Shītwa 16 - Sukuma New Testament 2000

Timoteo kūja na Paulo

¹ Hūna ūtulumenha ajile ūūkashika Delibe, ūlūmbūlīla kūja Lustila; a henaho walīho nghemba ūmò lina lyakwe Timoteo, ng'witūnja wa nkīma Nyudaya nzunya, ū ise walī Nyunani.

² Ū nghemba ng'wenūyo wakaanīlagwa chiza na a badūgū ba Lustila, na a ba Ikonio.

³ Ū Paulo ūtogwa kūja nanghwe, hūna ūnsola ūnsaala, kūlwa nguno ya Bayudaya abo baalī bazengile ī mhandī jenījo, īkī pye a bose baalī bamanile gīkī ū ise walī Nyunani.

⁴ Hūna aho balībīta hose-hose ū mu mizengo, būyūbinha ī shilagīlo īsho shalī shafuma kū batūng'wa na banamhala ba Yelusalemu.

⁵ Ī kanisa jikaguzuhiwa ū mu kūzunya, nīyo jūyongeja ū kūkūla būlī lūshikū.

Kwitanwa mu koolechiwa kūja Makedonia

⁶ Alīyo ū mu sī ja Fulugia na Galatia bakabīta mo dūhū, nguno ū Moyo Ng'wela walī wabalemeja ū kūgūlomeela ū mhayo ū mu Asia.

⁷ Aho batumbya Musia, būgema kwingīla mu Bitunia, kwike nū kwene atabazunīlīgije ū Moyo wa ng'wa Yesu.

⁸ Hūna būbīta balīyikilimbīja ī Musia, būūkashika Tiloa.

⁹ Makanza ga būjikū ū Paulo ūmona mu koolechiwa, muna Makedonia; īmīīlile alīng'wikūmbīlīja alīhaya gīkī, “Kīlaga wize kūūnū Makedonia ūtūgunaane!”

¹⁰ Aho wakūbona ū koolechiwa kwenūko, haho na haho twandya kūkooba kūja Makedonia, nguno akamana gīkī ū Mulungu watwitanaga kūja koi kūbalomeela Nghūlū Jawiza.

Ludia kūngalūkīla Seeba

¹¹ Aho twīnga ī Tiloa tūlinhya itanga, tūgoloola kūja Samotilake; aho wela tūshika Neapoli.

¹² Hūna ū kūfuma a henaho tūja tūūkashika Filipi, ū kwenūko tūkikala ko shikū ningī. Ī lipandī lyenīlo lyalī līsugilwe na Balumi, hama ū gwenūyo hū gwalī nzengo gwabo ntaale.

¹³ A ha ntondo yaho yalī sabato, twīnga ū mu nzengo tūfuma hanze ya mita, nguno twalī na nghūmbū ja kūpandīka ipandī lya kūlamīja. Tūja tūūkigasha ha nghilimva ya mongo, tūlūngalūnga na bakīma bakiza kwibilinga henaho.

¹⁴ Walīho ūmò wabo, lina lyakwe Ludia, njinja ntaale wa myenda ya langi ya nzulunge, nshīke wa mu nzengo gwa Siatila, hangī munhū wa logohano kūlī Mulungu. Ū nkīma ng'wenūyo aho wigwa, ū Seeba wīlugūla ī ngholó yakwe, ūyanukūla īyo yahayiagwa na Paulo.

¹⁵ Ūbatīījiwa ū wei, nī kaya yakwe; hūna ūtwikūmbīlīja ūhaya, “Ūlū mulībona gīkī nalī nsanyiwa ū kūlī Seeba, nzūgi ng'wikale ha ng'wane.” Nīyo akatūdayīīla no ū mu mhayo gwenūyo!

Kūponyiwa mu jeela

¹⁶ Lwise lūmò twajaga kwilomba, tūmanhya na ng'wanikī nsese, walī n'isamva lya būchūūja, lyang'winhaga būdūla bo kūbapandīkīla solobo nhaale a ba ise-būgonzo kūlwa kūchūūja.

¹⁷ Hūna wandya kūnkūūbīlīja ū Paulo na a bise, kūnū alīlīla ūhaya gīkī, “A banhū benaba batūmami ba ng'wa Mulungu ūyo alī higūlya no, balīho ū ng'wenūmu kūlwa nguno ya kūmulomeela nzīla ya būpīji.”

¹⁸ Jikakwīla ī shikū akūgwītaga ū mhayo gwenūyū, nose gūnkoya ū Paulo; ūgalūka ūlīwīla ī lisamva gīkī, “Nalīkūlagīla mu lina lya ng'wa Yesu Kilisto, nfumage!” Lyūnfuma nghana ī likanza lyenīlo dūhū.

¹⁹ A ba ise-būgonzo aho babona gīkī bajimīīja ū kwisagīlwa kwabo kwa solobo, būbadima a ba Paulo nū Sila, būbadutanja babatwalīle kwigūlilū, kū būtongi bo basugi.

²⁰ Būūkabashisha kū balamuji, būhaya gīkī, “A banhū benaba Bayudaya, alīyo balītūyugagūlīla ū nzengo gwise.

²¹ Bakūjaga būlomeela mihayo ītatwigeleelilwe a bise, īyo tūtūdūla ū kwīyanukūla nūūlū kwīyīta, nguno tūlī Balumi a bise!”

²² Pye a banhū būbazanzamukīla. A balamuji būlagīla bazuujiwe ī shizwalo, batūlwe mbooko.

²³ Aho bamala kūbatūlagūla mbooko ningī, būbaponya mu jeela; būnkomeleja ū nanghani wa jeela abalanghane na witegeleja.

²⁴ Nanghwe aho wamala kūkomelejiwa gīko ūbaponya mu chumba sha mu gatī ya jeela, hama ūlola ūbatunganīja ha mantī a magūlū gabo.

Kūpījiwa kwa nanghani wa jeela

²⁵ Mu makanza ga būjikū ha gatī, ū Paulo nū Sila balombaga na kūngongoola Mulungu mu mīmbo; a batungwa bichabo badegelekile.

²⁶ Kūhayimanīla yadinghima nyahīnga nhaale; pyī ī jeela yūtinginyiwa, nū nsingi gwayo. Ī milyango yūlugūka pye, nī minyololo īyo baalī batungilwe a batungwa yūtaligūka.

²⁷ Ū nanghani ūmisha, aho wībona ī milyango ya jeela yalugūkaga, ūsopoola lūshū gīkī ibūlage, nguno akiganika a batungwa bapeelaga.

²⁸ Alīyo ū Paulo ūhamuka n'ilaka itaale ūhaya gīkī, “Ūtiziyagaja, tūlīho pye a bose!”

²⁹ Ūlomba yenhwe talà, hūna wiza wangū-wangū kūnū akūdetemaga, ūshika ūgwa ū kū būtongi bo ba Paulo nū Sila.

³⁰ Ūbafunya hanze; hūna ūbabūja gīkī, “Bababa, nīīte mhayo kī napandīke kūpīla?”

³¹ Nabo būng'wīla, “Nzunyage Seeba Yesu, ūkūpījiwa ū bebe ng'wenekīlī nī kaya yako!”

³² Būnsomboolela ū mhayo go ng'wa Seeba, pye na a ba mu kaya yakwe.

³³ Ī likanza lyenīlo ītaalī būjikū gīko, ūbasola ūūkabooja a machūbagūkīle ga būtūlwa, hama ūbatīījiwa ū wei pye na a ba mu kaya yakwe.

³⁴ Ūbingīja mu kaya yakwe ūbabeegeja shilīwa; kaya ngima yokala būyegi nguno bakanzunya Mulungu.

³⁵ Aho wela, a balamuji būtūma nhūng'wa ū kū jeela balīhaya gīkī, “Balekelagi a bing'wana benabo.”

³⁶ Ū nanghani wa jeela ūng'wīla ū Paulo gīkī, “A bataale bahaya mulekelwe; jagi mhola lūūlū!”

³⁷ Alīyo ū Paulo ūnshokeja alīhaya gīkī, “Baatūtūlile mu būtongi wa banhū līīmi-nyange, hama būtūponya mu jeela, ndūhū nūūlū kūtūdegeleka ng'wibanza alīyo tūlī Balumi, ī haha hū balīhaya kūtūpeeja mu kwibisa-bisa dūhū? Yaya ī gīko, ni bizage a boi benekīlī batūfunye!”

³⁸ Abo baalī batūng'wa aho bīshisha ī mihayo yenīyo ū kū balamuji, bakogoha no aho bigwa gīkī baalī Balumi.

³⁹ Būja būūkabagwīla mu magūlū; aho babafunya hanze būbiyandīīla bafume ū mu nzengo.

⁴⁰ Aho bafuma ū mu jeela, būja ha ng'wa Ludia; bahayūmala kūbatimbya ngholó a badūgū, būgumha bajile.