Shītwa 14 - Sukuma New Testament 2000

Paulo na Balinaba mu Ikonio

¹ Aho balī Ikonio, bakingīla būbīlī wabo ng'wisinagogi lya Bayudaya būlomeela, kūshisha ibità itaale lya Bayudaya na Bayunani būzunya.

² Kwike a Bayudaya abo baalī batazunije būbabipya maganiko a banhū ba mahanga, būbasoba gīkī babakolwe a badūgū.

³ Alīyo nahene a ba Paulo nū Balinaba bakashinga mo ikanza ilīhu kūlwa ng'wa Seeba, bakūlomeelaga mu kwisandaala, ū Seeba nanghwe akūgūkaanīlaga ū mhayo gwa shigongo shakwe; akūbinhaga būdūla bo kwīta shimanīkījo na mihayo ya kūkumya mu nzīla ya makono gabo.

⁴ A banhū ba mu nzengo gwenūyo būgabanīka, bangī būdimana na Bayudaya, alīyo bamò būdimana nabo a batūng'wa.

⁵ Aho gwandya nsambo, a banhū ba mahanga na a Bayudaya na a batongeeji babo, būyūkooba nzīla ya kūbīītīla yabūbi a batūng'wa, na kūbaponda mawe.

⁶ Alīyo būgūdeeba ū mhayo gwenūyo; būnyenyeka, būpeelela Lukaonia, kū mizengo ya Lustila na Delibe, na mapandī gangī ayo gaalī hihī-hihī;

⁷ būja bakūlomeelaga Nghūlū Jawiza kwenūko.

Paulo na Balinaba mu Lustila

⁸ Ū mu Lustila walīho munhū wikalaga igashije, nguno walī nemehazu ū mu mhambala jakwe kūfuma mu nda ya ng'wa nina, na lūūlū walī ataalī kūshimīza nūūlū hado kūfuma kūbyalwa kwakwe.

⁹ Ū munhū ng'wenūyo walī wandegeleka ū Paulo aho akūlomeelaga; ū Paulo aho wanola chiza, ūmona alī na kūsanya gīkī adūgije kūpījiwa.

¹⁰ Hūna ūng'wīla n'ilaka itaale gīkī, “Būūkaga wīmīīle na magūlū gako!” Wikīndīka, wandya na kūshimīza.

¹¹ A banhū aho bagūbona ūyo akagwīta ū Paulo, bandya kwihamukīla mu lūlīmi lwabo lwa Shilukaonia; balīhaya gīkī, “Bamulungu batūgenihile mu suso ja banhū!”

¹² Ū Balinaba būng'witana Zeu, lelo ū Paulo būng'witana Helime, nguno h'ūyo walī ntongeeji ū mu kūyomba.

¹³ Ū ngabīji wa ng'wa Zeu wikalaga hihī ū mu nzengo ng'wenūmo, wiza na nzagamba ya ng'ombe, n'ibbipi lya mabonji gahelilwe chiza gūtunganyiwa hamò; ī shenīsho ūshenha ha mita gwa nzengo, gīkī ū wei na a banhū bafunye shitambo.

¹⁴ Alīyo a batūng'wa, a ba Balinaba nū Paulo aho bagūdeeba ū mhayo gwenūyo, būtandūla shizwalo shabo; būpeela bajile ū kwibità lya banhū, kūnū balīhamuka n'ilaka itaale

¹⁵ balīhaya gīkī, “Bing'we bababa, nibūlī mulīīta gīko? A bise nise tūlī banhū dūhū gītī bing'we. Tūlīmulomeela gīkī mulekane nayo ī mihayo ya dalali gītī yenīyī, mungalūkīle Mulungu mpanga, ū Meeja w'igūlū na sī na manyanza, nī shose īsho shilīmo!

¹⁶ Shibyalīlwe na shibyalīlwe īsho shamala kūbīta walī wagaleka a mahanga ga banhū bashimīzīle mu nzīla jabo ja benekīlī gīt'ūmo batogelilwe.

¹⁷ Kwike nahene atalekile ū kwikaanīla wei ng'wenekīlī, ūyūtwītīla yawiza mu kūtwinha mbula kūfuma ng'wilunde, na makanza ga kūpandīka matwajo; gīkī atwinhe shilīwa, jiyege ī ngholó jise!”

¹⁸ Nūūlū īkī bakahaya mihayo īlī gīko, nahene bakakoya no; ahene nose bakabahangīja kū kale a banhū ū kūbafunīja ī shitambo.

¹⁹ Alīyo bahayiza Bayudaya ba kūfuma Antiokia na Ikonio, būbahūmbūūla a banhū, būmponda mawe ū Paulo; hūna būndutanja bantwalile hanze ya nzengo baliganika wachaaga!

²⁰ Alīyo a bahemba aho bibilinga būmpīndya ha gatī, ūbūūka wingīla hangī ū mu nzengo. Ha ntondo yaho wīnga mo nū Balinaba, būja Delibe.

Kūshoka Antiokia ya Shamu

²¹ Aho balomeela ū mu nzengo gwenūyo, būpandīka bahemba bingī, hūna būbūūka bashokile Lustila na Ikonio na Antiokia.

²² Baja bakūbatimbyaga ngholó a bahemba, bakūbakomelejaga bikale bahandatīlile ū mu kūzunya; na kūbawīla gīkī, “Shiigelile twingīle ū mu būtemi bo ng'wa Mulungu mu nzīla ya būluhi būtaale.”

²³ Būlī mu kanisa yene babizaga ūlū bamala kūbasolela banamhala na kūlomba mu kūfunga, babatūūlaga mu būlanghani bo ng'wa Seeba ūyo banzunije.

²⁴ Bahayūmala kūbīta ū mu Pisidia, būja būūkashika Pamfulia.

²⁵ Hūna aho bamala kūgūlomeela ū mhayo mu Peliga būja Atalia.

²⁶ Kūfuma kwenūko būshikīīla Antiokia, ūko baalī balombelwa na kūtūūlwa mu būlanghani bo ng'wa Mulungu, kūlwa nīmo ūyo bakagūmala gwenūyo.

²⁷ Aho bashika bībilinga ī kanisa, bīsomboolela īyo Mulungu wajaga akūbeejaga hamò nabo, nī gīkī a banhū ba mahanga nabo baalugūlīlilwe ū nyango gwa kūzunya.

²⁸ Bakikala kwenūko ikanza ilīhu balī hamò nabo a bahemba.