Shītwa 26 - Sukuma New Testament 2000

Būsombooji bo ng'wa Paulo

¹ Hūna ū Agilipa ūng'wīla ū Paulo gīkī, “Wazunīlījiagwa hayaga ī mihayo yako.” Ū Paulo ūgoloola nkono, hama wandya kūsomboola; ūhaya gīkī,

² “Ntemi Agilipa, ī lelo nibona nalī mu kwīlūkīlwa kūtaale no, nguno napandīka ng'wanya gwa kūsomboola kū būtongi wako pyī ī mihayo īyo Bayudaya bandije kūnibūūla.

³ Ū mhayo gwa kwandya ū bebe ng'wenekīlī ūjimanile ī nhūngwa ja Bayudaya nī mihayo yabo īyo īkenhelejaga būyombo; ali lūūlū, nalīkūlomba wiyūmīlīje ū kūnidegeleka.

⁴ Pye a Bayudaya bajimanile ī nhūngwa jane, nguno nalī munhū wa ng'wihanga lya ng'wise na mu Yelusalemu kūfuma haho wandījo, ha būyanda bone.

⁵ Ūlū būtogwa badūgije kūkaanīla, īkī banimanile kūfuma kale na kale, gīkī ū mu nhūngwa jane nalī ūmò wa Bafalisayo, a badimi ba shilagīlo kūtinda pye a banhū.

⁶ Nī haha nīmīīlaga kūlamulwa kūlwa nguno ya kwisagīja kwa ng'wa Mulungu, ūmo wabisagīgīja bakūlūgenji bise.

⁷ Baba ntemi, a Bayudaya balīnibūūla kūlwa nguno ya kwisagījiwa kwenūko, ūko pye a banhū ba ng'anda jise ikūmi n'ibīlī bakalamyaga mu nghana, līīmi na būjikū, mu kwisagīlwa gīkī bakūbiza mo.

⁸ Ī gīsī nibūlī mukūbonaga gīkī gūlī mhayo gwa kūkumya ū Mulungu ū kūbajūūcha a bafu?

⁹ Nū nene ī chene naabonaga gīkī shinigelile kūtūmamīla būlī nzīla, kwilwisha nī lina lya ng'wa Yesu ū wa Nazaleti.

¹⁰ Ū mhayo gwenūyū nagwītaga ū mu Yelusalemu; ū būdūla ūbo naalī ninhwa na bagabīji bataale nabūtūmamīlaga no, nūyūbalugalīla mu jeela beela bingī. Nīyo ū mu būtogwa nī nghūmbū jane, naalī natogilwe bamalwe pye gete!

¹¹ Būlī gwa najaga hose-hose ū mu masinagogi, kūjūbinha nsango, na kūbahadīkīja kūtūmamīla mihayo ya kūbūsosohaja ū būzunya wabo. Naalī nabapelanīlile kībi no, pyī nū kū mizengo ī ya hanze najaga naakabaluhya.

Kūgalūchiwa kwakwe

¹² “Lūshikū lūmò nalī mu lūgendo najile Damasko, naalī ninhwa būdūla na shilagīlo kūfuma kū bagabīji bataale, naje nakīīte gīt'ūmo natogelilwe.

¹³ Aho nalī mu nzīla baba ntemi, nahayimanīla nabona būpe būkīlile a ha būng'weku bo līīmi; wika kūfuma ng'wilunde, būnipīndya ū nene, na a babo bashimīzaga hamò nane.

¹⁴ A bose tūgwa ha sī, hūna niigwa ilaka līlīniyombya mu lūlīmi lwa Shihebulania gīkī, ‘Saulo, Saulo, nibūlī ūlīniluhya? Īlī shilambu ū bebe ū kwikala ūkūlusaga milambī kū someke!’

¹⁵ Nane nūhaya, ‘Ūlī nani Seeba?’ Nanghwe ū Seeba ūhaya, ‘Nalī Yesu ūyo ūlīniluhya.

¹⁶ Alīyo būūkaga wīmīīle na magūlū gako; naakwilongelaga kūlwa nguno ya kūkwīta ūbize ntūmami, na nkaanīji wa mihayo yane yose, īyo wanibonaga muyo, nī yīyo nakongeja kūkoolekeja.

¹⁷ Nakūja nakūkūpījaga ū kū banhū na a mahanga ayo nalakūtūme kūja kūbo,

¹⁸ kūlwa kūbaloleecha a miso gabo; bīnge ū mu giiti, bingīle ng'wisana, bīnge ū mu nguzu ja ng'wa Shetani, bize kūlī Mulungu banukūle kūlekejiwa kwa shibi, na wingīji hamò na a babo bamala kwejiwa kūlwa kūnizunya nene.’

Būkaanīji kū mahanga gose

¹⁹ “Hūna lūūlū baba ntemi Agilipa, natīlemile īyo nakawīlwa ū mu koolekegeje ka kūfuma ng'wigūlū kenako.

²⁰ Alīyo nandya kūja nakūbalomeelaga a banhū gīkī bagalūke banzunye Mulungu, bandye kwīta shītīle sha koolecha kūgalūka. Nakandīja Damasko, nūja nī Yelusalemu, nī Būyudaya ī yose; pyī nū kū mahanga a gangī.

²¹ A Bayudaya bakanidimīla mu hekalu kūlwa nguno ya mihayo yenīyī, baalī batogilwe kūnibūlaga.

²² Alīyo īkī ū Mulungu alī ngunaani wane, h'ī nguno yene nī lelo īyī nīmīīlaga aha nalīsomboola hape kū būtongi wa bose, bataale na bado. Natūhayaga mihayo yīngī, ūlū ītī īyo īhayiwe na bahangi hamò na Musa, gīkī yigelile ībize ho;

²³ mihayo ya kūluhiwa kwa ng'wa Kilisto, ūyo yalī īng'wigelile abize wa kwandya kūjūūka kūfuma mu bafu, hama aje akūlomeelaga isana kū banhū bakwe bose, nū kū mahanga a gangī.”

Paulo kūbalombela bose

²⁴ Ū Paulo aho wīhaya ī mihayo yenīyo, kūhayimanīla ū Fesito wahamuka n'ilaka lya higūlya alīhaya, “Wasalile ū bebe Paulo; lyakūsagije ī lisoma lyako!”

²⁵ Nanghwe ū Paulo ūhaya, “Baba nkūjiwa Fesito natī nsaji, nalīhaya mihayo ya nghana, hangī mu masala madeekanu.

²⁶ Leka nayombe mu kwisandaala ū kūlī ntemi īkī ayīmanile ī mihayo yenīyī. Namanile hape gūtīho ūyo gūng'wibisile, nguno ū mhayo gwenūyū gūtīītilwe mu mbisīla.

²⁷ Ntemi Agilipa, angū mmho ūbazunije a bahangi? Namanile ūbazunije!”

²⁸ Ū Agilipa ūng'wīla ū Paulo gīkī, “Ū bebe, ū ng'wikanza ī liguhī lyenīlī ūlīhaya ūkūnīīta nabize Nkilisto ū nene?”

²⁹ Nanghwe ū Paulo ūnshokeja ūhaya, “Ū nene nalīnomba ū Mulungu gīkī nūūlū ni lyabiza ikanza iguhī, nūūlū ilīhu, ītī bebe kwike; alīyo pye a bose abo mulīnidegeleka mubize gīt'ūmo nalī ū nene, kwīnja ho dūhū ī nhendele īji!”

³⁰ Ūbūūka na kūbūūka ū ntemi nū nsugi, nū Belinike; pye na a babo baalī bigasha nabo.

³¹ Aho balīnga, bakaja baliwīla, “Ū munhū ng'wenūyū atīītile mhayo gose-gose gwa kūng'wenheleja kūcha, nūūlū ni kūtungwa dūhū!”

³² Ū Agilipa ūng'wīla ū Fesito gīkī, “Nīyo ū munhū ng'wenūyū ūlū ni walī atalombile kūjūdegelekwa na Kaisali, walī igeleelilwe nūūlū kūlekelwa dūhū.”