Matayo 7 - Sukuma New Testament 2000

Kwihīga kwa kūlamula banhū

¹ “Mutabalamulage a biching'wi, hū mutūlamulwa na a bing'we.

² Nguno ūmo mukūbalamulīlaga banhū bangī, na a bing'we h'ūmo mukūlamulīlwa. Nīyo ī ngelekelo īyo mukūbagelekelaga bangī, h'īyo mukūgelekelwa na a bing'we.

³ Nibūlī ūkūnojaga ng'wiyo kasasala ka kapalala ako kalī mu liso lyakwe, alīyo ū bebe ū mu liso lyako gūlīmo ngamba, ūyo ūtūgūlonjaga?

⁴ Ī gīsī, ūlū gūlīmo ngamba ū mu liso lyako ū bebe, ūkūdūla ginehe ū kūng'wīla ū ndūgūyo gīkī, ‘Lembeelaga nakwīngīje kasasala ka kapalala, kalīmo ū mu liso lyako’?

⁵ Bebe ng'wibeeleja, gwīnjage tame ū ngamba ūyo gūlīmo ū mu liso lyako, hū ūkūdūla ū kūbona chiza, ūng'wīngīje nū ng'wiyo a kasasala ka kapalala ako kalīmo ū mu liso lyakwe!

⁶ Ī shikolo ī shawiza mutajinhage mva, nī shikolo shing'we ī sha mpango ntaale yaya ū kūshiponeja ngulubī, nguno jikūshipandagīla dūhū shisosohale, hama jimugalūkīle jimugulaje!”

Kūlomba na kūkooba

⁷ “Lombagi mukwinhwa, koobagi mukūpandīka, tūlagi hoodi ha nyango mukūlugūlīlwa.

⁸ Nguno būlī ng'wene ūyo akalombaga akinhagwa, nū yūyo akakoobaga akapandīkaga, hama nū yūyo akatūlaga hoodi ha nyango akalugūlīlagwa.

⁹ Ī gīsī alīho munhū kī ū mu bing'we ūyo ashikile kūlomva nūmbū na ng'wana wakwe, nanghwe ūng'winha iwe?

¹⁰ Nūūlū hamo ūlomva ndīlo, nani ūyo adūgije kūng'winha nzoka?

¹¹ Na lūūlū manīlagi henaho; a bing'we nūūlū īkī mulī babūbi, nahene mumanile ū kūbinha a baana bing'we shikolo shawiza, īlī kūtinda no ū kūlī Sīng'we ūyo alī ng'wigūlū. Ū ng'wene akūbinha shakwinha shawiza no pye abo bakūnombaga.

¹² Kwike shing'wigeleelilwe kūbīītīla a banhū gīt'ūmo mutogilwe bang'wītīle a bing'we, nguno h'ūmo shihayīlile ī shilagīlo na a bahangi.”

Nzīla ibīlī

¹³ “Bītīlagi mu nzīla mhine, nguno ī likūūwa ī ligalī nū mita ū ngalī shijile mu kūyagala; na balī bingī abo bakabītīlaga mo.

¹⁴ Alīyo ī nzīla īyo ījile mu būpanga, ī yene ngololoku; kwike mhine, pyī nū nyango mpine. Hama balī bagehu abo bakībonaga!”

Kūgūmana ntī ūmo gūlī

¹⁵ “Bilanghanagi a bahangi a balemba-lembi, abo bakūng'wizīīlaga gītī shiinū ng'wikūnza lya ngholo, alīyo ū mu gatī balī mhūge ndaku.

¹⁶ A benabo mukūbamanīla kū matwajo gabo. Angū, a banhū badūgije kūyoba mizabibu kwīngīīla mu magwata, nūūlū shisuumo sha ntini kwīngīīla mu malūla?

¹⁷ H'ūmo ījīlile, ū ntī gwawiza gūkatwajaga matwajo gawiza, nū ntī ū gwabūbi nago gūkatwajaga matwajo mabi.

¹⁸ Ū ntī ū gwawiza gūtūdūla kūtwaja matwajo mabi, nū ntī ū gwabūbi nago gūtūdūla kūtwaja matwajo gawiza.

¹⁹ Būlī ntī ūyo gūtatwajaga matwajo gawiza gūkabbutagwa gwaponyiwa mu moto.

²⁰ Hūna lūūlū, mukūbamanīla kū matwajo gabo.”

Kūleng'wa na Seeba

²¹ “Ītī gīkī pye abo bakanitanaga Seeba, Seeba, bakwingīla ū mu būtemi bo ng'wigūlū, alīyo dūhū ūyo akīītaga īyo yīnyegije Baba ūyo alī ng'wigūlū.

²² Ū mu lūshikū lwenūlo bingī bakūnidayīīla, balīhaya gīkī, ‘Seeba, Seeba, twalī tūtahangaga mu lina lyako? Na hangī twalī tūtapeejaga masamva, na kūbeeja milīmo mitaale mu lina lyako?’

²³ Nane nakūbashokeja nalībawīla hape gīkī, ‘Natamumanile nūūlū hado a bing'we bīīti ba shibi, nīngīlagi aha!’ ”

Bazengi babīlī

²⁴ “Ali lūūlū, būlī ng'wene ūyo ūyigwa ī mihayo yane hūna wīdīlīla na kwīshikīlīja, akwikolanījiwa na ngosha wa masala, ūyo akazenga numba yakwe ya madafaali h'itale.

²⁵ Hūna yūtūla mbula ya kūseja mihūūmo, kūnū na miyaga īkūhembaga; pyī ī shose shenīsho shūyikīīla ī numba yenīyo, alīyo ītagwile; nguno ū nsingi gwayo gwalī h'itale.

²⁶ Kwike būlī ng'wene ūyo ūyigwa ī mihayo yane alīyo ūleka ū kwīdīlīla, nūūlū kwīshikīlīja, ū ng'wene akwikolanījiwa na munhū mbūūlī, ūyo akazenga numba yakwe ha maseni.

²⁷ Yahayūtūla mbula ya kūseja mihūūmo, kūnū na miyaga īkūhembaga; aho pyī ī shose shenīsho shayikīīla ī numba yenīyo, īkagwa na kagwīle ka kūkamaaja no!”

²⁸ Ū Yesu aho wamala ū kūsomboola ī mihayo ī yose īyī, pye a mabità ga banhū abo bandegelekaga bakabūkumya na kakumīje kataale no ū būlangi bokwe.

²⁹ Nguno wabalangaga na būdūla, walī atabalangaga gīt'ūmo bīītīlaga a balangi babo ba shilagīlo.