ Jūbīta shikū ningī a banhū bataalī kūlya shilīwa, nose ū Paulo wīmīīla ha gatī yabo ūhaya gīkī, “Bing'we bababa, ūlū ni muzunye ī yane muleke ū kwīnga ī Kuleti, ni būtigelile ū būkenaagūji nū būjimīīja wenūbū.

²² Alīyo nahene nī haha nalīmuwīla timbyagi ngholó, atīho nūūlū ūmò wing'we ūyo akūjimīīja būpanga; gwike ī meli īkūkenaagūka!

²³ Nguno ū būjikū bo lelo wenūbū walī wīmīīla hihī nū nene malaika o ng'wa Mulungu ūyo nalī wakwe, ūyo nakanamyaga;

²⁴ ūniwīla gīkī, ‘Ūtogohage Paulo, shikwigelile ūshike ū kūlī Kaisali, ūkīmīīle ū kū būtongi bokwe. Hama nīyo managa gīkī, ū Mulungu wakwinhaga pye abo balī mu lūgendo hamò nangho.’

²⁵ Ali lūūlū bababa timbyagi ngholó; ū mhayo ūyo nawīlagwa gwenūyo gūkūshikīīla, nguno ū nene nansanije ū Mulungu.

²⁶ Kwike shiigelile tūponyiwe ng'wijinga ilebe.”

²⁷ Hūna lūūlū aho būlingīla būjikū w'ikūmi na būnè, tūsangwa tūlī mu nyanza ya Adilia tūkūselengetiagwa kūtwalwa ūko na ūko. Mu būjikū ha gatī a batūmami ba mu meli biganika gīkī begeela kūshika kū sī nyūmu.

²⁸ Būponeja lūgoye kūbūlola ū būshimu bo nyanza, būbona būlī gītī makono makūmi abīlī, būja-ja-ja ha būtongi hado, būponeja hangī; lelo būbona makono ikūmi na atanò.

²⁹ Hūna īkī bakogoha gīkī tūtizipamīja mu mawe, būponeja mashika anè ū kū numa ya meli; hūna bandya kūlomba gīkī wele ū būjikū.

³⁰ Lyalīmo lyato ū mu meli, a batūmami būliicha mu nyanza, kūnū bakwigīmbījaga gītī balīhaya kūponeja mashika kū būtongi bo meli, alīyo bakoobaga nzīla ya kūtolokela.

³¹ Ū Paulo ūng'wīla ū ntaale wa bashilikale igana na a bashilikale; gīkī, “A benaba ūlū batikalile ū mu meli ūmu, mutūpīla nūūlū hado yaya!”

³² Hūna a bashilikale būjitīna ī ngoye ja lyato lyenīlo būlīlekela lyūselengetiwa lījile.

³³ Aho wegeela kwela ū būjikū, ū Paulo ūbakomiga pye balye shilīwa; ūhaya gīkī, “Ī lelo lūlī lūshikū lw'ikūmi n'inè mutaalī kūlya shilīwa.

³⁴ Na lūūlū ī haha nalīmulomba mulye nguno mukūpīla, atīho nūūlū ūmò wing'we ūyo akūjimīīja nūūlū lūywīlī lūmò dūhū.”

³⁵ Aho wamala kūhaya gīko ūsola ngatī, ūnūmba Mulungu kū būtongi wa bose, hūna ūgūmeganya ūlya.

³⁶ Nabo būzalabana pye a bose, būlya shilīwa.

³⁷ Abo twalīmo ū mu meli, twalī banhū magana abīlī na makūmi mpungatī na batandatū.

³⁸ Aho balya bigeja, bīgeheja ū būdito ī meli; būjiponanja mu nyanza ī ngano.

Kūpaanagūka kwa meli

³⁹ Wahayeela ū būjikū, bījimīīlwa ī sī yenīyo, alīyo būbona ng'walo nebe gwa lūseni, biganika īkūbeelela ūlū bīkoja henaho ī meli.

⁴⁰ Būjitīnagūla ī ngoye, būgaleka mu minzī a mashika, pye na a magobelo; hūna būlinhya itanga līmò gīkī līsole lūyaga; bīlogeja kū ng'walo ī meli.

⁴¹ Būshika h'ipandī ilebe aho jalī jimanhīgije nyanza ibīlī, ī meli yichimīja ha sī ū kū būtongi yūlemeelwa ū kūsegeja; hūna yūyūtūlwa mahuuli ū kū numa, yandya kūpaanagūka.

⁴² A bashilikale lyūbizīīla iganiko lya kūbabūlaga pye a batungwa, gīkī atizilonga nūūlū ūmò wa kūjiha na kūtoloka.

⁴³ Alīyo ū ntaale wa bashilikale igana ūbalemeja ī liganiko lyabo lyenīlo, nguno walī atogilwe kūmpīja ū Paulo. Ūlagīla abo badūgije kūjiha batonge ū kwiponeja bajihe bajile kū ng'walo, bakipīje.

⁴⁴ Abo bakasaaga būyūdima mabudīka-budīka ga mbao, bangī mashikolo gangī-gangī ga mu meli. Yūdūlīkana kūpīlīla ha sī nyūmu pye a bose mu gīko.