Shītwa 20 - Sukuma New Testament 2000

Kūja Makedonia na Būyunani

¹ Aho yabīta ī yose yenīyo ū Paulo ūbitana a bahemba ūbatimbya ngholó, na ūbalaga ūbūūka kūja Makedonia.

² Waja alībīta hose-hose ī mhandī jenījo akūlūngalūngaga mihayo mingī ya kūbakomeleja a banhū, nose ūshika ī Būyunani.

³ Akamala mo myeji īdatū; aho wahaya kūbūūka kūja Sulia kūbītīla mu nyanza, ūgalūcha a maganiko; ūshoka ūbītīla Makedonia, nguno akabona gīkī a Bayudaya baalī basīgana mhayo gwa kūmūlaga.

⁴ Bakaja nanghwe bana Tesalonike, ba Sopatilo ng'wana Piliho muna Beloya na Alistako na Sekundo, na Gayo muna Delibe, hamò nū Timoteo; na bana Asia ba Tikiko na Tulofimo.

⁵ Alīyo īkī a banhū benaba baalī batonga ū kūja, bahayūshika Tiloa būtūlinda.

⁶ Aho shabīta shigukulu sha migatī ītī na shibimbya, nise tūbuga nyanza twīnga ī Filipi, tūmala shikū itanò hūna tūshika ī Tiloa ūko baalī; tūshinga ho shikū mpungatī.

Kwilaga kwa ng'wa Paulo na bana Tiloa

⁷ A ha lūshikū lo kwandya mu nyuma tūkibilinga kūmega ngatī, ū Paulo ūlomeela kūshisha būjikū ha gatī, nguno walī ahelile kwīnga a ha ntondo yaho.

⁸ Ū mu chumba ūmo twalī twibilingīla jalīmo talà ja kūgunaana.

⁹ Ndinha nebe, lina lyakwe Yutiko, walī wigasha ha lūgala lw'idilisha, wanoga ūbītwa tūlo, ūtindīla īkī ū Paulo akalomeela ikanza ilīhu. Kūhayimanīla ū ndinha ng'wenūyo wagwa ha sī; būmūcha omalaga gūcha, nguno akagwa kūfuma kū golofa ya kadatū.

¹⁰ Ū Paulo aho wika ūshikīla kūngwīla ūnkumbatīla; hūna ūbawīla, “Mutogohage ataalī mpanga!”

¹¹ Wīnga ho ūlinha hangī ū kū golofa, ūmega ngatī ūlya, ongeja hangī ū kūhoya nabo; nose wela hūna ūja.

¹² Aho bamūcha ū nsūmba būyega no, nguno bakamona alī mhola.

Lūgendo lwa kūfuma Tiloa kūja Mileto

¹³ Twahayandya ū lūgendo, a bise twingīla mu meli tūtonga kūja Aso, gūkahelwa gīkī tūkūjūnsolela kwene ū Paulo; nguno ū ng'wene akaja lwa magūlū.

¹⁴ Aho watūsanga ī Aso, tūmbakīja tūbūūka tūjile tūūkashika Mitūlene.

¹⁵ A henaho twīnga hoi kū ntondo yaho, tūbuga nyanza tūūkakola ha ng'walo gwa Kio; hama a ha ntondo yaho hangī tūshika Samo, ū kū lūngī tūshikīīla Mileto.

¹⁶ Ū Paulo walī atogilwe kūbītīla Efeso; alīyo walī atatogilwe kūsola ikanza ilīhu ū mu Asia, nguno walī wangū-wangū; gīkī ūlū yūdūlīkana ū lūshikū lo Pentekosite lūshike alī Yelusalemu.

Paulo na Banamhala ba Efeso

¹⁷ Hūna aho alī Mileto ūtūmīja būkitanwa a banamhala ba kanisa ya Efeso.

¹⁸ Aho bashika ūbawīla gīkī, “Mumanile ūmo nashimīzīlaga ū ng'wikanza ī lyose aho nikalaga hamò ning'we, kwandīja lūshikū lo kūshika kwane mu Asia.

¹⁹ Nantūmamīlaga ū Seeba mu widohya na kūlīla, nguno ya kūgeng'wa kūtaale, kūlwa kwītīlwa yabūbi na Bayudaya.

²⁰ Nīyo hangī mumanile gīkī natamubisile mhayo nūūlū gūmò ūyo gwalī gūdūgije kūmugunaana, gīkī hīmba naleke kūmuwīla nūūlū kūmulanga hape-hape kū būtongi wa banhū, na mu būlī kaya.

²¹ Najaga nūbahūgūla a Bayudaya na a Bayunani, gīkī bangalūkīle Mulungu na kūnzunya Seeba wise Yesu Kilisto.

²² Alīyo ī haha nalīja Yelusalemu, ū Moyo anitungile; hama īyo nalakamanhye nayo natīmanile.

²³ Kwike namanile dūhū gīkī, ū Moyo Ng'wela akūjaga ūnikaanīla mu būlī nzengo, ūniwīla gīkī nalindīīlilwe būtungwa na būluhi.

²⁴ Alīyo nahene ū nene natūbūbalaga ū būpanga bone gīkī būlī na solobo ū kūlī nene, kūtinda kūlūmalīja ū lūgendo lwane, nū nīmo gwa kūkumūcha Nghūlū Jawiza ja shigongo sha ng'wa Mulungu, nīmo ūyo nakagwanukūla kūfuma kūlī Seeba Yesu.

²⁵ “Ī haha namanile gīkī, pye a bing'we abo nabītaga nakūmulomeelaga nghūlū ja būtemi, mutalanibona hangī ū mu mīlī.

²⁶ Hūna lūūlū, ū lūshikū lwa lelo lwenūlū nalīkaanīla kū būtongi wing'we gīkī, ū nene nalī wape. Natīko ū kūsayīlwa nūūlū būgwīlwa nsago a banhū.

²⁷ Nguno natalekile ū kūmuwīla pyī īyo ayīhelile ū Mulungu.

²⁸ Hū kūhaya ilanghanagi a bing'we benekīlī, nī lidale ī lyose īlo Moyo Ng'wela amutūūlile kūbiza balanghani balyo; īdīīmagi ī kanisa ya ng'wa Mulungu, īyo wīpandīka mu kwita mininga gakwe wei ng'wenekīlī.

²⁹ Ū nene namanile gīkī, ūlū nalīnge jikwandya kūng'ūbūkīla mhūge ndaku, ījo jitūlīsaatwa ī lidale.

³⁰ Hama nū mu bing'we benekīlī bakwandya kwigela banhū ba kūja bakūyombaga mihayo īchaama-chaamile, bayūbahūmbūūla a bahemba gīkī babalondeele boi.

³¹ Hūna lūūlū ikalagi miso, ng'wizūkwe gīkī ikanza lya myaka īdatū nikalaga nakūlīlaga līīmi na būjikū, natalekile kūnghūgūla nūūlū ūmò wing'we.

³² Alīyo ī haha lūūlū, nalīmutūūla mu makono ga ng'wa Mulungu, na mu mhayo gokwe ūyo gūdūgije kūmuzenga, na kūng'winha wingīji hamò na bose abo bakwejiagwa.

³³ Ū nene natikūmbilwe na hado yaya hela ja ng'wa munhū ose-ose, nūūlū sabo jingī, nūūlū ni shizwalo dūhū yaya.

³⁴ A bing'we aba mumanile gīkī naatūmamaga na makono gane aya nene ng'wenekīlī, gīkī napandīke sha kwigunaanīla ū nene, na a babo nikalaga nabo.

³⁵ Ū mu yose īyo nīītaga, nang'oolekejaga gīkī shiigelile kūtūmama gīko, tūyūbagunaana abo batidūgije; tūyūgwizūkwa ū mhayo go ng'wa Seeba Yesu; ūyo gūhayile gīkī, ‘Ū kwinha kūlī na mbango kūtinda kwanukūla.’ ”

³⁶ Aho wamala ū kūyomba ī yenīyo ūtuja mazwi, ūlomba hamò nabo pye a bose.

³⁷ Pye bakalīla no, kūnū balīnkumbatīla ū Paulo, na kūmbipa.

³⁸ Gūkabaminya ū mhayo ūyo akagūhaya, ū gwa gīkī batalamona hangī ū mu mīlī. Hūna būnshindīkīla, būūkanshisha a ha meli.