Matayo 28 - Sukuma New Testament 2000

Kūjūūka kwa ng'wa Yesu

¹ Aho yabīta ī sabato, bohayūjīlīīla kwela ū mu lūshikū lo kwandya nyuma, ū Malia Magadalena nū Malia ū ūngī, būja kūshilola ī shigila.

² Kūhayimanīla yadinghima nyahīnga nhaale, nguno malaika wa ng'wa Seeba akika kūfuma ng'wigūlū; ūlīpilingitya ī liwe ūligasīja.

³ Ī suso yakwe yalī gītī lūlabi, ī myenda yakwe yalī yape gītī mawe ga mbula.

⁴ A balanghani bakogoha no, būyūdetema dūhū, naabo būbiza gītī baacha!

⁵ Ū malaika ūbayombya a bakīma benabo alīhaya, “Mutogohage a bing'we, nguno namanile gīkī mulīnkooba Yesu ūyo walī wakomilwe ha nsalaba.

⁶ Atīho a henaha wajūūkaga gīt'ūmo walī wahayīla; nzūgi mulole aho walī alaalile!

⁷ Ali lūūlū, jagi wangū mukabawīle a bahemba bakwe, gīkī wajūūkaga kūfuma mu bafu; watongaga kūja Galilaya, mukūja mukamonele kwenūko. H'īyo, ū nene namuwīla.”

⁸ Hūna bīnga wangū-wangū a ha shigila, bigwaga ū kogoha, alīyo hangī bayegaga kīngī nasho; būpeela nhambo kūjūbamanya a bahemba bakwe.

⁹ Aho bajile, bahayimanīla bamanhya nanghwe ū Yesu; ūbagīsha, “Mulī mhola!” Būng'wegeela, būndima kū mhambala būnamya.

¹⁰ Nanghwe ū Yesu ūbawīla, “Mutogohage, jagi mukabawīle a baana bang'wise gīkī nalīja Galilaya, tūkwibonela kwenūko.”

Būlomolomo bo balanghani

¹¹ Aho baja a bakīma benabo, bamò ba balanghani ba shigila būja ū mu nzengo, būūkabawīla a bagabīji bataale pyī īyo īkilonga.

¹² A bagabīji bataale na a banamhala bikobya pye hangī būgūhoyela, bizunīlīja kūsola hela kaganda kigelile; būbinha a bashilikale.

¹³ Būbawīla; “Hayagi gīkī, ‘Twalī twabītīlwa tūlo ī būjikū, biza a bahemba bakwe būng'wiba!’

¹⁴ Ū mhayo gwenūyū ūlū gūliigwiwe nū nsugi, tūkūnghuumūja dūhū a bise, tūng'wīnje a bing'we ū mu makoye.”

¹⁵ Na nghana būjanukūla ī hela, bandya kwīta ūmo bakalangīīlīlwa. Ū mhayo gwenūyo gūkumūchiwa na a Bayudaya kūshisha nī lelo īyī.

Kūtūng'wa kwa bahemba

¹⁶ A bahemba abo ikūmi n'ūmò bakaja ī Galilaya, būūkashika ū kū lūgūlū ūlo walī wabalagīla ū Yesu.

¹⁷ Aho bamona būnamya, alīyo bamò babo bakayūtawa-tawa.

¹⁸ Hūna ū wei ū Yesu ūbegeela ūbawīla gīkī, “Pyī ū būdūla ūbo būlī ng'wigūlū nū bo mu sī ninhilwe nene.

¹⁹ Hūna lūūlū a bing'we jagi hose-hose ū mu mahanga; ng'ūbahembeka na kūbabatīīja mu lina lya ng'wa Baba, na lya Ng'wana, na lya ng'wa Moyo Ng'wela.

²⁰ Hama ng'ūbalanga kwīdima pyī īyo naamalile kūmukomeleja, managi gīkī ū nene ng'wenekīlī nalī hamò ning'we pyī ī shikū jose na jose, kūshisha kū būkalīkījo w'ikanza.”