Shītwa 17 - Sukuma New Testament 2000

Būlomeeji mu Tesalonike

¹ Ū mu lūgendo lwabo būbītīla Ampifoli na Apolonia, būūkashika Tesalonike, lyalīko isinagogi lya Bayudaya.

² Ū Paulo ūshisha sabato idatū akwingīlaga mo wahoya nabo mihayo ya mu shandīkwa, gīt'ūmo wītīlaga na kale.

³ Wabakundūlīlaga na kūboolekeja hape, gīkī yalī īng'wigelile ū Kilisto aluhiwe na kūjūūka kūfuma mu bafu. Ūbawīla gīkī, “Ū Yesu ūyo nalīmusomboolela mhola jakwe ng'wenūyū, hūna ng'wene ū Kilisto.”

⁴ Bamò babo bakagūloleela bizunīlīja nabo a ba Paulo nū Sila; ū mu benabo baalīmo na Bayunani bingī, abo baalī balamya ba ng'wa Mulungu, hamò n'iganda lya bakīma bakūjiwa.

⁵ Alīyo a Bayudaya bakabona wilu, būsoleleja ibità lya banhū bahūnga kūfuma ng'wigūlilū. Aho balībilinga ī libità lyenīlo, bandya nsambo ū mu nzengo. Biza ha ng'wa Yasoni badaalulaga, balībakooba gīkī babafunīje hanze kū banhū.

⁶ Aho babagayiwa hoi, būndutanja ū Yasoni hamò na badūgū bangī, būbatwala kū basugi ba nzengo; kūnū balīyoganya balīhaya gīkī, “Baashikile nū kūūnū a banhū abo bakūjaga būyugagūla sī;

⁷ ū Yasoni h'ūyo wabanukūlile. Alīyo bashidalahile ī shilagīlo sha ng'wa Kaisali, bakūhayaga gīkī angū alīho ntemi ūngī Yesu!”

⁸ Būbayuugagūla a banhū na a batongeeji aho bīyigwa ī mihayo yenīyo.

⁹ Būmbiisha ihyū ū Yasoni na a biye, hūna būbalekela būja.

Beloya kūlomeelwa mhayo

¹⁰ Haho na haho ī būjikū, a badūgū būbafunya a ba Paulo nū Sila, būbatwala Beloya; aho bashika ko bingīla ng'wisinagogi lya Bayudaya.

¹¹ A bene baalī balembeezu kūtinda a bana Tesalonike, bakagwanukūla ū mhayo na būkalalwa bose, būyūshilola ī shandīkwa būlī lūshikū, babone ūlū īlī gīko ī mihayo yenīyo.

¹² Bingī bakazunya, bamò baalī bakīma bakūjiwa ba Shiyunani, na a bagosha nabo baalī batī bagehu.

¹³ A Bayudaya ba Tesalonike aho bigwa gīkī ū Paulo akūgūlomeelaga ū mhayo go ng'wa Mulungu nī Beloya, būja nū kwene, būūkabayugagūla na kūbazwanja a banhū.

¹⁴ Alīyo haho na haho a badūgū būng'wīnja ū Paulo būja nanghwe kū ng'walo gwa nyanza, būneka ū Sila nū Timoteo.

¹⁵ Abo bakaja nū Paulo bakajūshika nanghwe Atene. Aho wamala kūbalagīja gīkī bakabawīle a ba Sila nū Timoteo bangūhe ū kwiza ū kūlī we, a boi būshoka Beloya.

Paulo mu Atene

¹⁶ Ū Paulo aho alī mu nzengo gwa Atene abalindīīlile a biye, akabona mo mbika na mbika ja shiikolile sha kūlamiwa; ū mhayo gwenūyo gūnkoya no ū mu moyo gokwe!

¹⁷ Ūyingīla ng'wisinagogi lya Bayudaya wahoya nabo, hamò na a bangī abo bizaga mo kūlamya. Na kwigūlilū wajaga būlī lūshikū wakahoya na a babo baalīko.

¹⁸ Baalīho na basomi bataale, bitanagwa Baepikuleo na Bastoiko; bamò babo aho bamanhya nanghwe ū Paulo būyūhaya gīkī, “Ū nghalahala ūyū nanghwe ni alīgaagaana kūhaya kī shi?” Bangī būyūhaya gīkī, “Alībonekana kūbiza nomeeji o mihayo ya bamulungu bageni!” Bakahaya gīko nguno ū Paulo wabalomeelaga nghūlū ja ng'wa Yesu na ja būjūūko.

¹⁹ Nose banoga būndima, būntwala kwinumba lyabo lya kwibilingīla litanagwa Aleo-Pago; būūkamūja kwenūko gīkī, “Bebe a malange ayo ūlīlanga genaya mapya, tūdūgije kūgamana nise?

²⁰ Nguno ī mihayo īyo ūlītwenhela yenīyī, migeni gete ū mu matū gise! Na lūūlū tūlī na nghūmbū ja kūgamana a makūlū gayo!”

²¹ Nguno pye a bana Atene na a bageni abo bikalaga mo baalī batī na gwa kwīta gūngī, ūlū ītī kwiyinha sūūsū dūhū, nūūlū kūdegeleka mihayo migeni.

²² Hūna ūbūūka ū Paulo wīmīīla ū ng'winumba lya Aleo-Pago; ūhaya gīkī, “Bababa bana Atene, nalībona a bing'we mukalalilwe no ī mihayo ya dini.

²³ Nguno ū mu kūbīta-bīta kwane, būlī kwene ūlū nalola nakwībonaga ī mihayo ya kalamīje king'we. Naabītile na kūbona wandīke ha ng'walīlo nebe būhayile gīkī, ‘Kūlī Mulungu ūyo atamanīkile.’ Ali lūūlū, ū nene nalīmulanja ūyo mukanamyaga mu būtūmana ng'wenūyo.

²⁴ Ū Mulungu ū Meeja wa sī nī shose īsho shilīmo, atikalaga mu maduku ga kūbeejiwa na makono, nguno ū wei hū Seeba w'igūlū na sī.

²⁵ Nīyo atagongile kūtūmamīlwa na makono gītī gīkī ngayiwa, nguno hū ng'wene ūyo akabinhaga pye a bose ū būpanga nī myūyī, nī shikolo ī shingī pyī ūmo shigelelile.

²⁶ Hūna ng'wene ūyo akagabeeja pye a mahanga ga banhū kūfuma mulī munhū ūmò, gīkī bīsambaalīle pyī ī sī, bazenge mo. Ūbatūūlīla na makanza, nī mbīmbī: mihayo īyo īhelilwe kūfuma kale kūlwa wikalo wabo;

²⁷ gīkī bayūbbabbasha-bbabbasha, nose bampandīke ū Mulungu, nūūlū īkī atī kūle na būlī ūmò wise.

²⁸ Nguno ū mulī we h'ūmo būlī ū būpanga wise, nū kūyeela-yeela kwise kūlī mulī we. Pyī nū būmunhū wise h'ūmo būlī, gīt'ūmo na bamò ba bīmbi bing'we bakahayīlaga gīkī, ‘Na a bise tūlī shiseeng'wa shakwe.’

²⁹ Nose īkī tūlī shiseeng'wa sha ng'wa Mulungu, tūtiziganika gīkī ū Mulungu ashikile kūgelanījiwa na shikolo gītī zahabu nūūlū feza, nūūlū mawe ga mpango ntaale ayo gakabeejiagwa na būgaliili bo banhū.

³⁰ Ū mu makanza ga būtūmana, ū Mulungu walī abalekile dūhū a banhū, alīyo ī haha alībalagīla pye a banhū hose-hose gīkī bagalūke.

³¹ Nguno lūlīho lūshikū alūtūūlile, lo kūbalamula pye a banhū mu būtūngīlīja, mu nzīla ya ng'wa Munhū ūyo ansolile we. Ū Mulungu akanjūūcha ū Munhū ng'wenūyo kūfuma mu bafu, ūboolekeja hape pye a banhū gīkī akūgūshikīlīja ū mhayo gwenūyo.”

³² Aho bigwa mhayo gwa būjūūko wa bafu, bamò bandya kūneeneleja mu būdalahi balīhaya, “Yū, wigejaga lūūlū, tūkwīdegeleka n'ikanza līngī hangī ī mihayo yako!”

³³ Hūna ūbīngīla hoi ū Paulo.

³⁴ Alīyo bamò na bamò bakazunya būdimana nanghwe; mu benabo walīmo Dionisio, ūmò wa banhū ba mu Aleo-Pago, na nkīma lina lyakwe Damali, na bangī abo baalī hamò nabo.