Shītwa 15 - Sukuma New Testament 2000

Ibanza lya kanisa Yelusalemu

¹ Alīyo kūhayimanīla banhū balebe batulumenha bizile kūfuma Būyudaya, aho bashika ī Antiokia būyūbalanga a badūgū gīkī, “Ūlū mutasaalilwe gīt'ūmo shilī shīmīle īsho tūlangilwe na Musa, mutūdūla ū kūpījiwa!”

² Yūbūūka yombo na wihalalīja būtaale, kwike a ba Paulo nū Balinaba bīmīīla hīgīyī kwishokeja nabo a banhū benabo; nose yūbonwa gīkī hambū-hambū ū Paulo nū Balinaba batūng'we hamò na bangī, balinhe kūja ī Yelusalemu ū kū batūng'wa na a banamhala, kūlwa nguno ya halalī yenīyo.

³ Aho balagwa nī kanisa, būbītīla Foenike na Samalia, būja bakwīsomboolaga mu welwa-ngholó pyī ī mihayo ya kūgalūka kwa banhū ba mahanga; pye a badūgū bakayega no.

⁴ Aho bashika ī Yelusalemu, begelejiwa nī kanisa hamò na a batūng'wa, na a banamhala; būbasomboolela īyo Mulungu wabeejaga hamò nabo.

⁵ Hūna bīmīīla Bafalisayo, abo baalī bakwanukūla ū kūzunya; bandya kūhaya gīkī, “A banhū ba mahanga shiigelile bayūsaalwa na kūkomelejiwa kūshidima ī shilagīlo sha ng'wa Musa!”

⁶ A batūng'wa na a banamhala bibilinga kūgūlola ū mhayo gwenūyo.

⁷ Lyūbīta ikanza balīgūhoyela, hūna wīmīīla ū Petelo ūbawīla gīkī, “Bababa badūgū bane, a bing'we benekīlī mumanile ūmo Mulungu akasolela makanza malebe; yabizaga ka kale ho, gīkī a banhū ba mahanga bagwigwe ū mhayo gwa Nghūlū Jawiza kūfuma kūlī nene, bazunye.

⁸ Hūna ū Mulungu ūyo ayīmanile ī myoyo, ūbakaanīla mu kūbinha Moyo Ng'wela gīt'ūmo akatwinhīla a bise.

⁹ Aho bazunya atasolanije a ha gatī yise na a boi ū mu kūjeeja ī ngholó jabo.

¹⁰ Hama nibūlī lūūlū ī haha mulīngema ū Mulungu, mu nzīla ya kūbatūūlīla ijoki idito mu nhingo a bahemba, īlo tūlīlemeelilwe a bise ū kūlībūūcha, pye na a bakūlūgenji bise baalī balīlemeelilwe?

¹¹ Nguno a bise tūzunije gīkī, tūlī bapījiwa kūlwa shigongo sha ng'wa Seeba Yesu, gīt'ūmo īlī nū kū bene.”

¹² Hūna pyī ī libanza lyūhuumūlīja sele kūbadegeleka a ba Balinaba nū Paulo; nguno bakandya kūsomboola ūmo Mulungu wabeejaga shimanīkījo na mihayo ya kūkumya ū kū banhū ba mahanga kūbītīla mubo.

¹³ Aho bamala, ū Yakobo ūshosha alīhaya gīkī, “Bing'we bababa, nidegelekagi badūgū bane.

¹⁴ Ū Simioni watūsomboolela gīt'ūmo kūfuma kale ū Mulungu abizūkīlile a banhū ba mahanga, hama nīyo wamala kwisolela banhū kūlwa lina lyakwe kūfuma ū mubo.

¹⁵ Ū gwenūyū gwideebelile nū mhayo gwa bahangi ūmo gwandīkīlilwe; gīkī,

¹⁶ ‘Ha numa ya mihayo yenīyī nakūshoka, nīzenge būpya ī numba ya ng'wa Daūdi īyo īgwile, nakwīzenga hangī, yīnge ū mu būsagambūke wayo, nībeeje būpya yīmīīle hangī.

¹⁷ Nguno shiigelile na a banhū a bangī bankoobe ū Seeba, pye a banhū ba mahanga abo bakwitanīlagwa kū lina lyane; alīhaya Seeba ūyo akūyītaga ī yenīyī,

¹⁸ īyo īmanīkile kūfuma kale na kale.’

¹⁹ “Ali lūūlū, ū būlamuji bone būlī gīkī, tūtizūbazwanja a banhū ba mahanga abo bakūngalūkīlaga Mulungu.

²⁰ Alīyo tūbandīkīlagi gīkī bikomanye nabo ū būsoso bo kwitongeleja kū mashiikolile, nū būjingi; hama yaya nūūlū kūlya ndimu ja kūnigwa, na a mininga yaya.

²¹ Nguno kūfuma shibyalīlwe sha kale na kale, ū Musa alī na bahemba bakwe hose-hose ū mu mizengo; būlī sabato akasomagwa ū mu masinagogi.”

Būlamuji w'ibanza

²² Gūkabayeja a batūng'wa na a banamhala, nī kanisa ī yose, gwa kūbasola banhū kūfuma mubo, gīkī babatūme baje ī Antiokia hamò nū Paulo nū Balinaba. Ūsolwa Yuda, ūyo witanagwa Balisaba na Sila, bamò ba banhū bataale ū ng'wigele lya badūgū.

²³ Būbinha na nyalūba ya kūja nayo; īhayile gīkī, “Bise badūgū bing'we batūng'wa, hamò na banamhala: Kū badūgū bise a ba mahanga, abo balī Antiokia na Sulia, na Kilikia. Tūlīmugīsha.

²⁴ Twigwile gīkī bamò ba mu bise baashikile kwenūko, būmukoya na mihayo ya kūmuzwanja maganiko; tūtabatūmile bise a benabo!

²⁵ Ali lūūlū, a bise ū kūūnū tūlī n'iganiko līmò, twabonile īlī yawiza kūsola banhū tūbatūme bize ūko mulī, hamò na a batogwa bise, a ba Balinaba nū Paulo;

²⁶ banhū abo bifunya būpanga wabo kūlwa lina lya ng'wa Seeba wise Yesu Kilisto.

²⁷ Babo kwenūko lūūlū ba Yuda na Sila, twabatūmaga bize ko hamò nabo; bakūmuwīla ī mihayo yenīyī gīt'ūmo īlī.

²⁸ Nguno yabonekanile ū kūlī Moyo Ng'wela hamò nū kū bise gīkī, ītīho nguno ya kūmuseseja nigo gūngī gose-gose, ūlū ītī mihayo īyī gīkī:

²⁹ Yaya ū kūlya ī shitambo sha mu mawitongeleja, na a mininga, pyī nī ndimu ja kūnigwa; yaya nūūlū kwisanja mu mihayo ya būjingi. Ūlū ng'ūlekana nayo ī yenīyo, mukūtūngīlīja. Ikalagi mu mhola.”

³⁰ Hūna aho balagwa, būja būūkashika ī Antiokia; aho balīkuminga pyī ī libità, būbinha ī nyalūba.

³¹ Yahayūmala ū kūsong'wa bakayega no, hangī būlūngūjiwa nū būkomelejiwa wenūbo.

³² Ū Yuda nū Sila būbatimbya ngholó na kūbaguzuhya a badūgū; nguno nabo baalī bahangi.

³³ Aho bikala nabo ikanza lya shikū ningī ho hado, būlagwa bashoke mhola ū kū badūgū abo baalī babatūma. [

³⁴ Alīyo ū Sila ūtogwa kwikala nabo ū ng'wene.]

³⁵ Na a ba Paulo nū Balinaba būlenda ī Antiokia, būdimana na bangī bingī mu nīmo gwa kūlanga na kūgūlomeela ū mhayo go ng'wa Seeba.

Wilemeelwa bo ng'wa Paulo na Balinaba

³⁶ Aho jabīta shikū ndebe ū Paulo ūng'wīla ū Balinaba gīkī, “Tūshokage ko hangī tūje tūbageniha a badūgū ū mu mizengo ī yose, ūko twagūlomeelile ū mhayo go ng'wa Seeba; tūje tūbalola ūmo balījīla.”

³⁷ Ū Balinaba ūbona ībeelelile banjane nū Yohana, ūyo witanagwa Maliko.

³⁸ Alīyo ū Paulo ūbona īkūbeelela ūlū kūleka kūnsola ū munhū ng'wenūyo, nguno aho balī Pamfulia akabaleka, winogolelwa ū kūja nabo ū kū nīmo.

³⁹ Yū, nīyo būbiza ho wizwanja būtaale; kūshisha nose būlekana. Ū Balinaba ūnsola ū Maliko ūja nanghwe Kupulo.

⁴⁰ Ū Paulo ū ng'wene ūnsola Sila; aho bamala kūlombelwa shigongo sha ng'wa Seeba na a badūgū,

⁴¹ ūbūūka ajile. Ūbīta mu Sulia na Kilikia, ūja akūjiguzuhyaga ī kanisa.